သျှမ်းပြည် ပင်လောင်းမြိုနယ် နောင်တရားမြို့တွင် ကျန်ရှိနေသည့် စစ်ဘေးရှောင် ၃ ထောင်ဝန်းကျင်အတွက် စောင် နှင့် အနွေးအထည်များလိုအပ်နေကြောင်း စုံစမ်းသိရသည်။
တိုက်ပွဲများကြောင့် နောင်တရားမြို့ အမျိုးသား တပေါင်းကွင်း နှင့် မြို့မဈေးသစ်တွင် လာရောက် တိမ်းရှောင် နေထိုင်နေသည့် စစ်ဘေးရှောင် ၃ ထောင်ဝန်းကျင် အတွက် စောင် နှင့် အနွေးထည်များလိုအပ်နေကြောင်း စစ်ဘေးရှောင် ကူညီသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ဆောင်းရာသီရောက်တော့ အခုက သက်ကြီးပိုင်း လူတွေအတွက်ကတော့ စောင်တွေလိုအပ်နေတာ။စောင်နဲ့ အနွေးထည်ကတော့ လှူတဲ့အဖွဲ့အစည်းက မရှိသလောက်ပါပဲ။ဆောင်းရာသီရောက်နေတော့ သက်ကြီးရွယ်အိုနဲ့ ကလေးတွေအတွက်က အလှူရှင်ရှိဖို့တော့ မျှော်လင့်ပါတယ်။ကျန်နေတာက သက်ကြီးပိုင်းနဲ့ကလေးတွေက ပိုများတယ်လေ။”ဟု စစ်ဘေးရှောင်ကူညီသူအမျိုးသားတစ်ဦးက ပြောသည်။
စစ်ဘေးရှောင် ၃ ထောင်ဝန်းကျင်ထဲတွင် အမျိုးသမီး၊ ကလေးနှင့် သက်ကြီးပိုင်း ပိုများသည့်အတွက် ကျန်းမာရေး စောင့်ရှောက်မှုများလည်း လိုအပ်နေကြောင်း ၎င်းကဆက်ပြောသည်။
ထိုစစ်ဘေးရှောင်များသည် လက်ရှိအချိန်ထိ နေရပ်ပြန်ရန် ခက်ခဲမှုများရှိနေသည့်အပြင် နေရပ်မပြန်နိုင်သည့် စစ်ဘေးရှောင်များစွာကျန်ရှိနေကြောင်း စစ်ဘေးရှောင်ကူညီသည့်အမျိုးသားတစ်ဦးက ဆက်ဆိုသည်။
“သူတို့တွေကတော့ မြန်မြန်အိမ်ပြန်ချင်ကြပါတယ်။ကိုယ်နေရာကိုယ်ဒေသမှာ နေချင်ကြတယ်ဆိုတော့ သူတို့ ကတော့ ပြန်နေချင်တယ်။ဒီမှာကသူတို့ဒေသမဟုတ်တော့ စားနပ်ရိက္ခာတွေစားသောက်တာတွေက စ အဆင်မပြေဘူးလို့တော့ ပြောကြတယ်။သူတို့သားသမီးတွေ ကျောင်းတက်နေလို့မပြန်နိုင် ကြသေးတာရယ်၊ နေအိမ်တွေပျက်စီးလို့ ပြန်လို့မပြန်နိုင်တော့တာရယ် လယ်ယာမြေတွေလုပ်စားမရတော့လို့ ပြန်ဖို့ အဆင်မပြေ တော့တဲ့လူတွေပေါ့။”ဟု ၎င်းကပြောသည်။
ထိုစစ်ဘေးရှောင် ၃ ထောင်ဝန်းကျင်သည် ပင်လောင်းမြို့နယ်၊ ဖယ်ခုံမြို့၊ မိုးဗြဲမြို့ တွင် စစ်ကောင်စီ၊ ပအိုဝ်းပြည်သူ့စစ် PNO နှင့် ကရင်နီတော်လှန်ရေး တပ်ပေါင်းစုတို့တိုက်ပွားများကြောင့် ထွက်ပြေးတိမ်းရှောင် လာသူအပြင်၊ ၂၀၂၃နိုဝင်ဘာလ ၁၁ ရက် “၁၁.၁၁ စစ်ဆင်ရေး” ကြောင့် သျှမ်း-ကရင်နီ နယ်စပ် တစ်လျှောင်တွင် တိုက်ပွဲများကြောင့်ထွက်ပြေးတိမ်းရှောင်လာသည့် ကရင်နီပြည် လွိုင်ကော်မြို့နယ်ဒေသခံများလည်းပါကြောင်း သိရသည်။
ညောင်ရွှေမြို့နယ် စမ်းရေကြည်၊ ဟဲဆတ်၊ နားမွန် ရွာတို့တွင် နှစ်လကျော်ကြာ ရောက်ရှိနေသည့် စစ်ဘေးရှောင် ၈၀၀ ကျော်သည် အမိုးအကာ၊စောင် နှင့် အနွေးအထည်များ လိုအပ်နေကြောင်း သိရသည်။
Leave a Comments