သျှမ်းပြည် သိန္နီမြို့တွင် နှစ်သစ်ည ယမန်နေ့ (ဇန်နဝါရီ ၁)ရက် ည ၁၁နာရီကျော် လူအိပ်မောကျချိန် စစ်ကောင်စီမှ လေကြောင်းဖြင့် ထပ်မံဗုံးကြဲ တိုက်ခိုက်ခဲ့ကြောင်း စုံစမ်းသိရသည်။
ယမန်နေ့ (ဇန်နဝါရီလ ၁ ရက်) ည ၁၁ နာရီကျော် လူအများ အိပ်မောကျချိန်တွင် ကိုးကန့်တပ်ဖွဲ့ MNDAA ထိန်းချုပ်ထားသည့် သိန္နီမြို့ ရပ်ကွက် (၃) ပန်းခြံအနီးရှိ သိန္နီဟော်တယ် အနောက်ဘက်သို့ စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် ပတ်ပတ်လည်မှ လူနေအိမ်များ ထိခိုက်ပျက်စီးခဲ့ကြောင်း ဒေသခံများက ပြောသည်။
“၁၁ နာရီကျော်လောက်မှာ လေယာဉ်နဲ့ သိန္နီဟော်တယ် အနောက်ဘက်ကို ဗုံး ၁ လုံး ကြဲသွားတယ်။ ဟော်တယ်လည်းမထိဘူး။ သွားကြည့်လာတာ လူလည်းမထိဘူးလို့ ကြားတယ်။ ပတ်ပတ်လည်က အိမ်တွေ ကြီးကြီးမားမားတော့ မထိပါဘူး။ နည်းနည်းငြိမ်လာပြီဆို လေယာဉ်နဲ့ ခနခန ဗုံးလာကြဲတော့ စိတ်မချရဘူး”ဟု သိန္နီမြို့ခံ အသက် (၃၀) ကျော် အရွယ် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
သိန္နီမြို့ပေါ်သို့ စစ်ကောင်စီတပ်မှ အကြိမ်ကြိမ် လေကြောင်းဗုံးကြဲတိုက်ခိုက်မှုကြောင့် ထိခိုက်ပျက်စီးရသည့် နေအိမ်များထဲတွင် အများစုမှာ (၃) ကြိမ်မှ (၅) ကြိမ်အထိ မကြာခဏ လေကြောင်းဗုံး ထိမှန်ပြီး နေရာဟောင်းတွင် ပြန်လည်ပြုပြင်ကာ ဆက်လက်နေထိုင်နေရကြောင်း ၎င်းအမျိုးသမီးက ဆက်ပြောသည်။
ပြီးခဲ့သည့် ၂၀၂၄ အောက်တိုဘာ ၂၇ ရက် “၁၀၂၇ စစ်ဆင်ရေး” တစ်နှစ်ပြည့်နေ့တွင်လည်း သိန္နီမြို့ကို စစ်ကောင်စီက ဗုံးကြဲတိုက်ခိုက်ခဲ့ရာ ခရစ်ယာန်ဘုရားကျောင်း၊ ထွေအုပ်ရုံးနှင့် နေအိမ်အဆောက်အဦးများ ထိခိုက်ပျက်စီးခဲ့ကြောင်း ဒေသခံများထံမှ သိရသည်။
အလားတူ “၁၀၂၇ စစ်ဆင်ရေး” ဒုတိယလှိုင်းအဖြစ် MNDAA နှင့် ၎င်းမဟာမိတ်တပ်ဖွဲ့များ လားရှိုးမြို့ကို စတင်တိုက်ခိုက်သည့် ဇူလိုင်လ ၁၃ ရက်မှ စတင်ပြီး စစ်ကောင်စီတပ်သည် လေယာဉ်ဖြင့် သိန္နီမြို့ပေါ် လူစည်ကားရာ ဈေးကဲ့သို့ အများပြည်သူ နေရာများကို ဗုံးကြဲတိုက်ခိုက်ခဲ့ရာ တစ်လထဲတွင် အရပ်သား (၁၂) ဦး သေဆုံးပြီး (၂၄) ဦး ဒဏ်ရာရရှိခဲ့ကြောင်း ရှမ်းလူ့အခွင့်အရေးမဏ္ဍိုင်မှ ထုတ်ပြန်ထားသည်။
သိန္နီမြို့ကို “၁၀၂၇ စစ်ဆင်ရေး”ပထမပိုင်းအတွင်း ကိုးကန့်တပ်ဖွဲ့ MNDAA က ထိန်းချုပ်နိုင်ခဲ့ပြီးနောက် မြို့ပေါ်ရပ်ကွက်များကို မူလ (၄) ရပ်ကွက်မှ (၆) ရပ်ကွက်အဖြစ် ပြောင်းလဲသတ်မှတ်ပြီး အုပ်ချုပ်ရေးယန္တရား လည်ပတ်လျက်ရှိသည်။
Leave a Comments