အပစ်ရပ် တိုင်းရင်းသားလက်နက်ကိုင် (၇)ဖွဲ့တို့၏ 7 EAO Alliance မဟာမိတ်အဖွဲ့မှ ပြည်တွင်းနိုင်ငံရေးဘောင် ချဲ့ထွင်ရေးလုပ်ငန်းစဉ် တိုးမြှင့်ဆောင်ရွက်ရန် ဆွေးနွေးခဲ့ကြောင်း စုံစမ်းသိရသည်။

ယမန်နေ့ (ဇန်နဝါရီ ၁၄ ရက်) တွင် NCA လက်မှတ်ရေးထိုးပြီး အပစ်ရပ်ထားသည့် တိုင်းရင်းသားလက်နက်ကိုင် (၇) ဖွဲ့တို့၏ 7 EAO Alliance ဦးဆောင်အဖွဲ့ အစည်းအဝေးကို အွန်လိုင်းဖြင့် ကျင်းပခဲ့သည်။

ထိုအစည်းအဝေးတွင် ပြည်တွင်းနိုင်ငံရေးဘောင် ချဲ့ထွင်ရေးလုပ်ငန်းစဉ် အပါအဝင် ၂၀၂၅ နိုင်ငံရေးအခင်းအကျင်းနှင့်အညီ ဆောင်ရွက်နိုင်ရန် ကြိုတင်ပြင်ဆင်ရေးတို့ကို ဆွေးနွေးခဲ့ကြောင်း ထုတ်ပြန်ချက်တွင် ဖော်ပြထားသည်။

“ဗိုလ်ချုပ်ကြီး ယွက်စစ်ရဲ့ အဖွင့်မိန့်ခွန်းမှာ အရင်တိုင်းပဲ အလုပ်ဆက်လုပ်နေရင် ၂၀၂၅ ခုနှစ်ထဲ ဖြစ်လာနိုင်တဲ့ နိုင်ငံရေးအခင်းအကျင်းနဲ့ လိုက်မမီဘဲ ဖြစ်မယ်၊ လုပ်နည်းလုပ်ဟန် အားလုံးပြောင်းလဲဖို့ လိုကြောင်း ပြောတယ်။ ဒီနှစ်မှာ ဘာတွေလုပ်မယ်ဆိုတာ ဆွေးနွေးကြတယ်”ဟု ၎င်းအစည်းအဝေးသို့ တက်ရောက်ခဲ့သူတစ်ဦးက သျှမ်းသံတော်ဆင့်ကို ပြောသည်။

အဆိုပါ အစည်းအဝေးသို့ 7 EAO Alliance ဦးဆောင်အဖွဲ့ ခေါင်းဆောင်ဖြစ်သူ RCSS ဥက္ကဋ္ဌ ဗိုလ်ချုပ်ကြီးယွက်စစ်နှင့် ဒုအဖွဲ့ခေါင်းဆောင်ဖြစ်သူ NMSP ဒုဉက္ကဋ္ဌ နိုင်အောင်မင်းတို့က သဘာပတိအဖြစ် ဆောင်ရွက်ပြီး အတွင်းရေးမှူးအဖွဲ့ဝင်များနှင့် လုပ်ငန်းကော်မတီ အသီးသီးမှ စုစုပေါင်း (၂၂) ဦး တက်ရောက်ခဲ့ကြောင်း သိရသည်။

“အိမ်နီးချင်းနဲ့ နိုင်ငံတကာမှာ စိုးရိမ်နေတာက အတိုက်အခံ ဘက်ကလည်း SAC ကို အပြုတ်တိုက်ဖို့ပဲ ပြောနေတယ်၊ တိုက်ပြီးသွားရင်လည်း အားလုံးတစုတစည်းထဲ ဖြစ်နိုင်မလားဆိုတာ ဒီအချက်ကို စိုးရိမ်နေတာ။ တစုတစည်းထဲ မဖြစ်ရင် ဒီနိုင်ငံက ပြိုကွဲသွားနိုင်တယ်ဆိုတာမျိုး မြင်တာပေါ့။ ဒါကြောင့် အပြောင်းအလဲဖြစ်ရင် ငါတို့လည်း အားလုံးနဲ့ တသားတည်း တစုတစည်းထဲ ဖြစ်တယ်ဆိုတာ ပြနိုင်ရမယ်၊ အဲ့ဒါမှပဲ အိမ်နီးချင်းနဲ့ အာဆီယံ၊ UN တို့လည်း စိတ်သက်သာရာရမယ်”ဟု အဖွင့်မိန့်ခွန်းတွင် ဗိုလ်ချုပ်ကြီးယွက်စစ်က ပြောဆိုကြောင်း သိရသည်။

ထို့အပြင် အစည်းအဝေး၌ လက်ရှိဖြစ်ပေါ်နေသည့် နိုင်ငံရေး၊ စစ်ရေး၊ စီးပွားရေးနှင့် လူထုရင်ဆိုင်နေရသော လူမှုဒုက္ခမျိုးစုံတို့ကို သုံးသပ်ကာ လက်ရှိနိုင်ငံရေး အကြပ်အတည်းမှ လွတ်မြောက်ရန်အတွက် သက်ဆိုင်သူအားလုံး ပါဝင်သော နိုင်ငံရေး တွေ့ဆုံဆွေးနွေးမှုများ ဖြစ်ပေါ်လာစေရေး၊ ငြိမ်းချမ်းရေးလုပ်ငန်းစဉ် ဖော်ဆောင်ရေးနှင့် EAO များအတွင်း ပေါင်းစပ်ညှိနှိုင်းမှုများ ပိုမိုရရှိလာစေရေးတို့ကို ဆွေးနွေးခဲ့ကြောင်း ထုတ်ပြန်ချက်တွင် ဆိုထားသည်။

ယမန်နှစ် ၂၀၂၄ မတ်လတွင် NCA လက်မှတ်ထိုး အပစ်ရပ် တိုင်းရင်းသားလက်နက်ကိုင် (၇)ဖွဲ့မှ စုဖွဲ့မှုပုံစံအသစ်ဖြင့် ပြန်လည်ဖွဲ့စည်းခဲ့သည့် 7 EAO Alliance မဟာမိတ်အဖွဲ့တွင် သျှမ်းပြည် ပြန်လည်ထူထောင်ရေးကောင်စီ (RCSS)၊ ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO)၊ ရခိုင်ပြည်လွတ်မြောက်ရေးပါတီ (ALP)၊ KNU/KNLA ငြိမ်းချမ်းရေးကောင်စီ၊ လားဟူဒီမိုကရက်တစ် အစည်းအရုံး (LDU)၊ ဒီမိုကရေစီအကျိုးပြု ကရင်တပ်မတော် (DKBA) နှင့် မွန်ပြည်သစ်ပါတီ(NMSP) တို့ ပါဝင်ထားသည်။