သျှမ်းပြည်တောင်ပိုင်း၊ ညောင်ရွှေမြိုနယ် အင်းလေးဒေသအတွင်း ၁၅ နှစ်ကြာ လူငယ်များဖွံ့ဖြိုးတိုးတက်ရေး၊ သဘာဝပတ်ဝန်းကျင်၊ လူမျိုးစုများနှင့် ဒေသတွင်းထုံးတမ်းစဉ်လာများကို ထိန်းသိမ်းရေးလုပ်ငန်းများလုပ်ကိုင်နေခဲ့သော အင်းလေးဒေသအမွေအနှစ် ဖောင်ဒေးရှင်းလုပ်ငန်းများအား လာမည့် ဒီဇင်ဘာလ (၃၁)ရက်တွင် အပြီးသတ်ရပ်နားမည်ဖြစ်ကြောင်း သတင်းရရှိသည်။

အင်းလေးအမွေအနှစ် ဖောင်ဒေးရှင်းအား လက်ရှိကြုံတွေ့နေရသော နိုင်ငံ၏အကြပ်အတည်းများ၊ ကိုဗစ်ရောဂါ နောက်ဆက်တွဲအခြေအနေများကြောင့် ဆက်လက်ရပ်တည်နိုင်ရန် အခက်အခဲများစွာဖြစ်ပေါ်လာသောကြောင့် ရပ်နားလိုက်ရခြင်းဖြစ်ပြီး ဖြေရှင်းရန်ခက်ခဲသည့် အခြေအနေများကြောင့် ပိတ်သိမ်းခဲ့ခြင်းဖြစ်ကြောင်း ဒီဇင်ဘာလ (၁၆) ရက်နေ့က ၎င်းတို့၏ လူမှုကွန်ယက်စာမျက်နှာ Inle Heritage Foundation မှ ထုတ်ပြန်ကြေညာခဲ့သည်။

“စီးပွားရေးသပ်သပ်မဟုတ်ဘဲ အကျိုးအမြတ်မယူနဲ့ အဖွဲ့အစည်းတစ်ခုပါ၊ ပျောက်ကွယ်လုဖြစ်နေတဲ့ ဗမာကြောင်မျိုးရင်းလေးတွေကို ထိန်းသိမ်းတာတွေ၊ ရေဆိုးတွေသန့်စင်ပြီးမှ အင်းလေးကန်ထဲစွန့်ထုတ်တဲ့ နည်းစနစ်တွေ၊ ကောင်းမွန်တဲ့ စိုက်ပျိုးရေးနည်းစနစ်တွေကို ဝေမျှပေးနိုင်ခဲ့တာအတွက် ဂုဏ်ယူပြီး ဆက်မလုပ်နိုင်တော့တဲ့ အတွက် ဝမ်းနည်းမိပါတယ်” ဟု အင်းလေးအမွေအနှစ် ဖောင်ဒေးရှင်းတွင် လုပ်ကိုင်ခဲ့သည့် ဝန်ထမ်းအမျိုးသမီးတစ်ဦးက သျှမ်းသံတော်ဆင့်သို့ပြောသည်။

အင်းလေးအမွေအနှစ် ဖောင်ဒေးရှင်းမှ အင်းလေးကန်အတွင်းရှိ ရေအရည်အသွေးတိုင်းတာမှု ၁၈ မျိုးတို့အား နှစ်စဉ် အဆက်အပြတ်လေ့လာဆန်းစစ်ခဲ့ပြီး အင်းလေးဒေသတွင်းရှိ လူမှုအသိုက်အဝန်းများသိရှိစေရန် ပညာပေးလုပ်ငန်းများကိုလည်းလုပ်ကိုင်ခဲ့သည်။

