သျှမ်းပြည် တောင်ပိုင်း ကျေးသီးမြို့နယ်အတွင်း ကျောက်မီးသွေး အလွန်အကျွံ တူးဖော်မှုကြောင့် ကလေးငယ်များ အရေးပြားရောဂါ စတင်ဖြစ်ပွားလာကြောင်း စုံစမ်းသိရသည်။
ကျေးသီးမြို့နယ် ကျောက်မီးသွေးအလွန်အကျွံတူးဖော်မှုကြောင့် သစ်တောများပြုန်းတီးကာ ပတ်ဝန်းကျင်ညစ်ညမ်းခြင်း၊ ရေသန့်ရှင်းမှုမရှိခြင်းတို့ကြောင်း ကလေးငယ်များ အရေးပြားရောဂါ၊ ယားယံရောဂါများ စတင်ဖြစ်လာကြောင်း ကျေးလက်ကျန်းမာရေး ဆရာမ တစ်ဉီးက သျှမ်းသံတော်ဆင့် ကိုပြောသည်။
“ ကျေးသီးဘက်မှာက ကျောက်မီးသွေးတွေ အရမ်းတူကြတယ်။ ဒီကျောက်မီးသွေးတူးဖို့ သစ်တောတွေကလည်း ခုတ်ရတယ်။ နောက်လေထုကလည်း မသန့်တော့ဘူး ။ မိုးရွာရင် တောင်ကျရေတွေကလည်း ကြီးတယ်။ ရေညစ်ညမ်းတယ်။ ဒီမှာ ကလေးအများစုက ဝမ်းလျော၊ဝမ်းပျက် အရေးပြားပြဿနာတွေ ခံစားနေရတယ်” ဟု ကျေးလက်ကျန်းမာရေး ဆရာမ ကဆိုသည်။
ထို့ပြင် လက်ရှိ ကျောက်မီးသွေးတူးဖော်မှုကြောင့် ကျေးသီးမြို့နယ်အတွင်း လယ်ယာများအတွက် အဓိက အရေးပါသည့် နမ့်ဟင်ချောင်း (မႄႈၼမ့်ႁႅၼ်) ကို ထိခိုက်နိုင်ပြီး လယ်ယာ စိုက်ပျိုးရေး လုပ်ငန်းများလည်း ထိခိုက်လာနိုင်ကြောင်း ဒေသခံများက ပြောဆို သုံးသပ်နေကြသည်။
အလားတူ ကာလိမြို့ လွိုင်ဆိုင်ကျေးရွာ တကြောတွင်လည်း ပြီးခဲ့သည့် ၃နှစ်၌ ကျောက်မီးသွေး တူးဖော်ရေးလုပ်ငန်းကို အဓိက လုပ်ကိုင်ခဲ့ပြီး လက်ရှိမှာ ၎င်းလုပ်ငန်းရပ်နားထားကာ သံလွင်မြစ်(မႄႈၼမ်ႉၶူင်း) မြစ်အနီးက ရွှေတူးဖော်ရေးလုပ်ငန်းကို ပိုမိုလုပ်ကိုင်လာနေကြောင်း ကာလိဒေသအမျိုးသားတစ်ဦးက ပြောသည်။
ထိုဒေသအတွင်းနေထိုင်သူများသည် ကျောက်မီးသွေးတူးဖော်သည့်ဒဏ် သစ်တောပြုန်တီးမှုဒဏ်များကြောင့် ရေညစ်ညမ်းမှု ပြဿနာကို ကလေးများက ပိုကြုံတွေ့နေရသည် ဟု ကျေးလက်ဆရာမတစ်ဉီးက ပြောသည်။
“ ကာလိမှာ အရင်က ကျောက်မီးသွေးတူးတဲ့ကိစ္စ၊ အခု ရွှေတူးဖော်တဲ့ကိစ္စတွေကြောင့် ရေတွေညစ်ညမ်းမှု စဖြစ်လာတယ်။ ရွာမှာဆိုရင် ရေတွေက ရှားလာတယ်။ ရှိတဲ့ရေကလည်း သန့်ရှင်းမှုမရှိဘူး။ အခုကလေးတွေက ကျန်းမာရေး ပြဿနာ ကြုံနေရတယ်” ဟု ၎င်းက ဆိုသည်။
အဆိုပါ ကာလိမြို့ နှင့် ကွန်ဟိန်းမြို့နယ်အတွင်းရှိ ကျေးရွာများကို မည်သည့်အစိုးရမှ ကွင်းဆင်း အသိပညာပေးခြင်း မရှိကြောင်း၊ ကလေးများ၏ ကျန်းမာရေးကိုလည်း ကိုယ်ထူကိုယ်ထ ကုသနေရကြောင်းလည်း ကျေးလက်ကျန်းမာရေး ဆရာမက ထပ်လောင်းပြောသည်။
လက်ရှိ ကျောက်မီးသွေးတူးဖော်ခြင်း ရွှေတူးဖော်နေသည့် ကျေးသီးမြို့နယ်၊ ကာလိမြို့နယ်နှင့် ကွန်ဟိန်းမြို့နယ် အတွင်း ရှမ်းပြည်တိုးတက်ရေးပါတီ၊ ရှမ်းပြည်တပ်မတော် ( SSPP/SSA) နှင့် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) တို့ လှုပ်ရှားနေသည့် နယ်မြေများဖြစ်သည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments