သျှမ်းပြည် ကျေးသီးမြို့ပေါ် ရပ်ကွက်များတွင် စစ်ကောင်စီတပ်နှင့် SSPP/SSA တို့မှ စစ်မှုထမ်းရန် အပြိုင်အဆိုင် လူသစ်စုဆောင်းနေကြောင်း စုံစမ်းသိရသည်။
ဇန်နဝါရီလဆန်းပိုင်းမှ စတင်ပြီး ကျေးသီးမြို့ပေါ် ရပ်ကွက်များတွင် စစ်ကောင်စီတပ်နှင့် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) တို့မှ စစ်မှုထမ်းရန် အပြိုင်အဆိုင် လူသစ်စုဆောင်းနေပြီး SSPP မှ မြို့ပေါ်ရပ်ကွက် နေအိမ်တိုင်းရှိ အိမ်ထောင်စုစာရင်းများကို ၎င်းတို့ထံ သွားရောက်ပြသခိုင်းကြောင်း ဒေသခံများက ပြောသည်။
“SSPP စစ်သားထပ်ကောက်နေတာ ပြည်သူက တော်တော်ဒုက္ခရောက်နေပြီ။ ဒီတခေါက် သူတို့လူစုတာ မရလို့ အခု ရပ်ကွက်တိုင်းက အိမ်ထောင်စုစာရင်းကို သူတို့ဆီ ယူသွားပြရတယ်။ သွားမပြတဲ့ ရပ်ကွက်ကို ၅ ရက်အတွင်း ဝင်ဖမ်းမယ်လို့တော့ ကြားတယ်၊ တကယ်လုပ်မှာလား ခြောက်လန့်တာလား မသိသေးဘူး”ဟု ကျေးသီးမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ကျေးသီးမြို့ပေါ် ရပ်ကွက်များအတွင်း စစ်မှုထမ်းရန် SSPP မှ တပ်သားသစ်စုဆောင်းနေခြင်းနှင့် ပတ်သက်ပြီး စုံစမ်းမေးမြန်းရန် သျှမ်းသံတော်ဆင့်မှ SSPP ပြောရေးဆိုခွင့်ရှိသူ ဗိုလ်မှူးကြီးစိုင်းဆုထံ ဖုန်းဖြင့် ဆက်သွယ်ခဲ့သော်လည်း ဖုန်းစက်ပိတ်ထားသည်။
စစ်ကောင်စီလက်အောက်ခံ ကျေးသီးမြို့နယ်အုပ်ချုပ်ရေးမှူးကလည်း ရပ်ကွက်အုပ်ချုပ်ရေးမှူးများကို SSPP ထံ အိမ်ထောင်စုစာရင်းများ သွားရောက်ပြသခြင်း မပြုရန် အစည်းအဝေး ခေါ်ယူပြီး တားမြစ်ကြောင်း အုပ်ချုပ်ရေးမှူးနှင့် နီးစပ်သူများထံမှ သိရသည်။
အလားတူ ကျေးသီးမြို့ပေါ် ရပ်ကွက် (၆) ခုမှ အုပ်ချုပ်ရေးမှူးများလည်း စစ်ကောင်စီနှင့် SSPP နှစ်ဘက်ကြားညပ်နေခြင်းကြောင့် မြို့နယ်အုပ်ချုပ်ရေးမှူးထံ နှုတ်ထွက်စာ တင်ထားသော်လည်း ခွင့်မပြုခြင်းကြောင့် အချို့ရပ်ကွက်အုပ်ချုပ်ရေးမှူးများသည် ထိုင်းနိုင်ငံသို့ တိမ်းရှောင်နေရကြောင်း ဒေသခံများက ပြောသည်။
“အသစ်ရောက်တဲ့ မြို့နယ်အုပ်ချုပ်ရေးမှူးကလည်း ရပ်ကွက်ဥက္ကဋ္ဌနဲ့ အစည်းအဝေးခေါ်ပြီး ဘယ်သူမှ အိမ်ထောင်စုစာရင်း သွားမပေးရဘူးလို့ တားတယ်။ တစ်ဖက်ကလည်း SSPP က မလာမနေရဆိုပြီး လုပ်တယ်။ ရပ်ကွက် (၆) ခုစလုံး ဥက္ကဋ္ဌတွေ နှုတ်ထွက်စာတင်တာ မြို့နယ်မှူးက လက်မှတ်မထိုးပေးဘူး။ တစ်ယောက်ကတော့ ထိုင်းဘက် ထွက်ပြေးသွားပြီ”ဟု ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
ယမန်နှစ် ၂၀၂၄ မတ်လအတွင်းကလည်း ကျေးသီးမြို့နယ်တွင် စစ်ကောင်စီလက်အောက်ခံ မြို့နယ်အုပ်ချုပ်ရေးမှူးသည် ရပ်ကျေးစာရေးများမှတဆင့် မြို့နယ်အတွင်းရှိ ကျေးရွာအုပ်စု အုပ်ချုပ်ရေးမှူးများသို့ ပြည်သူ့စစ်လုပ်ရန် ဆင့်ခေါ်ခိုင်းခဲ့ရာ SSPP ဌာနချုပ်အနီးရှိ ကျေးရွာများလည်း ပါဝင်ကြောင်း ကျေးသီးမြို့ ဒေသခံများက ပြောသည်။
ကျေးသီးမြို့နယ်တွင် အရှေ့အလယ်ပိုင်း တိုင်းစစ်ဌာနချုပ် (ရလခ) လက်အောက်ခံ ခလရ-၁၃၁၊ မိုင်းနောင်မြို့တွင် စကခ-၂၊ ခလရ-၉ နှင့် ခလရ-၂၈၆ တပ်ရင်းတို့အပြင် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ဝမ်ဟိုင်းဌာနချုပ်လည်း အခြေစိုက်ထားသည်။
Leave a Comments