အင်းလေးဒေသဖွင့်ဖြိုးတိုးတက်ရေးလုပ်ငန်းများအပြင် အခြေခံအထက်တန်းစာမေးပွဲများတွင် ကျရှုံးခဲ့သည့် အဓိကအားဖြင့် ဘေးဖယ်ခြင်း၊ ချန်လှပ်ထားခြင်းခံရတော့မည့် လူငယ်များအတွက် အခွင့်အရေးတစ်ခုထပ်မံရရှိစေရန် ဟိုတယ်သက်မွေးမှုသင်တန်းကျောင်းအား ၂၀၁၃ ခုနှစ်တွင် စတင်ဖွင့်လှစ်ပေးခဲ့ပြီး ၂၀၂၄ ခုနှစ်အထိ သင်တန်းကျောင်းမှ လူငယ် (၃၃၆) ဦးအား မွေးထုတ်ပေးနိုင်ခဲ့သည်။

“အဓိကကတော့ ဟိုတယ်သက်မွေးမှုသင်တန်းကျောင်းပေါ့၊ ဒေသတွင်းလူငယ်တွေမကပဲ တခြားဒေသက လူငယ်တွေကိုလည်း အကျိုးအမြတ်မယူပဲ သင်ကြားပေးတာဖြစ်တဲ့အတွက် အခုလိုပိတ်လိုက်ရတဲ့အတွက် သင်ကြားခွင့်မရှိတော့တာပေါ့” ဟု ၎င်း ဝန်ထမ်းအမျိုးသမီးကဆက်ပြောသည်။

အင်းလေးအမွေအနှစ် ဟိုတယ်သက်မွေးမှုသင်တန်းကောင်းသည် ရှမ်းပြည်ရှိ အမျိုးသားအဆင့် အရည်အသွေးစစ်ဆေးရေးအဖွဲ့ အသိအမှတ်ပြုသင်တန်းဌာနတစ်ခုဖြစ်ခဲ့ပြီး ယခုကဲ့သို့ သင်တန်းကျောင်းပိတ်သိမ်းလိုက်ရသော်လည်း အခြားသင်တန်းကျောင်းများထပ်မံပေါ်ပေါက်လာရန် မျှော်လင့်ကြောင်း ၎င်းအမျိုးသမီးက ထပ်ဖြည့်ပြောကြားသည်။

၂၀၂၀ ခုနှစ် ကိုဗစ်ကပ်ရောဂါ၏ ရိုက်ခတ်မှုများနှင့် ၂၀၂၁ ခုနှစ် စစ်အာဏာသိမ်းမှုများကြောင့် မြန်မာနိုင်ငံတွင်း ခရီးသွားလုပ်ငန်းများနှင့် ဟိုတယ်လုပ်ငန်းများအပေါ် သက်ရောက်မှုကြီးမားစွာကြုံတွေ့ခဲ့ရပြီး ထိုလုပ်ငန်းများအပေါ်မှီခိုနေရသော အင်းလေးဒေသအတွင်းတွင်လည်း ရိုက်ခတ်မှုကြီးမားခဲ့သည်။

ထို့အပြင်လူစွမ်းအားအရင်းအမြစ် လူငယ်များမှာလည်း စစ်မှုထမ်းဥပဒေ၏ခြိမ်းခြောက်မှုများကြောင့် ပြည်တွင်း၌ ရပ်တည်နိုင်ရန်အခက်အခဲများစွာကြုံတွေ့နေကြရသည်။

ပြီးခဲ့သည် စက်တင်ဘာအလတွင်းတိုက်ခတ်ခဲ့သော မုန်တိုင်းရာဂီနောက်ဆက်တွဲများကြောင့်လည်း အင်းလေးဒေသတွင်း ရေမြင့်တက်မှုအား နှစ်လကျော်ကြာခံစားခဲ့ရပြီး အင်းလေးဒေသအတွင်းရှိ ပြည်သူများမှာ ပြန်လည်ထူထောင်နိုင်ရန် ကြိုးစားနေရဆဲဖြစ်သည်။

အလုပ်သင် သတင်းထောက် ယူဂျင်းရေးသားသည်။