သျှမ်းပြည် နောင်ချိုမြို့နယ် တောင်းခမ်းဒေသရှိ စစ်ကောင်စီတပ်စခန်းများကို တအာင်းအမျိုးသား လွတ်မြောက်ရေးတပ်မတော် TNLA ပူးပေါင်းတပ်ဖွဲ့က ပြီးခဲ့သည့် ဇွန်လတွင် စတင်တိုက်ခိုက်ခဲ့ရာ ဒီဇင်ဘာလအထိ ၆ လကျော်ကြာ ထိတွေ့တိုက်ပွဲ ပစ်ခတ်မှုရှိခဲ့သည်ဟု သိရသည်။
နောင်ချိုမြို့နယ်အတွင်း အဆိုပါ တိုက်ပွဲသည် လက်ရှိအချိန်ထိ ၂ ပတ်တာခန့် ငြိမ်သက်ခဲ့သော်လည်း ဘန့်ဘွေးကျေးရွာအခြေစိုက် စစ်ကောင်စီတပ်မှ လက်နက်ကြီးဖြင့် တစ်ဖက်သက် ပစ်ခတ်မှုများ ပြုလုပ်နေခြင်းကြောင်း ပြည်သူနေအိမ်များ ထပ်မံပျက်စီးနေကြောင်း နောင်ချိုဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“တိုက်ပွဲက ဩဂုတ်လကတည်းက ဖြစ်တာ၊ ခုဆို ၆ လကျော်နီးပါးလောက် ရှိနေပြီ။ ခုက တိုက်ပွဲငြိမ်သွားတာ ၂ ပတ်လောက်ရှိပြီ၊ စစ်တပ်ဘက်ကပဲ လက်နက်ကြီးနဲ့ ပစ်နေတာ နေ့တိုင်းလိုလိုပဲ။ ဘန့်ဘွေးရွာကနေ ၂၅ ရက်ကနေ ၃၁ ရက်နေ့ထိ လက်နက်ကြီးနဲ့ ပစ်တယ်။ ဆမ္မဆယ်က နေအိမ်တွေလည်း ထပ်ပြီးထိခိုက် ပျက်စီးကုန်တယ်”ဟု ၎င်းဒေသခံ အမျိုးသားက ပြောသည်။
နောင်ချိုမြို့နှင့် အနီးတဝိုက်ရှိ ဒေသခံအများစုသည် အင်းဝိုင်းကျေးရွာရှိ ဆင်းရွှေလီ သကြားစက်ရုံ အနီးတဝိုက်တွင် သွားရောက်နေထိုင်ပြီး စစ်ဘေးရှောင်ဦးရေ (၆၀၀)ကျော် ရှိနေကြောင်း စစ်ရှောင်အမျိုးသမီးတစ်ဦးက ပြောသည်။
လက်ရှိ အင်းဝိုင်းသကြားစက်ရုံ အဆောက်အအုံများကို ပြန်လည်ပြုပြင်၍ ကြံများကို ဇန်နဝါရီလ ပထမပတ်တွင် စတင်ခုတ်ယူပြီး သကြားစက်ရုံကို လာမည့် ဇန်နဝါရီလ ၆ ရက်နေ့တွင် ပြန်လည် ဖွင့်ပေးတော့မည်ဟု ၎င်းက ဆက်ပြောသည်။
“ခပ်များများက ဒီသကြားစက်ရုံဘက်ကို ရှောင်နေတဲ့သူ များတယ်၊ လူဦးရေက (၆၀၀) ကျော်တယ်။ စက်ရုံလည်း ပြုပြင်ပြီးပြီ၊ ပြီးခဲ့တဲ့ ၃ ရက် ၄ ရက်ကတည်းက ကြံပင်တွေ ခုတ်ပြီး ပို့နေကြတယ်။ လာမယ့် ၆ ရက်နေ့ဆို စက်ရုံ ပြန်လည်ပတ်တော့မယ် ပြောတယ်။ ပိုင်ရှင်တော့ တရုတ်လူမျိုး ဖြစ်တယ်”ဟု ၎င်းစစ်ဘေးရှောင် အမျိုးသမီးက ပြောသည်။
ထို့ပြင် စစ်ဘေးရှောင်များသည် ရောက်ရှိရာကျေးရွာတွင် စားဝတ်နေရေးအတွက် ခေါက်ဆွဲဆိုင်၊ မုန့်ဆိုင်နှင့် ကုန်စုံဆိုင် အသေးများဖွင့်ပြီး ရုန်းကန်ရှာဖွေနေရသည်ဟု ၎င်းစစ်ဘေးရှောင် အမျိုးသမီးက ဆိုသည်။
ယမန်နှစ် နိုဝင်ဘာလ ၁၈ ရက်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နောင်ချိုမြို့နယ်အတွင်း အင်းဝိုင်းကျေးရွာရှိ ဆင်းရွှေလီ သကြားစက်ကို စစ်ကောင်စီတပ်မှ လေကြောင်းဖြင့် ဗုံး(၂)လုံး ကြဲချတိုက်ခိုက်ခဲ့ရာ စက်ရုံ အဆောက်အဦ ထိခိုက်ပျက်စီးပြီး ကျေးရွာရှိ စစ်ရှောင် (၁၀၀၀) နီးပါး ဘေးလွတ်ရာသို့ ထပ်မံထွက်ပြေး တိမ်းရှောင်ခဲ့ရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments