ကချင်လွတ်လပ်ရေး တပ်မတော် (KIA) ပူးပေါင်းတပ်များ ထိုးစစ်ဆင် တိုက်ခိုက်နေသည့် ကချင်ပြည် ဗန်းမော်နှင့် မံစီ ဒေသတွင် ယနေ့ (ဒီဇင်ဘာလ ၂၀ ရက်) တွင် တိုက်ပွဲများ ဆက်လက် ပြင်းထန်နေကြောင်း စစ်ရေးသတင်းရင်းမြစ်က ပြောသည်။

ယမန်နေ့နှင့် ယနေ့တွင် ဗန်းမော်မြို့တွင်း တိုက်ပွဲများ ဆက်လက်ပြင်းထန်နေပြီး စစ်ကောင်စီ အလောင်း၊ စစ်သုံ့ပန်းနှင့် လက်နက်ခဲယမ်းများ သိမ်းဆည်းရရှိခဲ့သည်ဟု ပြောဆိုသည်။

“မနေ့က ဗန်းမော် လေယာဉ်ကွင်းနား ၂ မိုင်နဲ့ ၅ မိုင်မှာ တိုက်ပွဲဖြစ်တယ်။ မံစီ စစ်ကောင်စီတပ်ဘက်မှာလည်း တိုက်ပွဲဖြစ်တယ်။ အလောင်းနဲ့ လက်နက် တချို့ရပါတယ်။ ဗန်းမော်မြို့တွင်းမှာလည်း တိုက်ပွဲ ဆက်ဖြစ်နေပါတယ်” ဟု စစ်ရေးသတင်းရင်းမြစ်က ဆိုသည်။

ဗန်းမော်မြို့ကို စစ်ကောင်စီတပ် ပြန်လည် ထိန်းချုပ်လိုက်ပြီ ဆိုသည့် သတင်းများ ယမန်နေ့က ထွက်ပေါ်ခဲ့မှုနှင့် ပတ်သက်၍ မဟုတ်မှန်ကြောင်း ၎င်းကဆက်ပြောသည်။

“ဒီနေ့ မနက် ၆ နာရီလောက်ကတည်းက တိုက်ပွဲ ပြင်းထန်နေတယ်။ ဗန်းမော်ဆေးရုံနား တဝိုက် မီးလောင်နေတယ်လို့ ပြောတယ်” ဟု ဗန်းမော်မြို့မှ တိမ်းရှောင်လာသည့် ပြည်သူတဦးက မြို့နှင့် ဆက်သွယ်မေးမြန်းခဲ့သည်များကို ပြောပြသည်။

လက်ရှိ ပူးပေါင်းတပ်များက လက်နက်ကြီးများ ပစ်ခတ်တိုက်ခိုက်နေကြောင်း စစ်ရေးသတင်းရင်းမြစ်က ပြောဆိုပြီး တိုက်ပွဲ အခြေအနေ အသေးစိတ်နှင့် ထိခိုက်သေဆုံးမှု၊ လက်နက်ခဲယမ်း ရှရှိမှုများကိုမူ ပြောဆိုခြင်း မရှိပေ။

ပြီးခဲ့သည့် ဒီဇင်ဘာ ၄ရက်က စတင်ခဲ့သည့် ဗန်းမော်နှင့် မံစီ KIA ပူးပေါင်းတပ် ထိုးစစ် အတွင်း လက်နက်ကြီး ပစ်ခတ်မှုနှင့် စစ်ကောင်စီ လေကြောင်း တိုက်ခိုက်မှုများကြောင့် အရပ်သား ပြည်သူ သေဆုံးမှု များပြားခဲ့သည်ဟု လူမှုကူညီရေးအသင်းများက ပြောဆိုထားသည်။

ဗန်းမော်မြို့သည် ကချင်ပြည်နယ်၏ ဒုတိယ မြို့တော်ဖြစ်ပြီး စစ်ကောင်စီတပ် စကခ(၂၁) အပါအဝင် တပ်ရင်းတပ်ဖွဲ့ ပေါင်းစုံ ၁၇ ခုထက်မနည်း တည်ရှိပြီး မံစီမြို့တွင် ခမရ (၃၁၉)၊ ခမရ (၆၀၁) နှင့် အမှတ် (၅၂၃) အမြောက်တပ် တပ်ရင်းဌာနချုပ်တို့ တည်ရှိရာ KIA ပူးပေါင်းတပ်က တပြိုင်နက် တိုက်ခိုက်နေခြင်း ဖြစ်သည်။