သျှမ်းပြည်တောင်ပိုင်း တောင်ကြီးမြို့နယ် အေးသာယာ-စက်မှုဇုန်အတွင်း ဝယ်ယူပြီးသားမြေကွက်များကို မကျူးကျော်ရစာများလာကပ်သွားပြီး ခြံစည်ရိုးများခတ်ကာ ပြန်လည်သိမ်းဆည်းမှုများရှိနေသောကြောင့် မြေဝယ်ယူရာတွင် သတိထားရန်လိုအပ်ကြောင်း ဒေသခံများထံမှ သတင်းရရှိသည်။
ဇန်နဝါရီလ ပထမပတ်တွင် အေးသာယာ-စက်မှုဇုန်အတွင်း ပြည်သူများဝယ်ယူထားသော မြေကွက်များအား ခြံစည်းရိုးခတ်ကာ မကျူးကျော်ရန် စာလာကပ်သွားကြောင်း ထိုသို့ခြံစည်းရိုးခတ်သွားသည့်အကြောင်းအရင်းကိုလည်း မသိရှိရကြောင်း မြေဝယ်ယူထားသူ အချို့က သျှမ်းသံတော်ဆင့်သို့ပြောသည်။
“ဝယ်ထားတာက ၅ နှစ်ရှိပြီ၊ စာချုပ်နဲ့ဝယ်ထားတာ၊ ခုက ခြံစည်းခတ်ပြီး ရေးသွားတာက ပိုင်ရှင်ရှိသည် မကျူးကျော်ရတဲ့၊ စာချုပ်ချုပ်ပေးတဲ့ ရှေ့နေ့အမကြီးက တပ်ကသိမ်းသွားပြီးလား မသိဘူးဆိုပြီး အဖြေအတိအကျမသိဘူးတဲ့” ဟု မြေဝယ်ထားသည့် အေးသာယာမြို့ခံတစ်ဦးက သျှမ်းသံတော်ဆင့်သို့ပြောသည်။
ထိုသို့ အကြောင်းအရင်းအတိအကျမသိရပဲ ခြံစည်းရိုးခတ်ခံရခြင်းခံရသည့်မြေအား ဝယ်ယူထားမိသူ ပိုင်ရှင် ၂၀ ခန့်ဦးရှိကြောင်းလည်း သိရသည်။
“ခန့်မှန်းချေ အိမ်ခြေ ၂၀ လောက်ရှိတယ်၊ စာချုပ်ချုပ်တုန်းက ရှေ့နေကတော့ စုံစမ်းပေးမယ်ပြောပေမယ့် ၁ ပတ်ကျော်ပြီ ဘာမှမသိရသေးဘူးတဲ့၊ ကုမ္ပဏီတစ်ခုက ဝယ်သွားတယ်လို့လည်း ကြားတယ်” ဟု ၎င်းကဆက်ပြောသည်။
ထိုသို့ အသိမ်းခံရသည့်ကိစ္စအား အသေးစိတ်သိရှိရန် သျှမ်းသံတော်ဆင့်မှ စုံစမ်းနေဆဲဖြစ်သည်။
သျှမ်းပြည်တောင်ပိုင်း တောင်ကြီးမြို့နယ်နှင့် အနီးတဝိုက်မြို့နယ်များသည် သျှမ်းမြောက်ကဲ့သို့ စစ်ရေးအခြေအနေမပြင်းထန်သည့်အတွက် အခြားဒေသမှ စစ်ဘေးရှောင်လာသော စစ်ရှောင်များမှာ မိမိတို့တတ်နိုင်သည့်အခြေအနေပေါ်မူတည်၍ နေအိမ်၊ခြံကွက်များဝယ်ယူမှုများလည်းရှိနေသည်။
အချို့နေရာများတွင် မြေပွဲစားများမှ မြေအမျိုးအစားများကို သေချာရှင်းပြခြင်းမရှိသောကြောင့် ဝယ်ယူပြီးနောက်မှ ပြန်လည်အသိမ်းခံရသည့် ကိစ္စများလည်း ဖြစ်ပွားလျက်ရှိနေသည်။
ထိုကြောင့် ပြည်သူများအနေဖြင့် နေအိမ်၊ ခြံကွက်များဝယ်ယူရာတွင် မြေအမျိုးအစားအား သေချာလေ့လာစုံစမ်း၍ ခိုင်မာသော စာရွက်စာတန်းများရှိမှ ဝယ်ယူသင့်ကြောင်း မြေယာဥပဒေများအကြောင်း နားလည်သည့် ရှေ့နေတစ်ဦးက အကြံပြုသည်။
ပြီးခဲ့သည့် ၂၀၂၃ ခုနှစ်ကလည်း တောင်ကြီးမြို့နယ် ပေါမူကျေးရွာတွင် ပအိုဝ်းပြည်သူ့စစ် (PNO)က ပြည်သူပိုင်မြေများကို အဓမ္မသိမ်းယူပြီး အကွက်ရိုက်ကာ ပြန်လည်ရောင်းချမှုများလည်းရှိခဲ့ကြောင်းသိရသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments