သျှမ်းပြည်တောင်ပိုင်း၊ ဆီဆိုင်မြို့နယ်တွင် စစ်ကောင်စီလက်အောက်ခံ ပအိုဝ်းပြည်သူ့စစ် (PNO) လက်လွတ်ထားရသည့် နယ်မြေကို ပြန်လည် ထိန်းချုပ်လိုက်ကြောင်း စုံစမ်းသိရှိရသည်။

ပြီးခဲ့သည့် (ဇန်နဝါရီလ ၁၂ ရက်) ညနေပိုင်းတွင် PNOမှ လက်လွှတ်ထားရသည့် ဆီဆိုင်မြို့နယ် ထီဆုံကျေးရွာအတွင်း ပအိုဝ်းအမျိုးသားလွတ်မြောက်ရေးတပ်မတော်(PNLA) တပ်စွဲရာနေရာကို ၎င်းက ဝင်ရောက်တိုက်ခိုက်ခဲ့ကြောင်း PNO အရာရှိတစ်ဦးက သျှမ်းသံတော်ဆင့်ကို ပြောသည်။

ထိုသို့ တိုက်ခိုက်ခဲ့ရာ PNLAဖက်မှ တပ်သား( ၇)ဦးသေဆုံးပြီး (၅)ဦး ဖမ်းဆီးခံရသည်ဟု PNO အရာရှိတစ်ဦးက ထပ်လောင်းပြောသည်။

“PNLAက တပ်စခန်းမဟုတ်ဘူး။ ဟိုအရင် ဆီဆိုင်တိုက်ပွဲကတည်းက အဲဒီရွာက လူမနေတော့ဘူးလေ။ PNLAက ခြေကုတ်ယူထားတာ။သူတို့ရှိနေတော့ ပြည်သူတွေ ရွာမပြန်ရဲကြတော့ဘူးလေ။အခုတော့ သူတို့ကို ရှင်းလိုက်ပြီ။ကျနော်တို့ တပ်တွေတော့ အဲဒီရွာမှာ ချထားလိုက်ပြီ။ကျနော်တို့ဖက်ကတော့ ကျဆုံးမှုမရှိဘူး။” ဟု အဆိုပါ PNOအရာရှိ တစ်ဦးက သျှမ်းသံတော်ဆင့်ကို ပြောသည်။

ယခုကဲ့သို့ PNLAတပ်များ ကျေးရွာတွင်း တပ်စွဲထားမှုကို ဒေသခံများက ကြိုက်မည်မဟုတ်ကြောင်းနှင့် အကယ်၍ တပ်စွဲထားချင်လျှင် ကျေးရွာအပြင်ဘက်တွင်သာ PNLA ကို တပ်စွဲထားစေလိုကြောင်း ၎င်း PNO အရာရှိတစ်ဦးက ထပ်ဆင့်ပြောသည်။

ထို့အပြင် PNOဘက်မှ စစ်ရေးအရ ရှေ့ဆက်တိုးရန် ရှိသည်ဟုလည်း ဗိုလ်မှူးသန်းကြွယ်မှ သျှမ်းသံတော်ဆင့်ကို ပြောသည်။

ပအိုဝ်းလက်နက်ကိုင် အချင်းချင်း စည်းလုံးမှု ရှိစေလိုကြောင်းနှင့် ယခင်ကကဲ့သို့ နယ်မြေအကန့်သတ်ဖြင့် ငြိမ်းချမ်းစွာ ပြန်လည်အုပ်ချုပ်စေလိုကြောင်း ဆီဆိုင် စစ်ရှောင်အမျိုးသမီးတစ်ဦးက ပြောသည်။

“ပအိုဝ်းလက်ကိုင် အချင်းချင်း စည်းလုံးစေချင်တယ်။ အရင်ကလိုပဲ နယ်မြေသတ်မှတ်ပြီး အေးအေးချမ်းချမ်းနဲ့ အုပ်ချုပ်စေချင်တယ်။ဆီဆိုင်က ပြန်ပြီး စစ်ဖြစ်လာမဲ့ အနေအထားရှိတယ်။ ပထမ တစ်ခါပြေးရတာတောင် အခုအိမ်မပြန်နိုင်သေးဘူး။ ဒုတိယတစ်ခါ ပြည်သူတွေ ထပ်ပြေးရရင်တော့ မလွယ်ဘူး။” ဟု ဆီဆိုင်ဒေသ စစ်ရှောင် အမျိုးသမီးတစ်ဦးက ပြောသည်။

ယခုဖြစ်စဉ်နှင့်ပတ်သက်ပြီး PNLAကို ဆက်သွယ်မေးမြန်းရာ ပြန်လည်ဖြေကြားချင်း မရှိသေးပေ။

ယခုလက်ရှိ ဆီဆိုင်မြို့တွင် စစ်ကောင်စီ၊ ပအိုဝ်းပြည်သူ့စစ် (PNO)တပ်များက ဝင်ရောက်တပ်စွဲထားပြီး ပြီးခဲ့သည့် (ဇန်နဝါရီလ ၉ရက်) နေ့တွင် စစ်ကောင်စီနှင့် PNOတပ်စခန်းကို ကရင်နီတော်လှန်ရေးတပ်ပေါင်းစုမှ ဝင်ရောက်တိုက်ခိုက်သိမ်းပိုက်ခဲ့သည်။

စစ်ကောင်စီ၊ PNO နှင့် PNLAနှင့် ပူးပေါင်းတပ်ဖွဲ့တို့က ယမန်နှစ်(၂၀၂၄ ခုနှစ် ဇန်နဝါရီလ ၂၅ ရက်) နေ့တွင် ဆီဆိုင်မြို့တွင် စတင်တိုက်ပွဲဖြစ်ပွားခဲ့ပြီး ဆီဆိုင်ဒေသခံအများပြား စစ်ရှောင်ခဲ့ရပြီး ယနေ့အချိန်ထိ အိမ်မပြန်နိုင်သေးသည့် စစ်ရှောင်များလည်း ရှိနေသည်။

အလုပ်သင် သတင်းထောက် နန်းလရောင် ရေးသားသည်။