ကချင်ပြည်၊ မံစီမြို့ ကချင်လွတ်လပ်ရေး တပ်မတော်(KIA) ပူးပေါင်းတပ်များ ထိုးစစ်ဆင် တိုက်ခိုက်နေရာ ယနေ့ (ဇန်နီဝါရီလ ၈ ရက်) နံနက်ပိုင်းတွင် အပြီးသတ် တိုက်ခိုက် သိမ်းပိုက်နိုင်ခဲ့ပြီဟု စစ်ရေးသတင်းရင်းမြစ်က ပြောသည်။
မံစီမြို့နယ်ရှိ စစ်ကောင်စီတပ် ခြေမြန်တပ်ရင်း (ခမရ -၃၁၉) ၊ ခြေမြန်တပ်ရင်း (ခမရ ၆၀၁) နှင့် အမှတ် (၃၅၂) အမြောက်တပ်ရင်း တို့ကို KIA ပူးပေါင်းတပ် တိုက်ခိုက်သိမ်းပိုက်လိုက်ပြီး မြို့နယ် တစ်ခုလုံးကို သိမ်းပိုက်နိုင်ခဲ့ပြီဟု ၎င်းကဆိုသည်။
“အားလုံးရပြီ။ ခုလိုက်ရှင်းနေတုန်းပဲ။ မနက်ဖြန် ကချင်ပြည်နယ်နေ့ ဆိုတော့ သက်ဆိုင်ရာ (KIA) က ထုတ်ပြန်မယ် ထင်တယ်” ဟု ၎င်းက ရှင်းပြသည်။
ယနေ့ နံနက် လူမှုကွန်ယက်တွင် ပျံ့နှံ့နေသည့် ရုပ်သံတွင် စစ်ကောင်စီ တပ်စခန်းအား KIA တပ်ဖွဲ့များ သိမ်းပိုက် ရှင်းလင်းနေသည်ကို တွေ့ရသော်လည်း တိုက်ပွဲများ အတွင်း ထိခိုက်ကျဆုံးမှုနှင့် လက်နက်ခဲယမ်းရှိမှုကိုမူ မသိရှိရသေးပေ။
ပြီးခဲ့သည့်နှစ် ဒီဇင်ဘာ ၄ ရက်က စတင်ခဲ့သည့် ဗန်းမော်နှင့် မံစီ ဒေသ စစ်ဆင်ရေး တလကျော်ကြာပြီးနောက် KIA ပူးပေါင်းတပ် မံစီမြို့နယ်ကို သိမ်းပိုက်နိုင်ခဲ့ခြင်း ဖြစ်သည်။
ဗန်းမော်မြို့တွင်မူ ယမန်နေ့ညက စစ်ကောင်စီ လေကြောင်း တိုက်ခိုက်မှု အြပင်းအထန် ပြုလုပ်ခဲ့ပြီး ယနေ့ နံနက်ပိုင်း စစ်ဆင်ရေးကွပ်ကဲမှုဌာနချုပ် ( စကခ ၂၁) အနီး တိုက်ပွဲ ပြင်းထန်နေဆဲဖြစ်ကြောင်း စစ်ရေးသတင်းရင်းမြစ်က ပြောဆိုထားသည်။
Leave a Comments