သျှမ်းပြည်တောင်ပိုင်း၊ ရွာငံမြို့နယ်ရှိ ကျေးရွာများတွင် စစ်ကောင်စီနှင့် ပျူစောထီးများက ကားများကို ချောဆွဲနေပြီး ကားမပေးလျှင် ပိုင်ရှင်ကို ရိုက်နှက်ခဲ့ကြောင်း ဒေသခံများထံမှ သိရသည်။
ပြီးခဲ့သည့် (၂၀၂၄ ခုနှစ် ဒီဇင်ဘာလ ဒုတိယပတ်) မှ စပြီး ရွာငံမြို့နယ် အရှေ့ဘက် ကျေးရွာများတွင် ရွာတစ်ရွာလျှင် စစ်တပ်ကို ကားသုံးစီး ပေးရပြီး၊ လေးရက်အတွင်း သုံးစွဲပြီးပါလျှင် ပြန်ပို့ပေးမည်ဟု ဆိုသော်လည်း ယနေ့ထိ ပြန်မရသေးကြောင်း ဒေသခံများက ပြောသည်။
ထို့အပြင် စစ်ကောင်စီတပ်ဖွဲ့များသည် ကျေးရွာအတွင်းမှ ကားများလာရောက်ချောဆွဲချိန်တွင်လည်း ကားပိုင်ရှင်များမှ ပေးမငှားဘဲ ငြင်းဆန်ခဲ့သဖြင့် ရွာသားများကို ရိုက်နှက်ခဲ့ကြောင်း ဖြစ်စဉ်ကို သိရှိသူ အမျိုးသား တစ်ဉီး ကသျှမ်းသံတော်ဆင့်ကိုပြောသည်။
“ စစ်ကောင်စီက ကျနော်တို့ဆီကို ကားလာငှားတုန်းက ရွာသားတွေ မပေးဘူးလို့ပြောတော့ ရိုက်နှက်ခဲ့တယ်။ နောက်ပြီးယူသွားတယ်။ ၄ရက်အတွင်းသုံးပြီးရင်ပြန်ပေးမယ်လို့ပြောတယ်။ ဒါပေမယ့် အခုထိ မရသေးဘူး” အဆိုပါ အမျိုးသာားတစ်ဦးက ပြောသည်။
ဆက်လက်ပြီး စစ်ကောင်စီတပ်မှ ကျေးရွာများအတွင်းသို့ လာရောက်တပ်စွဲထားပြီး ဒေသခံများ ညဘက်အပြင်ထွက်လျှင် ပေါ်တာဆွဲမည်ဆိုသည့် ခြိမ်းခြောက်မှုကြောင့် မထွက်ရဲကြောင်းလည်း သိရသည်။
အလားတူ စစ်ကောင်စီ လက်အောက်ခံ ပျူစောထီများလည်း လက်နက်များဖြင့် ခြိမ်းခြောက်ကာ ကျေးရွာအတွင်း ငွေကြေးကောက်ခံမှုများ၊ စားနပ်ရိက္ခာများ ကောက်ခံမှုများပြုလုပ်နေကြောင်း ကိုယ်တိုင်ကြုံတွေ့ရသည့် အမျိုးသမီး တစ်ဦးကပြောသည်။
“ရွာထဲမှာဆိုရင် ပျူစောထီးတွေက လက်နက်ကို ဗန်းပြပြီး ပိုက်ဆံတွေ လိုက်ကောက်နေတာ။ သူတို့တောင်းသလောက်ပေးရတယ်။ ဆန်တွေရော တောင်းတာ။ ကျမတို့အိမ်ဆို ပိုက်ဆံ ကျပ်(၅သောင်း) ပေးလိုက်ရတယ်။ သူတို့ကို ကြောက်ရ၊ စစ်တပ်ကို ကြောက်ရနဲ့ ကြာရင် လူလည်း လုံးပါး ပါးတော့မယ်။” ဟု ၎င်းအမျိုးသမီးက ဆိုသည်။
ထိုကဲ့သို့ ကျေးရွာအတွင်း ပျူစောထီးများ လက်နက်ကိုင်ခြိမ်းခြောက်မှုများကြောင့် ကျေးရွာနှင့်ဝေးသည့် တောခြံသို့ ရာသီပေါ် လိမ္မော်သီးများ သွားမခူးရဲကြကြောင်း သိရသည်။
ယခုလက်ရှိ ရွာငံမြို့ အဝင်အထွက်တွင် စစ်တပ်ဂိတ်များချထားပြီး ရွာငံ-မန္တလေး လမ်းတွင် ခရီးသွားနှင့် ကုန်တင်ယာဉ်များကို စစ်ဆေးမှု ပိုမိုတင်းကြပ်နေသည်ဟု သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments