သျှမ်းပြည်တောင်ပိုင်း ကျေးသီးမြို့နယ်တွင် တရုတ်ကုန်ပစ္စည်းများ သယ်ဆောင်လာသည့် ကားများကို စစ်ကော်မရှင်တပ် စစ်ဆေးရေးဂိတ်များတွင် စစ်ဆေးတင်းကြပ်မှုကြောင့် ကုန်စျေးနှုန်း အဆမတန် မြင့်တက်လာကြောင်း သတင်းရရှိသည်။
ယခု ဖေဖော်ဝါရီ လဆန်းပိုင်းမှစပြီး ကျေးသီးမြို့နယ်ရှိ စစ်ကော်မရှင်တပ် စစ်ဆေးရေးဂိတ်တွင် မြန်မာ-တရုတ် နယ်စပ်ရှိ ညီနောင်မဟာမိတ်ထိန်းချုပ် နယ်စပ်ဂိတ်များမှ ဖြတ်သန်းတင်သွင်းလာသည့် တရုတ်ကုန်ပစ္စည်းများကို စစ်ဆေးတင်းကြပ်နေကြောင်း ကျေးသီးမြို့နယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“အဲ့တရုတ်ဘက်ကလာတဲ့ ကုန်တွေကို စစ်တာပါ။ ကျေးသီး၊ မိုင်းရယ်ဘက်ကို တရုတ်ကုန်ပစ္စည်းတွေက စစ်ဆေးတာ ပေးတောင် မဖြတ်ဘူး။ ကားတွေကို ပြန်လှည့်ခိုင်းတာ ရှိတယ်။ ပုံမှန်ဆို ကျေးသီးဂိတ်မှာ မစစ်ဘူး၊ ဒီလလောက်မှ စပြီး စစ်နေတာ။ အဓိကတော့ ဂျူတီကြေး ဆောင်လား မဆောင်ဘူးလား ဆိုတာကို စစ်တာ”ဟု ကျေးသီးမြို့နယ် ဒေသခံအမျိုးသားတစ်ဦးက ပြောသည်။
အဆိုပါ စစ်ကော်မရှင်တပ် စစ်ဆေးရေးဂိတ်များမှ စစ်ဆေးတင်းကြပ်မှုကြောင့် မြန်မာ-တရုတ်နယ်စပ်ဂိတ်မှ တင်သွင်းလာသည့် အဝတ်အထည်နှင့် စားသောက်ကုန်ပစ္စည်းအချို့ ဈေးနှုန်း အဆမတန် မြင့်တက်လာသည့်အပြင် သယ်ယူမှု ခက်ခဲခြင်းကြောင့် တင်ပို့ခလည်း မြင့်တက်လာကြောင်း မိုင်းရှူးမြို့နယ် အထည်ဆိုင်ပိုင်ရှင် အမျိုးသမီးတစ်ဦးက ထပ်မံလောင်းပြောသည်။
“အဝတ်အထည်တွေတော့ အရင်ထက် ဈေးနှုန်း ၃ ထောင်ကနေ ၅ ထောင်ဝန်းကျင်ထိ တက်တယ်။ ပစ္စည်းပို့ခက အရင်တုန်းက ပစ္စည်းတစ်ထုတ်ကို ၅ သောင်းလောက်ပဲ ပေးရတာ။ ခုက ပို့ခ ၁ သိန်းဝန်းကျင်ထိ ပေးရတယ်။ စားသောက်ကုန်တွေလည်း ပုံမှန်တော့ ဝင်နေပေမဲ့ ဈေးနှုန်းတော့ တက်လောက်မယ် ထင်တယ်”ဟု မိုင်းရှူးမြို့နယ် အထည်ဆိုင်ပိုင်ရှင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
သျှမ်းပြည် မြောက်ပိုင်းမှ တောင်ပိုင်းသို့ တင်သွင်းနေသည့် တရုတ်ကုန်ပစ္စည်းအများစုကို ကားသမားများက ကွင်းလမ်းမှတဆင့် တင်ဆောင်သွားလာ နေရခြင်းကြောင့် အချိန် ကြန့်ကြာမှုများ ရှိသည့်အပြင် အခက်အခဲများလည်း ကြုံတွေ့ကြရကြောင်း ၎င်းအမျိုးသမီးက ဆက်ပြောသည်။
“ကားသမားတွေက ကွင်းလမ်းကနေ လာကြတာ။ ပုံမှန်တစ်ရက်နဲ့ ရောက်တဲ့ ပစ္စည်းဆိုရင် အခုက ၂ ရက်လောက် ကြာတယ်၊ တစ်ညကတော့ ဘယ်မှာ အိပ်ကြလည်းဆိုတာ မသိဘူး။ အကုန်လုံးက မိသားစုအတွက် ကျွေးဖို့ဆိုတော့ အကုန်လုံးက အခက်အခဲနဲ့ ရှာစားလုပ်စားကြရမှာပဲလေ”ဟု မိုင်းရှူးမြို့နယ် အထည်ဆိုင်ပိုင်ရှင် အဆိုပါအမျိုးသမီးက ထပ်လောင်းပြောသည်။
လက်ရှိအခြေအနေအရ စစ်ကော်မရှင်တပ်သည် နိုင်ငံခြားမှ တင်သွင်းသည့် ကုန်ပစ္စည်းအမျိုးမျိုးကို အခွန်မဆောင်သော ကုန်ပစ္စည်းများအဖြစ် ဖမ်းဆီးပိတ်ပင်ခြင်းကြောင့် မြန်မာနိုင်ငံ၏ ကုန်စျေးနှုန်းများသည် တစ်နေ့ထက်တစ်နေ့ ပိုမြင့်တက်လာနေကြောင်း အိမ်ရှင်မများထံမှ သိရသည်။
ပြီးခဲ့သည့် ဇန်နဝါရီ ၁၃ ရက်တွင် စစ်ကော်မရှင် ဖွဲ့စည်းထားသော မူဆယ်ခရိုင်/မြို့နယ် တရားမဝင်ကုန်ပစ္စည်းများ တားဆီးရေးအဖွဲ့က နယ်စပ်ကုန်သည်များကို ခေါ်ယူပြီး အစည်းအဝေး ပြုလုပ်ခဲ့သည်။
အဆိုပါအစည်းအဝေးတွင် လက်နက်ကိုင်တပ်ဖွဲ့များထံ အခွန်ဝင်ငွေ မစီးဆင်းရန်နှင့် စစ်ကော်မရှင်ထံ အခွန်မဆောင်ထားသည့် ကုန်ပစ္စည်းများအားလုံးကို ဖမ်းဆီးရန် ပြောဆိုခဲ့ကြောင်း နယ်စပ်ကုန်သည်များထံမှ သိရသည်။
အလားတူ ဖေဖော်ဝါရီလ ပထမပတ်အတွင်း သျှမ်းပြည်မြောက်ပိုင်းရှိ တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နယ်မြေများထဲ ဖြတ်သန်းသယ်ဆောင်လာသည့် တရုတ်ကုန်ပစ္စည်းများကို ကျောက်မဲမြို့အဝင်တွင် စစ်ကော်မရှင်ဘက်မှ ကုန်ကားများ ဖမ်းဆီးမှုများ ရှိနေကြောင်း ဒေသခံများက ပြောသည်။
Leave a Comments