သျှမ်းပြည် တောင်ပိုင်း ကွန်ဟိန်းမြို့တွင် ကုန်စုံဆိုင်တစ်ခုကို အမည်မသိလက်နက်ကိုင်တစ်စု ဝင်ရောက်ဓားပြတိုက်ပြီး ဆိုင်ရှင်အမျိုးသားတစ်ဦးကို ပစ်သတ်ခဲ့ကြောင်း သတင်းရရှိသည်။
ယမန်နေ့ ( ဇန်နဝါရီလ ၅ ရက်) ညနေ ၅ နာရီကျော် ကွန်ဟိန်းမြို့ ရပ်ကွက် (၂) ရှိ ကုန်စုံဆိုင်တစ်ခုကို အမည်မသိလက်နက်ကိုင် အမျိုးသား ၃ ဦးမှ ဝင်ရောက်ဓားပြတိုက်ခဲ့ပြီး ထိုဆိုင်ရှင်အမျိုးသားကို သေနက်ဖြင့် ပစ်သတ်ခဲ့ကြောင်း ကွန်ဟိန်းမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ကားအဖြူနဲ့ လာတာ။ အိမ်ထဲဝင်လာတာ ၃ယောက်၊ ကားမောင်းတဲ့သူနဲ့ဆို စုစုပေါင်း ၄ ယောက်ပေါ့။ သေနတ်ကိုင်ပြီးတော့ ဆိုင်ထဲကို ဝင်ပြီးဓားပြ တိုက်တာ။သူတို့က ရွှေငွေတွေ ယူပြီးမှ အဲ့အမျိုးသားကို ချုပ်ပြီး သေနတ်နဲ့ ဦးခေါင်းကိုပစ်တာခဲ့တာ။အဲ့ဆိုင်မှာ တပ်ထားတဲ့ CCTVရဲ့ ကဒ်တွေကိုလည်း သူတို့ အကုန်ယူသွား တယ်။”ဟု ကွန်ဟိန်းမြို့ ဒေသခံအမျိုးသားတစ်ဦးက ပြောသည်။
ထိုသေဆုံးသွားသည့် ဆိုင်ပိုင်ရှင်အမျိုးသားသည် အသက် ၅၀ ဝန်းကျင်ဖြစ်ကြောင်း ဒေသခံများက ပြောသိရသည်။
စစ်ကောင်စီအာဏာသိမ်းပြီးနောက် ကွန်ဟိန်းမြို့ တွင် အမည်မသိလက်နက်ကိုင်မှ အုပ်စုဖွဲ့ ဓားပြတိုက်မှု ဖြစ်ပွားမှုသည့် ပထမဆုံးအကြိမ်ဖြစ်ကြောင်း အသက် ၄၀ ဝန်းကျင် အမျိုးသားတစ်ဦးက သျှမ်းသံတော်ဆင့်ကို ဆက်လက် ပြောသည်။
“အဲ့အမျိုးသားက အိမ်မှာပဲနေပြီးတော့ သူ့မိန်းမကို ဆိုင်စောင့်ကူတယ်။ ဘယ်မှာတောင် သိပ်သွားတဲ့လူမဟုတ်ဘူး ရိုးရိုးသားသားရှားစားနေတဲ့လူလေ။ ဘယ်အဖွဲ့ကလုပ်လည်း ဆိုတာကို အတိအကျမပြောနိုင်သေးဘူး။ ကွန်ဟိန်းမှာ ဒီလိုမျိုးဓားပြတိုက်တယ်ဆိုတာ ဖြစ်ကို ဖြစ်လေမရှိတာ။ ကုန်သွယ်ရေးနယ်မြေလည်း မဟုတ်ဘူး။ သူ့ဟာနဲ့သူ အေးအေးဆေးဆေးရှိတဲ့မြို့လေ။”ဟု ၎င်းက ပြောသည်။
စစ်ကောင်စီအာဏာသိမ်းပြီးနောက် သျှမ်းပြည်တစ်ခုလုံးတွင် အလုပ်အကိုင်းရှားပါးမှုများကြောင့် အလောင်း ကစားဝိုင်းများ၊အွန်လိုင်းငွေလိမ်ဂိုဏ်းများ၊လက်နက်ကိုင်များလည်း ပေါများ နေသည့်အတွက် ဓားပြတိုက်၊ ခိုးဆိုးလုယက် ဒုစရိုက်များလည်း နေ့စဉ်နှင့် အမျှပေါများလာပြီး အချို့မြို့တွင်းလုံခြုံရေးမရှိကြောင်း ဒေသခံများကပြောသည်။
Leave a Comments