ထိုင်းနိုင်ငံ၏ ခရီးသွားလုပ်ငန်းနှင့် အလုပ်အကိုင်အခွင်အလမ်းများပိုမိုမြင့်တက်လာစေရန် ထိုင်းအစိုးရမှ လောင်းကစားလုပ်ငန်းများ၊ ကာစီနိုလုပ်ငန်းများအား တရားဝင်ခွင့်ပြုမည့် ဥပဒေမူကြမ်းအား အတည်ပြုကြောင်း ထိုင်းဝန်ကြီးချုပ် ပေထုံတန်ရှင်နာဝပ်က ပြောကြားသည်။

ယမန့်နေ့ (ဇန်နဝါရီလ ၁၃) ရက်တွင် ထိုင်းဘဏ္ဍာရေးဝန်ကြီးဌာနမှအဆိုပြုထားသည့် ဖျော်ဖြေရေး အဆောက်အအုံများ ဆောက်လုပ်ခွင့်နှင့် လောင်းကစားလုပ်ငန်းများကို တရားဝင်ခွင့်ပြုပေးမည့် ဥပဒေမူကြမ်းအား အတည်ပြုကြောင်း ထိုင်းဝန်ကြီးချုပ် ပေထုံတန်ရှင်နာဝပ်က ပြောကြားခဲ့သည်။

“ကျမတို့ ဒီလုပ်ငန်းတွေအတွက် ပွင့်လင်းမြင်သာမှုကို အာမခံနိုင်မယ်ဆိုရင် ဒီလုပ်ငန်းတွေက ထိုင်းနိုင်ငံကို အကျိုးရှိစေမှာ ဖြစ်ပါတယ်၊ ဒီကိစ္စဟာ သေချာကိုင်တွယ်ရှင်းပြရမယ့် လုပ်ငန်းစဉ်အသစ်တစ်ခုဖြစ်တယ်၊ သက်ဆိုင်ရာဝန်ကြီးဌာနတွေ အားလုံးပေါင်းစည်းပြီး သေချာကိုင်တွယ်ဆောင်ရွက်သွားမှာဖြစ်ပါတယ်” ဟု ထိုင်းဝန်ကြီးချုပ်က ပြောသည်။

အဆိုပါဥပဒေမူကြမ်းသည် ခရီးသွားလုပ်ငန်းမူဝါဒများနှင့်ကိုက်ညီပြီး ထိုအထဲတွင် ကုန်တိုက်များ၊ ဟိုတယ်များ၊ အားကစားကွင်းများနှင့် ဖျော်ဖြေရေးအဆောက်အအုံများ အကောင်အထည်ဖော်သွားမည့် အကြောင်း အကျဉ်းချုပ် ဖော်ပြထားကြောင်း ဘဏ္ဍာရေးဝန်ကြီးဌာန ဒုတိယဝန်ကြီးကပြောသည်။

ယခုကဲ့သို့ စီမံကိန်းများသည် ကမ္ဘာတဝှမ်းတွင် အောင်မြင်နေသော လုပ်ငန်းများဖြစ်သည့်အပြင် ထိုင်းနိုင်ငံ၏ နိုင်ငံခြားခရီးသွားဝင်ရောက်မှု ၅ ရာခိုင်နှုန်းမှ ၁၀ ရာခိုင်နှုန်းအထိ တိုးတက်လာမည်ဟု မျှော်မှန်းထားပြီး အလုပ်အကိုင် အခွင့်အလမ်း ၉,၀၀၀ မှ ၁၅,၀၀၀ အထိဖန်တီးပေးနိုင်မည်ဖြစ်ကြောင်းလည်း ၎င်းကဆက်ပြောထားသည်။

ထိုသို့ ထိုင်းအစိုးရမှ ဥပဒေမူကြမ်းအတည်ပြုပြီးနောက် လောင်းကစားဆန့်ကျင်ရေးအဖွဲ့အစည်းများမှ ကလေးများနှင့် မိသားစုများအပေါ်သက်ရောက်လာနိုင်မည့် အကျိုးဆက်များအား သေချာစွာချိန်ဆ ကိုင်တွယ်ရန်အတွက် ကြေညာချက်တစောင်ထုတ်ပြန်ခဲ့သည်။
အတိုက်အခံပါတီမှ အမတ်များနှင့် အစိုးရအကြံပေးအချို့မှလည်း ယခုဥပဒေမူကြမ်းခွင့်ပြုပေးမည့်အပေါ် ပြည်သူများ လောင်းကစားအပေါ်စွဲလမ်းလာနိုင်ခြင်း၊ ငွေကြေးလိမ်လည်မှုများဖြစ်ပေါ်လာမည့် အန္တရာယ်ရှိလာနိုင်ကြောင်း သတိပေးပြောဆိုထားသည်။

ထိုင်းနိုင်ငံသည် နိုင်ငံဖြတ်ကျော်ရာဇဝတ်မှုများအတွက် ကူးပြောင်းဖြတ်သန်းရာနေရာတစ်ခုဖြစ်နေပြီး မြန်မာအပါအဝင် အိမ်နီးချင်းနိုင်ငံများသို့ လူကုန်ကူးခံရပြီး အွန်လိုင်းငွေလိမ်လုပ်ငန်းများလုပ်ကိုင်ရန် စေခိုင်းခံရသည့် နိုင်ငံပေါင်း ၂၀ ကျော်မှ နစ်နာသူ ၆,၀၀၀ ကျော်ရှိခဲ့ကြောင်းလည်း အတိုက်အခံပါတီအမတ်တစ်ဦးက ထောက်ပြပြောဆိုထားသည်။

အလုပ်သင် သတင်းထောက် ယူဂျင်း ရေးသားသည်။