သျှမ်ပြည် မိုင်းနောင်မြို့အနီးတွင် ယနေ့ (ဇန်နဝါရီ ၁၀ရက် ) နံနက် ၂နာရီဝန်းကျင်တွင် ဗုံးပေါက်ကွဲမှုကြောင့် စစ်ကောင်စီက လမ်းများကို ပိတ်ထားကြောင်း စုံစမ်းသိရသည်။
ယနေ့ ( ဇန်နဝါရီလ ၁၀ ရက် ) နံနက် ၂ နာရီဝန်းကျင် ကျေးသီးမြို့နှင့် မိုင်းနောင်မြို့ကြားရှိ မိုင်းနန်းကျေးရွာ အနီးတွင် ဗုံးပေါက်ကွဲမှုကြောင့် ထိုရွာရှိစစ်ကောင်စီ စစ်ဆေးရေးဂိတ်က ယနေ့ မနက်ပိုင်းတွင် လမ်းများကို ပိတ်ထားကြောင်း ကျေးသီးမြို့ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
“မနေ့က နေ့လည်ကော ဒီနေ့ မနက်ကော ဗုံးတွေကွဲလို့ စစ်ကောင်စီက သူတို့လူကြီးတွေနဲ့ အစည်းဝေး လုပ်နေတယ် ပြောပြီး ဒီမနက်ကပဲ ပေးမဖြတ်တာ။ကျနော်တို့က ကျေးသီးကနေ လဲချားကိုသွားတာက သွားလို့ရတယ်။ လဲချားကနေ ကျေးသီးကို သွားရင်သွားလို့မရတာ။”ဟု ကျေးသီးမြို့ ဒေသခံအမျိုးသား တစ်ဦးကပြောသည်။
ထို မိုင်းနန်းကျေးရွာရှိ စစ်ကောင်စီ စစ်ဆေးရေးဂိတ်က ကျေးသီးသို့သွားမည့်ကားများကို ပေးမဖြတ်သည့် အတွက်ကြောင့် ၎င်းကျေးရွာတွင် ဘုရားဖူးယာဉ်နှင့် ခရီးသည်ယာဉ်များ ပိတ်မိနေကြောင်း ကျေးသီးမြို့ ဒေသခံအမျိုးသားတစ်ဦးက ဆိုသည်။
“ဒီနေ့ မနက် ကျနော်တို့ ကျေးသီး ကနေ လဲချားကိုလာတုန်းကတော့ အဲ့ရွာမှာဘုရားဖူးကားတွေ နဲ့ ခရီးသွားကားတွေ လမ်းဘေးမှာ အစီး ၂၀ ၊ ၃၀ လောက်က ကွင်းပြင်ထဲမှာ ထိုးရပ်ထားတာ။ ပိတ်တာက ရွာထဲမှာကို ပိတ်ထားတာ။ မိုင်းဖုန်းကတွေပြန်လာတဲ့ ကားတွေက စပိတ်မိနေတာပေါ့”ဟု ၎င်းက ပြောသည်။
ထို့ပြင် ကျေးသီးမြို့အနီး စစ်ကောင်စီ၏ ကောင်းလန်း စစ်ဆေးရေးဂိတ်တွင် ထောက်ခံစာများ နှင့် ကုန်ပစ္စည်းများကို စစ်ဆေးမှု ကြမ်းတမ်းနေပြီး၊ တားမြစ်ထားသည့် ကုန်ပစ္စည်းများတင်လာသည့် အချို့ကားများကို ပြန်လှည့်ခိုင်းနေကြောင်း သိရသည်။
“အဲ့ဘက်မှာကတော့ သူတို့ မြောက်ပိုင်းဘက်ကို ကုန်ပစ္စည်းတွေ သယ်ဖို့တားမြစ်ကတည်းက ဖြစ်နေတာ။ သူတို့က စက်သုံးဆီနဲ့ ကုန်ပစ္စည်းတချို့တွေကို လုံးဝပေးမဖြတ်တာ ပြီးတော့ ပြန်လှည့်ခိုင်းတာပေါ့။ မြောက်ပိုင်းနဲ့ တောင်းပိုင်း ကိုသွားတဲ့ ကောင်းလန်းတံတားမှာပါ။”ဟု ကျေးသီးမြို့ ဒေသခံအမျိုးသားတစ်ဦးက ပြောသည်။
စစ်ကောင်စီတပ်သည် ညီနောင်မဟာမိတ်ထပ်များထံ ဆုံးရှုံးထားသည့် သျှမ်းပြည်မြောက်ပိုင်းရှိ မြို့ကြီးများကို ဆက်တိုက်ဗုံးကြဲ တိုက်ခိုက်နေသည့်အပြင် ယခုကဲ့သို့ လမ်းပိတ်ဆို့ခြင်းဖြင့် ဒေသနေ ပြည်သူများကို စားနပ်ရိက္ခာ ဖြတ်တောက်နေခြင်းဖြစ်သည်။
မိုင်းနောင်မြို့နှင့် ကျေးသီးမြို့တို့တွင် ရှမ်းပြည်တိုးတက်ရေးပါတီ-ရှမ်းပြည်တပ်မတော် (SSPP/SSA) တပ်နှင့် စစ်ကောင်စီတို့သာ သွားလာလှုပ်ရှားကြောင်း သိရသည်။
Leave a Comments