သျှမ်းပြည်တောင်ပိုင်း၊ ဆီဆိုင်မြို့နယ် နောင်ထောဝ်ကျေးရွာကို စစ်ကောင်စီသည် တိုက်ပွဲဖြစ်ပွားဖြင်းမရှိဘဲ ဗုံးကြဲတိုက်ခိုက်ခဲ့သောကြောင့် ဓမ္မာရုံထိခိုက်ပျက်စီးသွားခဲ့ကြောင်း PNLA မှ ယနေ့ (ဇန်နဝါရီ ၁၅)ရက်တွင် ထုတ်ပြန်သည်။

ယမန်နေ့(ဇန်နဝါရီလ ၁၄ ရက်) ညနေ ၃ နာရီ ဝန်းကျင်တွင် စစ်ကောင်စီက ဂျက်ဖိုက်တာ တစ်စီးဖြင့် လာရောက်ဗုံးကြဲခဲ့ပြီး နောင်ထောဝ် ရဲစခန်း အပါအဝင် ဓမ္မာရုံတစ်ခု ပျက်စီးသွားခဲ့သည်ဟု အဆိုပါ ထုတ်ပြန်ချက်တွင် ထည့်သွင်းဖော်ပြထားသည်။

စစ်ကောင်စီမှ လေယာဉ်ဖြင့် ဗုံးလာကြဲသောကြောင့် လူထိိခိုက်မှုမရှိသော်လည်း ဒေသခံအများစု ထပ်မံစစ်ဘေးရှောင်နေရသည်ဟု ဆီဆိုင် စစ်ရှောင် အမျိုးသမီး တစ်ဦးက သျှမ်းသံတော်ဆင့်ကို ပြောသည်။

“အခုက တော်တော်များများ စစ်ကြိုရှောင်နေကြပြီ။ နောင်ထောဝ်မှာ ဗုံးကြဲတာက လူတော့ မထိခိုက်ဘူး။ မနေရဲဘူး ။ကြောက်တယ်။ခုက ရွာကို ပြန်လာတာ ၄ လမပြည့်သေးဘူး။ထပ်ပြေးရနေရပြီ။ အပေါ်က ကြဲမှာကို ပိုကြောက်နေရတယ်။” ဟု အဆိုပါ စစ်ရှောင် အမျိုးသမီးတစ်ဦးက ပြောသည်။

အဆိုပါ နောင်ထောဝ်ကျေးရွာသည် ပအိုဝ်းအမျိုးသားလွတ်မြောက်ရေးတပ်မတော်(PNLA) တပ်စခန်းနှင့် နီးသည့်အတွက် ပအိုဝ်းပြည်သူ့စစ် (PNO)က စစ်ကောင်စီကို ဗုံးကြဲခိုင်းခြင်း ဖြစ်နိုင်ကြောင်း ပအိုဝ်းလူငယ်တစ်ဦးက ပြောသည်။

“နောင်ထောဝ်က PNLO တပ်စခန်းနဲ နီးတယ်။ အဲကြောင့် ဂိတ်တွေ ဘာတွေ ရှိတယ် အထင်နဲ့ ကြဲတာထင်တယ်။ ပြီးတော့ PNO က အဲနေရာမှာ PNLO များတယ်ဆိုပြီး ကြဲခိုင်းတာလည်း ဖြစ်နိုင်တယ်။မဲနယ်တောင်က ပင်လျံကျေးရွာ ကို PNO ကနေ ကြဲခိုင်းတာ အဲတုန်းကလည်း အဲလိုပဲ။ အဲတုန်းက တရွာလုံး ပြာကျတယ် ဘုန်ကြီးကျောင်းအပါအဝင် လူတော့ မထိဘူး။ အကုန်ရှောင်ထားချိန်ဖြစ်တော့ ကံကောင်းသွားတယ်။” ဟု ပအိုဝ်းအမျိုးလူငယ် တက်ကြွလှုပ်ရှားသူတစ်ဦးက သျှမ်းသံတော်ဆင့်ကို ပြောသည်။

ထို့အပြင် ပအိုဝ်းပြည်သူ့စစ်(PNO)က ပအိုဝ်းပြည်သူများကို ခြိမ်းခြောက် ငွေတောင်းခြင်း၊ အတင်းစစ်သားစုဆောင်းခြင်းအပြင် ညင်းပန်းသတ်ဖြတ်မှုများ လုပ်ဆောင်ခြင်းကြောင့် ပအိုဝ်းဒေသကို ကာကွယ်ပေးသည့် အဖွဲ့အစည်းဟု သတ်မှတ်၍ မရကြောင်း ၎င်းအမျိုးသားက ထပ်လောင်းပြောသည်။

ပြီးခဲ့သည့် ဇန်နဝါရီလ (၁၁)ရက်နေ့တွင်လည်း ဆီဆိုင်မြို့နယ်၊ ဖြီကျွတ်ကျေးရွာကို စစ်ကောင်စီ ကဗုံးကြဲတိုက်ခိုက်ခဲ့ကာ တောင်ယာမှ ပြန်လာသည့် ဒေသခံအမျိုးသမီး( ၃) ဦးအနက် သားအမိ( ၂) ဦးမှာ သေဆုံးသွားခဲ့ပြီး ကျန်အမျိုးသမီး (၁) ဦးမှာ ပြင်းထန်ဒဏ်ရာရရှိခဲ့ကြောင်း ဒေသခံများထံမှ သိရှိရသည်။

အလုပ်သင် သတင်းထောက် နန်းလရောင် ရေးသားသည်။