သျှမ်းပြည်တောင်ပိုင်း၊ရွာငံမြို့နယ် မင်းပလောင် ကျေးရွာအနီးတွင် စစ်ကောင်စီနှင့် ဓနုပြည်နယ်အမျိုးသားကာကွယ်ရေးတပ်တော်(DSNDA)နှင့် စစ်ကောင်စီတို့ တိုက်ပွဲဖြစ်ပွားခဲ့ပြီး စစ်ကောင်စီဘက်မှ (၃)ဦးသေဆုံး သွားကြောင်း DSNAမှ ထုတ်ပြန်ထားသည်။
ပြီးခဲ့သည့် ဒီဇင်ဘာလ (၂၁)ရက်တွင် ရွာငံမြို့နယ် ရေလှကျေးရွာမှ စစ်ကောင်စီအင်အား (၁၁၀) ခန့်ရှိသော စစ်ကြောင်းသည် မင်းပလောင်ကျေးရွာသို့ စစ်ကြောင်းမထိုးမှီ DSNDAမှ မိုင်းဆွဲတိုက်ခိုက်ခဲ့ရာ စစ်ကောင်စီ တပ်သား (၃)ဦး သေဆုံးကာ (၅)ဦးဒဏ်ရာ ရရှိသွားခဲ့သည်။
ထို့ပြင် ဒီဇင်ဘာလ (၂၂) ရက်တွင် မင်းပလောင်ရွာကို စစ်ကောင်စီမှ မီးရှို့ခဲ့ကြောင်း လက်ရှိမှာ ကျေးရွာနေအိမ်တစ်ဝက်နီးပါး မီးလောင်နေကြောင်းလည်း DSNDA ပြောရေးဆိုခွင့်ရှိသူက သျှမ်းသံတော်ဆင့်ကို ပြောသည်။
“မင်းပလောင်ရွာက နေအိမ်တွေ မီးရှို့ခံထားရတယ် ။ခုထိ ရှို့နေတုန်း” ဟု အဆိုပါ ပြောရေးဆိုခွင့်ရှိသူ အမျိုးသားတစ်ဦးက ပြောသည်။
မင်းပလောင် ကျေးရွာသည် ရွာငံမြို့နှင့် မိုင်( ၄၀) ကျော်ကွာဝေးပြီး လမ်းပန်းဆက်သွယ်ရေးခက်ခဲ သည့် ဒေသဖြစ်သည်။
ကျေးရွာမီးရှို့ခံရသောကြောင့် မင်းပလောင်ရွာမှ စစ်ရှောင်( ၇၀၀ )ကျော်သည် ဘေးလွတ်ရာသို့ ထွက်ပြေးတိမ်းရှောင်နေကြရပြီး အရေးပေါ် ဆေးဝါးနှင့် စားနပ်ရိက္ခာများ အကူညီ လိုအပ်နေကြောင်း သတင်းနှင့်ပြန်ကြားရေး တာဝန်ခံ တစ်ဦးက ပြောသည်။
“ရွာတွင်း ပြည်သူအားလုံးထွက်ပြေးနေရတယ်။ စစ်ရှောင်ဦးရေက( ၇၀၀ ) ကျော်မယ်။ ဘယ်ဖက်တွေ ထွက်ပြေးတယ် ဆိုတာထက် သူတို့အသက်ဘေးလွတ်ရာကို ထွက်ပြေးတိမ်းရှောင်နေကြရတာ။ တောတောင်ထဲ တို့ပေါ့။ သူတို့အတွက် ရိက္ခာနဲ့ ဆေးဝါးက လောဆယ် အရေးပေါ်လိုအပ်နေတယ်။” ဟု ၎င်း ပြန်ကြားရေးတာဝန်ခံ အမျိုးသား တစ်ဦးက ပြောသည်။
ယခုလက်ရှိ ရွာငံမြို့နယ် မင်းပလောင် ဒေသတွင် တိုက်ပွဲ ဆက်လက်ဖြစ်ပွားနေဆဲ ဖြစ်ပြီး ဖုန်းအင်တာနက်လိုင်းများ ဖြတ်တောက်ခံထားရသည်ဟု သိရသည်။
ဓနုပြည်နယ်အမျိုးသားကာကွယ်ရေးတပ်တော် DSNDA/DSNDF သည် ပြီးခဲ့သည့် ၂၀၂၄ ခုနှစ်နိုဝင်ဘာလ ၁၁ ရက်တွင် တစ်နှစ်ပြည်ခဲ့ပြီး ရွာငံနှင့် ပင်းတယဒေသဖက်တွင် အာဏာရှင်ကို တော်လှန်နေသည့် အဖွဲ့ဖြစ်သည်။
အလုပ်သင် သတင်းထောက် နန်းလရောင် ရေးသားသည်။
Leave a Comments