သျှမ်းပြည် နမ့်စန်မြို့နယ် နောင်ဟီးကျေးရွာအုပ်စုရှိ ကျောက်မီးသွေးတွင်းများမှ အခွန်ကောက်ခံရန် သျှမ်းတပ်နှစ်တပ်အချင်းချင်းကြား တိုက်ပွဲဖြစ်ပွားခဲ့ကြောင်း စုံစမ်းသိရသည်။

ဇန်နဝါရီလ ပထမပတ်အတွင်း နမ့်စန်မြို့နယ် နောင်ဟီးကျေးရွာအုပ်စု နမ့်မိုကျေးရွာအနီးတွင် SSPP နှင့် RCSS တပ်ဖွဲ့တို့ ဒရုန်းဖြင့် အပြန်အလှန် ဗုံးကြဲတိုက်ခိုက်ခဲ့ရာ အနီးပတ်ဝန်းကျင် ကျေးရွာများရှိ အိမ်ခြေ (၂၀၀) ကျော်မှ စစ်ဘေးရှောင်များသည် နမ့်စန်မြို့ပေါ် နီးစပ်ရာဆွေမျိုးနှင့် ဘုန်းကြီးကျောင်းသို့ ထွက်ပြေးတိမ်းရှောင်နေရကြောင်း ဒေသခံများက ပြောသည်။

“အစောပိုင်းမှာ RCSS က ဒရုန်းနဲ့ အရင် ဗုံးသွားချတယ်။ ညရောက်လာတော့ ဟိုဘက်က ဒရုန်းနဲ့ ဗုံးပြန်ချတယ်။ အိမ်နောက်က ချောင်းနားမှာ ကျတာ အသံအကျယ်ကြီးပဲ အိမ်တောင်မှ တုန်တယ်။ ညနေ (၅) နာရီလောက်က စပစ်တာ ညသန်းခေါင်ထိပဲ။ တိုက်ပွဲဖြစ်တာတော့ ကြာပြီ၊ အရင်ညက ပိုပြီးမှ ပြင်းလာတာ။ ရွာမှာက ကျောက်မီးသွေးလည်း တူးတော့ အခွန်ကောက်ဖို့ နယ်မြေလုတဲ့ပုံစံဖြစ်တာ”ဟု အသက် (၄၀) ကျော်အရွယ် နမ့်စန်ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

နမ့်စန်မြို့နယ်ရှိ ကျောက်မီးသွေးတွင်းများမှ အခွန်ကောက်ခံရန် ဇန်နဝါရီလ (၄) ရက်က ဖြစ်ပွားခဲ့သည့် သျှမ်းတပ်နှစ်တပ်အချင်းချင်းကြား တိုက်ပွဲများနှင့် ပတ်သက်၍ နှစ်ဘက်တပ်ဖွဲ့မှ သတင်းထုတ်ပြန်ထားခြင်း မရှိဘဲ နှစ်ဘက်တပ်ဖွဲ့ ပြောရေးဆိုခွင့်ရှိသူများထံ စုံစမ်းမေးမြန်းနိုင်ရန် သျှမ်းသံတော်ဆင့်မှ ဖုန်းဖြင့် ဆက်သွယ်ခဲ့သော်လည်း အဆက်အသွယ် မရရှိခဲ့ပေ။

သျှမ်းတပ်နှစ်တပ် တိုက်ပွဲဖြစ်ပွားနေသည့် နောင်ဟီးကျေးရွာအုပ်စုတွင် ယခင်က RCSS တပ်ဖွဲ့ အခြေစိုက်လှုပ်ရှားနေပြီး SSPP တပ်ဖွဲ့ကလည်း ၎င်းကျေးရွာအုပ်စုအနီးနှင့် လဲချားမြို့နယ် အရှေ့ဘက်မှ တောင်ဘက်အထိ အင်အားဖြည့်တင်းကာ သွားလာလှုပ်ရှားနေကြောင်း ဒေသခံများက ပြောသည်။

