သျှမ်းပြည်တောင်ပိုင်း၊ ရွာငံမြို့နယ် နွားဘန်းကြီးနှင့် ပွေးနဖားရွာကြားတွင် အမျိုးသားတစ်ဦး အသတ်ခံထားရသည်ဟု ဒေသခံများထံမှ သိရသည်။
ပြီးခဲ့သည့် ဇန်နဝါရီလ (၂) ရက်တွင် နွားဘန်းကြီးကျေးရွာအုပ်စု ပွေးနဖားကျေးရွာရှိ နာရေးတစ်ခု၌ ဖဲကစားကြပြီး ဖဲနိုင်သွားသည့် (အသက် ၅၀) အရွယ် ကိုသားငယ်ကြီး ဆိုသူသည် နွားဘန်းကြီး ကျေးရွာနှင့် ပွေးနဖားကျေးရွာကြားတွင် အသတ်ခံရကြောင်း ဒေသခံ အမျိုးသား တစ်ဦးထံမှ သိရသည်။
အဆိုပါ အသတ်ခံရသည့် အမျိုးသားသည် ရွာငံမြို့ ဈေးတန်းရပ်ကွက်တွင် နေထိုင်သူဖြစ်ပြီး နာရေးနှင့် ပွဲလမ်းသဘင်များတွင် လောင်းကစားရုံ၌ အမြဲတွေ့ရလေ့ ရှိသူဖြစ်သည်။
“သူကလောင်းကစားနဲ့ အကျိုးပေးတယ် ပြောရမယ်။ အသုဘလဲ သူပါတယ်။ ဂျင်ဝိုင်းတွေလည်း သူပါတယ်။ သူက နိုင်တာများတယ်။အခုလဲ သူက ဖဲနိုင်တော့ ရှုံးတဲ့အဖွဲ့က သတ်လိုက်ကြတာ ဖြစ်မယ်။ ဓားဒဏ်ရာ တွေနဲ့ သေနေတာ။” ဟု အသတ်ခံရသူနှင့် တွေ့ဆုံဖူးသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုကဲ့သို့ အသတ်ခံရသည့်ကိစ္စနှင့်ပတ်သက်ပြီး မည်သည့် အဖွဲ့မှ တာဝန်ယူဖြေရှင်းပေးခြင်းမရှိသကဲ့သို့ မည်သူ့အဖွဲ့က သတ်လိုက်သည်ကို မသိရှိသေးကြောင်း၎င်း အမျိုးသားတစ်ဦးက ထပ်လောင်းပြောသည်။
ထို့အပြင် ယခုကဲ့သို့ လူသတ်မှုများ အတင်းပေါ်တာဆွဲခံရမှု များပြားလာခြင်းကြောင့် ရွာငံမြို့နယ်ရှိ ကျေးရွာအများစုလူငယ် များသည် ကြောက်လန့်နေကြရပြီး တစ်ယောက်တည်း သွားလာခြင်းများ မလုပ်ရဲတော့ကြောင်း အသက် (၂၀) ကျော်အရွယ် အမျိုးသားတစ်ဦးက ပြောသည်။
“ခုက လူသတ်မှုတွေ ခဏခဏ ကြားလာနေရတော့ ဘယ်မှ မသွားရဲတော့ဘူး။ အရင်ကဆို တောခြံက ပြန်ရင် သူငယ်ချင်းတွေနဲ့ ခြင်းခတ်နေကြ။ ညဆို သွားလည်နေကြ။ ခုတော့ တောခြံကနေ စောစောပြန်ပြီး အိမ်မှာပဲ ဖုန်းပြန်သုံးပေါ့။ အဲလိုပဲ နေနေရတယ်။တစ်ယောက်တည်း ဘယ်မှ မသွားရဲဘူး။” ဟု အဆိုပါ လူငယ် တစ်ဦးက ပြောသည်။
ယခု လက်ရှိ ရွာငံမြို့နယ် ကျေးရွာအများစုတွင် စစ်တပ်များ တပ်စွဲထားပြီး ကျေးရွာအတွင်း အဝင်အထွက် ကို စစ်ဆေးမှုများ တင်းကြပ်နေသည်ဟု သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments