သျှမ်းပြည် တောင်ပိုင်း ပင်လောင်းမြို့နယ်တွင် ရေရှားမှုပြဿနာကြုံတွေ့နေရပြီး စစ်ဘေးရှောင်များ ကျန်းမာရေးအတွက် စိုးရိမ်မှုများရှိလာကြောင်း စုံစမ်းသိရသည်။
ပင်လောင်းမြို့နယ် တောင်ပိုင်း ဝါလီး၊ဆောင်ပြောင်း၊ထီဗွား၊လိန့်ညား စသည့်ကျေးရွာတို့တွင် ယခုလမှ စ၍ ရေရှားပါးမှု ပြဿနာများ စတင်ကြုံတွေ့ လာရကြောင်း၊အချို့ကျေးရွာများတွင် ရေများကို ဝယ်သုံးနေကြရကြောင်း စစ်ဘေးရှောင်အမျိုးသားတစ်ဦးက သျှမ်းသံတော်ဆင့်ကို ပြောသည်။
“ရေတွေကရှား ရေဆိုသုံးဖို့တောင်မကျန်တော့ အခုက ဝယ်သုံးနေရတာ။ လှောင်ထားတဲ့မိုးရေတွေလည်း ကုန်ပြီ။ နွေရာသီတောင် မရောက်သေးဘူး။ ကျနော်တို့စစ်ဘေးရှောင်အတွက် ချိုးရေနဲ့ အဝတ်လျှော်ဖို့ ရေတွေက မပေး တော့ဘူး။ သောက်သုံးရေလောက်ပဲပေးတော့တယ်။ ရေရှည်အတွက်အစီအစဉ် ဆွဲတယ်လို့တော့ ပြောတာပေါ့။”ဟု စစ်ဘေးရှောင်အမျိုးသားတစ်ဦးက ပြောသည်။
လက်ရှိရေရှားပါမှုကြောင့် စစ်ရှောင်များသည့် ရေမသန့်ရှင်းမှု ပြဿနာများကြုံတွေ့နေရသည့်အတွက် ကလေးငယ်များ အရေပြားရောဂါများဖြစ်လာမည်ကိုလည်း စိုးရိမ်းနေကြရကြောင်း ၎င်းက ဆက်ပြောသည်။
“ရေက တစ်ပီပါပုံး ၂၅၀၀ ကျပ်နဲ့ ပေးဝယ်နေရတယ်။ ကလေးတွေအတွက်က နွေရာသီရောက်လာ အရေပြားရောဂါတွေ အတွက် စိုးရိမ်လာရပြီ သောက်သုံးရေတွေကြောင့် ဝမ်းပျက်ဝမ်းလျောတွေ အဲ့ဒါတွေက စိုးရိမ်လာရပြီ” ဟု ၎င်းက ပြောသည်။
သျှမ်းပြည် တောင်ပိုင်း ၁ နှစ်ကျော်ကြာတိုက်ပွဲ ဖြစ်ပွားခြင်းကြောင့် ပင်လောင်း၊ ဆီဆိုင်၊ ညောင်ရွှေ မြို့နယ် တို့တွင် နေရပ်စွန့်ခွာ၍ စစ်ဘေးတိမ်းရှောင်နေသည့် ပြည်သူ (၆၅၀၀၀) နှင့် အထက်ရှိနေဆဲ ဖြစ်ကြောင်း ပအိုဝ်းလူငယ်အစည်းအရုံး(PYO)မှ ယခုနှစ် ဇန်နဝါရီ(၁၅)ရက်တွင် ထုတ်ပြန်ခဲ့သည်။
ထို့ပြင်၊ ၂၀၂၃နိုဝင်ဘာလ ၁၁ ရက် “၁၁.၁၁ စစ်ဆင်ရေး” ကြောင့် သျှမ်းကရင်နီ နယ်စပ် တစ်လျှောင်တွင် တိုက်ပွဲများကြောင့်ထွက်ပြေးတိမ်းရှောင်လာသည့် ကရင်နီပြည် လွိုင်ကော်မြို့နယ်ဒေသခံများလည်းပါကြောင်း သိရသည်။
Leave a Comments