သျှမ်းပြည်တောင်ပိုင်း၊ ဆီဆိုင်မြို့နယ် ထီဆုံ ကျေးရွာအနီးတိုက်ပွဲတွင် ဖမ်းဆီးရမိသည့် PNLA ၏စစ်သုံ့ပန်း (၅)ဦးကို PNOက သတ်ဖြတ်ခဲ့ပြီး တိုက်ပွဲတွင် ကျဆုံးသည်ဟု PNOမှ ငြင်းဆိုသွားခဲ့သည်။

ပြီးခဲ့သည့် (ဇန်နဝါရီလ ၁၂ ရက်) နေ့ ညနေပိုင်းတွင် ထီဆုံ ကျေးရွာအနီး တိုက်ပွဲ၌ ပအိုဝ်းအမျိုးသားလွတ်မြောက်ရေး တပ်မတော်(PNLA) ဖက်မှ စစ်သုံ့ပန်း (၅) ဦးကို ပအိုဝ်းပြည်သူ့စစ် (PNO) မှ ဖမ်းဆီးခဲ့ပြီး (၁၃ ) ရက်နေ့ တွင် သတ်ဖြတ်ခဲ့ကြောင်း သတင်းထွက်ပေါ်ခဲ့သည်။

အဆိုပါ တိုက်ပွဲဖြစ်စဉ်နှင့် ပတ်သက်ပြီး ယမန်နေ့ ဇန်နဝါရီလ (၁၄) ရက်နေ့တွင် သျှမ်းသံတော်ဆင့်မှ PNO အရာရှိတစ်ဦးကို ဆက်သွယ်မေးမြန်းရာ “ ဟုတ်တယ်။ တိုက်ပွဲမှာတော့ PNLA ဖက်က (၅) ဦးကို အရှင်ဖမ်းမိထားတယ်။” ဟု ဖြေကြားခဲ့သည်။

သို့သော် ယနေ့ (ဇန်နဝါရီလ ၁၅ရက်) နေ့တွင် စစ်သုံ့ပန်းများ သတ်ဖြတ်ခံသည်နှင့် ပတ်သက်ပြီး PNO အရာရှိတစ်ဦးကို ဆက်သွယ်မေးမြန်းရာတွင် ၎င်းတို့ သတ်ဖြတ်ခြင်း မဟုတ်ကြောင်းနှင့် တိုက်ပွဲမှာ ကျဆုံးသွားကြောင်း ပြောဆိုခဲ့သည်။

“ကျနော်တို့နဲ့ တိုက်ပွဲဖြစ်ပွားရင်း သူတို့က သေဆုံးသွားကြတာ။ မနေ့က အရှင်ဖမ်းမိတယ်လို့ ဖြေတာက ဒီလိုရှိတယ် အခုက တိုက်ပွဲမှာ ကျတာတဲ့။ အဲဒီပုံတွေက ကြာပြီရိုက်ထားတာ။ ကျနော်တို့ PNOမှာ စစ်သုံ့ပန်းတွေကို သတ်ဖြတ်တာမရှိဘူး။ သတ်ဖြတ်ခဲ့ရင်လည်း ဥပဒေအရ အရေးယူရမယ်။” ဟု PNO အရာရှိတစ်ဦးက သျှမ်းသံတော်ဆင့်ကို ပြောသည်။

PNO က စစ်သုံးပန်း (၅)ဦးကို ဖမ်းဆီးရမိသည့် ဓာတ်ပုံကို (ဇန်နဝါရီလ ၁၃ ရက်) နေ့ ဆိုရှယ်မီဒီယာ တွင် ထုတ်ပြန်ထားပြီး ဓာတ်ပုံမှတ်တမ်းအရ (ဇန်နဝါရီလ ၁၃ ရက်) နေ့ မနက် ၁၀ နာရီ ၁၅ မိနစ်အချိန်တွင် သေဆုံးနေသည့် ဓာတ်ပုံကို PNO ဖက်မှ တဖန်ထုတ်ပြန်လာခြင်း ဖြစ်သည်။

ယခုကဲ့သို့ ပအိုဝ်းလူမျိုးအချင်းချင်း သတ်ဖြတ်မှုသည် PNO ဖက်မှ စစ်ကောင်စီအလိုကျ လိုက်လုပ်ပေးနေခြင်း ဖြစ်ပြီး စစ်ကောင်စီ၏ အကျိုးစီးပွားကို PNOက အသက်နှင့် ကာကွယ်နေခြင်းသာ ဖြစ်ကြောင်း ပအိုဝ်းလူငယ်တစ်ဦးက ပြောသည်။

“ ကိုယ့်လူမျိုး အချင်းချင်း တစ်ရက်တောင် မခြားဘဲ သတ်လိုက်တယ် ဆိုကတည်းက PNO က စစ်ကောင်စီ ရဲ့ အလိုကျ လုပ်နေတာ။ အကျိုးစီးပွားကို ပအိုဝ်းပြည်သူအသက်တွေ နဲ့ကာကွယ်နေတာ။ PNO မှာ ဦးဆောင် နေသူက ပအိုဝ်းမဟုတ်ဘူးလားဆိုတာ သံသယ ဝင်မိတယ်။ အဲလိုဆိုရင်တော့ PNO က ပအိုဝ်းအဖွဲ့အစည်းလို့ မခံယူသင့်ဘူး။” ဟု ပအိုဝ်းလူငယ် တစ်ဦးက ပြောသည်။

အဆိုပါ ကိစ္စနှင့်ပတ်သက်ပြီး PNLAဘက် ပြောရေးဆိုခွင့်ရှိသူကို သျှမ်းသံတော်ဆင့်က ဆက်သွယ်မေးမြန်း သော်လည်း မရရှိခဲ့၊ သို့သော် PNLA က ယမန်နေ့တွင် ထုတ်ပြန်ချက်တစ်စောင်ထွက်ပေါ်လာသည်။

ထိုထုတ်ပြန်ချက်တွင် PNLA တပ်ဖွဲ့သည် အာဏာရှင်စနစ်အား တိုက်ခိုက်နေသည်ဖြစ်သောကြောင့် ဖမ်းဆီးရမိသည့် စစ်သုံ့ပန်းများကို စစ်ဥပဒေအရ ထိန်းသိမ်း စောင့်ရှောက်ထားပြီး PNO ဖက်မှ စစ်သုံ့ပန်းဥပဒေနှင့်အညီ ဆောင်ရွက်ခြင်း မရှိပဲ PNLA၏ စစ်သုံ့ပန်း (၅)ဦးက ဖမ်းဆီး သတ်ဖြတ်ခဲ့ကြောင်း ဖော်ပြထားသည်။

ပအိုဝ်းလူမျိုးအချင်းချင်းသည် PNLA၏ ရန်သူမဟုတ်ကြောင်းနှင့် စစ်အာဏာရှင်စနစ်သည် သာလျှင် တစ်တိုင်းပြည်လုံး၏ ရန်သူဖြစ်ကြောင်း PNLA မှ ထုတ်ပြန်ချက်တွင် ထည့်သွင်းပြောဆိုသည်။

ထို့အပြင် ပြီးခဲ့သည့် (၂၀၂၂) ခုနှစ် စက်တင်ဘာလ ၁၄ ရက်နေ့တွင်လည်း စစ်ကောင်စီ လက်အောက်ခံ PNO ပြည်သူ့စစ်သည် ကျေးရွာသို့ အလည်ပြန်သည့် PNLA ရဲဘော်(၅) ဦးကို ဖမ်းဆီး သတ်ဖြတ်ခဲ့ဖူးကြောင်း PNLA ကအဆိုပါ ထုတ်ပြန်ချက်တွင် ဖော်ပြထားသည်။

အလုပ်သင် သတင်းထောက် နန်းလရောင် ရေးသားသည်။