“အစိမ်း(SSPP)နဲ့ အကြား(RCSS) ပစ်တာ အဲ့လိုဖြစ်နေတာ ၃ နှစ်ကျော် ရှိပြီ။ အရင်ကတည်းက သူ့နေရာ ကိုယ့်နေရာ နေပြီးတော့ နီးနီးကပ်ကပ် ရှိနေတာ၊ အခုမှ ပစ်ကြတာမဟုတ်ဘူး၊ ဟိုးအရင်ကတည်းက ပစ်ကြတယ်။ တိုက်ပွဲစိပ်လာတာ မနှစ်က စတယ် နမ့်မိုမှာ။ ဖြစ်တာတော့ ကြာပြီ၊ အခုက ပိုရှုပ်နေတာ”ဟု နမ့်စန်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

စစ်အာဏာသိမ်းပြီးနောက် နမ့်စန်မြို့နယ်အတွင်း ဖြစ်ပွားခဲ့သည့် သျှမ်းတပ်နှစ်တပ် တိုက်ပွဲများကြောင့် နောင်ဟီးကျေးရွာအုပ်စုမှ ဟိုခို၊ ကွန်ဆဲ၊ ဝမ်ပန်၊ နမ့်အုတ်ကျေးရွာတို့တွင် နေထိုင်သူများသည် နမ့်စန်မြို့ပေါ်နှင့် ထိုင်းနိုင်ငံအထိ ထွက်ပြေးတိမ်းရှောင်သွားကြကြောင်း စစ်ဘေးရှောင် အမျိုးသမီးတစ်ဦးက ပြောဆိုသည်။

အလားတူ နောင်ဟီးကျေးရွာအုပ်စုနေ ယင်းနက်၊ ယင်းကျားလူမျိုးများလည်း ကွန်လမ်းနှင့် နမ့်မော်ခေါက်ဆင့် ကျေးရွာဘက်သို့ စစ်ဘေးရှောင်နေကြရပြီး လတ်တလော တိုက်ပွဲများကြောင့် ပဲစင်းငုံနှင့် ခြံထွက်သီးနှံများ ရိတ်သိမ်းရန် အခက်အခဲ ကြုံတွေ့နေရကြောင်း ဒေသခံများထံမှ သိရသည်။

အဆိုပါ တိုက်ပွဲနှင့်ပတ်သက်ပြီး သျှမ်းတပ်နှစ်တပ်၏ ပြောရေးဆိုခွင့်များကို အကြိမ်ကြိမ်ဆက်သွယ်တော့လည်း မရရှိခဲ့ပေ။

နမ့်စန်မြို့နှင့် (၁၃) မိုင်ခန့် အကွာအဝေး၌ တည်ရှိနေသည့် နောင်ဟီးကျေးရွာအုပ်စုတွင် စစ်ကောင်စီလက်အောက်ခံ သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာနမှ ၂၀၂၁ ခုနှစ် နိုဝင်ဘာလတွင် ခွင့်ပြုထားပြီး ဧက (၅၀၀) ကျော် ကျယ်ဝန်းသည့် ကျောက်မီးသွေးတွင်း (၅) ခုထက်မနည်း တည်ရှိကာ နားယိုင်းပြည်သူ့စစ်အဖွဲ့များလည်း ပါဝင်တူးဖော်နေကြောင်း ဆိုသည်။

ပြီးခဲ့သည့် ဒီဇင်ဘာလ နောက်ဆုံးပတ်ကလည်း ရပ်စောက်မြို့နယ် အင်တောမြို့အနီး (၃) နေရာတွင် SSPP နှင့် RCSS တပ်ဖွဲ့တို့ နှစ်ရက်ဆက်တိုက် ထိတွေ့တိုက်ပွဲ ပြင်းထန်ခဲ့ပြီး နှစ်ဘက်တပ်ဖွဲ့ ထိခိုက်မှုများကြောင်း အင်တောမြို့ဒေသခံများက ပြောသည်။