ညီနောင်မဟာမိတ်(၃)ဖွဲ့မှ ကိုးကန့်တပ်ဖွဲ့ MNDAA နှင့် စစ်ကောင်စီတို့သည် တရုတ်နိုင်ငံ၏ ကြားဝင်စေ့စပ်မှုဖြင့် အကြိမ်ကြိမ်တွေ့ဆုံ ဆွေးနွေးနေသော်လည်း မအောင်မြင်နိုင်ကြောင်း စုံစမ်းသိရသည်။

ယနေ့ (ဇန်နဝါရီလ ၁၆ ရက်) တွင် စစ်ကောင်စီနှင့် ကိုးကန့်တပ်ဖွဲ့ MNDAA အကြား တရုတ်နိုင်ငံ၏ ကြားဝင်စေ့စပ်မှုဖြင့် ယူနန်ပြည်နယ် ကူမင်းမြို့တွင် ထပ်မံတွေ့ဆုံသည့် ဆွေးနွေးပွဲလည်း သဘောတူညီချက် တစုံတရာ မရရှိဘဲ မအောင်မြင်နိုင်ကြောင်း နိုင်ငံရေးလေ့လာသူများက သုံးသပ်ပြောဆိုသည်။

ယမန်နှစ် ဒီဇင်ဘာလအတွင်း ပထမအကြိမ် တွေ့ဆုံဆွေးနွေးမှု၌ လားရှိုးမြို့မှ ကိုးကန့်တပ်များ ပြန်လည်ဆုတ်ခွာပေးရန် စစ်ကောင်စီဘက်က တောင်းဆိုခဲ့ပြီး MNDAA ဘက်မှ လားရှိုးမြို့ အပါအဝင် ၎င်းတို့ထိန်းချုပ်ထားသည့် နယ်မြေအတွင်း စစ်ကောင်စီမှ လေကြောင်းထိုးစစ် အကြမ်းဖက်လုပ်ကိုင်နေခြင်းကို ရပ်တန့်ပေးရန် တောင်းဆိုခဲ့ခြင်းကြောင့် အစည်းအဝေး ပျက်သွားခဲ့ရကြောင်း ဆိုသည်။

“နောက်တစ်ခါ ဒုတိယအကြိမ် အစည်းအဝေးလုပ်လည်း အဲ့တာတွေ ပြောဦးမှာပါပဲ။ အဲ့တာတွေ ပြောရင်လည်း အစည်းအဝေးက ပျက်ဦးမှာပါပဲ။ ဒါကြောင့်မလို့ ဒီလိုအစည်းအဝေးမျိုး လုပ်လာတာ ဟိုင်ဂင်ကနေ ဒီနေ့အထိ ၅ ကြိမ် ၆ ကြိမ်လောက် ရှိပါပြီ။ ဘယ်ဟာမှ မအောင်မြင်ပါဘူး။ နောင်လာမယ့် အစည်းအဝေးလည်း အောင်မြင်မယ်လို့ မယူဆပါဘူး”ဟု နိုင်ငံရေးလေ့လာသုံးသပ်သူ ဦးသန်းစိုးနိုင်က သျှမ်းသံတော်ဆင့်ကို သုံးသပ်ပြောဆိုသည်။

ပြီးခဲ့သည့် ၂၀၂၄ ဒီဇင်ဘာလ (၁၅) ရက်က ကိုးကန့်တပ်ဖွဲ့ MNDAA နှင့် စစ်ကောင်စီတို့ တရုတ်နိုင်ငံ ကူမင်းမြို့၌ တွေ့ဆုံမှုအတွင်း နှစ်ဘက်ကိုယ်စားလှယ်များအကြား သဘောတူညီမှု တစုံတရာ မရရှိဘဲ အစည်းအဝေး ပျက်ခဲ့ပြီးနောက် ဇန်နဝါရီလအတွင်း ထပ်မံတွေ့ဆုံရန် ဆုံးဖြတ်ခဲ့ခြင်းဖြစ်ကြောင်း သိရသည်။

ယခု ဒုတိယအကြိမ် ထပ်မံပြုလုပ်မည့် ဆွေးနွေးပွဲသို့ MNDAA ဘက်မှ စစ်ဦးစီးချုပ် ဖုန်တာရွှင်၏ သားဖြစ်သူ နိုင်ငံခြားဆက်ဆံရေး ဌာနကြီးမှူး ဖုန်ခွင်းက ဦးဆောင်တက်ရောက်ဖွယ်ရှိကြောင်း VOA မြန်မာပိုင်းတွင် ယမန်နေ့က သတင်းဖော်ပြထားပြီး ဆွေးနွေးမှု အခြေအနေ အသေးစိတ်ကို ထပ်မံစုံစမ်းနေသည်။

အလားတူ စစ်ကောင်စီနှင့် ကိုးကန့်တပ်ဖွဲ့အကြား ပထမအကြိမ် ဆွေးနွေးပွဲတွင် MNDAA ဘက်မှ ကိုယ်စားလှယ် (၇) ဦး တက်ရောက်ကာ စစ်ကောင်စီဘက်မှ အမှတ်(၁) စစ်ဆင်ရေးအထူးအဖွဲ့မှူး ဒုဗိုလ်ချုပ်ကြီး ကိုကိုဦး က ဦးဆောင်ခဲ့ပြီး နယ်စပ်ကုန်သွယ်ရေး ပြန်လည်ဖွင့်လှစ်နိုင်ရန်နှင့် စီးပွားရေး ပြန်လည်ထူထောင်ရန် စသည့်အချက်များ ဆွေးနွေးနိုင်ရေး တရုတ်ကိုယ်စားလှယ်များက စီစဉ်ပေးခဲ့ကြောင်း ဆိုသည်။

ကိုးကန့်တပ်ဖွဲ့ MNDAA က တရုတ်-မြန်မာနယ်စပ် တည်ငြိမ်ရေးကို ကာကွယ်ထိန်းသိမ်းရန်နှင့် ပြည်တွင်းစစ်ရေး ပဋိပက္ခကို နိုင်ငံရေးနည်းလမ်းဖြင့် ဖြေရှင်းရန် လိုလားကြောင်း ၂၀၂၄ ဒီဇင်ဘာလ (၃) ရက်တွင် ထပ်မံထုတ်ပြန် ကြေညာခဲ့ပြီးနောက် တရုတ်၏ ကြားဝင်စေ့စပ်မှုဖြင့် စစ်ကောင်စီနှင့် (၂) ကြိမ်မြောက် တွေ့ဆုံဆွေးနွေးလာခြင်း ဖြစ်သည်။

၎င်းထုတ်ပြန်ချက်အတွင်း စစ်ကောင်စီမှ နိုင်ငံနေရာအနှံ့တွင် ဖော်ဆောင်နေသည့် ဝေဟင်နှင့် မြေပြင် ထိုးစစ်ဆင်တိုက်ခိုက်နေမှုများကို ရပ်ဆိုင်းရန် တောင်းဆိုထားပြီး MNDAA အနေဖြင့် နိုင်ငံရေးနည်းလမ်းကို အားပေးထောက်ခံသော်လည်း မိမိကိုယ်ကို ခုခံကာကွယ်ခွင့်အား ဆက်လက်စွဲကိုင်ထားကြောင်း ဖော်ပြထားသည်။

အခြားတစ်ဘက်တွင် အရှေ့မြောက်တိုင်း စစ်ဌာနချုပ် (ရမခ) အခြေစိုက်ရာ လားရှိုးမြို့မှ ကိုးကန့်တပ်များ ပြန်လည်ဆုတ်ခွာရန် တရုတ်၏ တောင်းဆိုချက်ကို ငြင်းဆန်ခဲ့သည့်နောက် MNDAA ခေါင်းဆောင်ဖြစ်သူ ဖုန်တာရွှင်ကို တရုတ်နိုင်ငံက ထိန်းသိမ်းထားကြောင်း သတင်းထွက်ပေါ်ခဲ့ပြီး လတ်တလော စစ်ကောင်စီနှင့် ဆွေးနွေးပွဲများသို့ အဆင့်မြင့် ကိုယ်စားလှယ်များ စေလွှတ်မည်ဖြစ်ကြောင်း MNDAA ဘက်မှ ထုတ်ပြန်ထားသည်။