သျှမ်းပြည်တောင်ပိုင်း ၊ပင်းတမြို့နယ်တွင် လုယက်မှုများကို ဖမ်းဆီးအရေးယူမှုများ မလုပ်ပေးကြောင်း ဒေသခံများထံမှ သိရသည်။
နိုင်ငံရေးမတည်ငြိမ်မှုနှင့် အလုပ်ကိုင်ရှားပါးလာမှုကြောင့် ပင်းတယမြို့နယ်တွင် ခိုးဆိုးလုယက်မှု၊ ဓားပြတိုက်ခံရမှုများ မကြာခဏ ဖြစ်လာနေပြီး ထိုလုယက်မှုများကို မည်သည့် အဖွဲ့အစည်းမှ ဖြေရှင်းမှု မလုပ်ပေးကြောင်း မြို့ခံ များကပြောသည်။
ပြီးခဲ့သည့် ဒီဇင်ဘာလ (၁၆) ရက်တွင် ပင်းတယ -ပွေးလှသွားလမ်း သွားလမ်းတွင် ဓားထိုးပြီး ဆိုင်ကယ်၊ ဖုန်း များလုယက်ခံရပြီး မိုင်းအင်ဖက်တွင်လည်း ဒီဇင်ဘာလ (၁၄) ရက်နေ့တွင် နေအိမ် ဖောက်ထွင်း ဓားပြတိုက်ခံရသောကြောင့် ငွေကျပ်( သိန်း ၅၀) လုယူခံရကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“ခုရက်ပိုင်းအတွင်းမှာ အဲလို ဓားပြတိုက်တာတို့တွေ ကြားနေရတယ်။ ကျနော်တို့ မိုင်းအင်ဖက်မှာလည်း ဓားပြတိုက်သွားတာ သိန်း(၅၀) ပါသွားတယ်တဲ့။ ဘယ်အဖွဲ့ကမှ အရေးယူဖြေရှင်းပေးတာမျိုးမရှိဘူး။ ကိုယ်ဖြစ် ကိုယ်ခံပဲ။ ဒီဖက်မှာက စစ်ကောင်စီရော၊ RCSS တွေ PNO တွေရော ရှိတော့ ဘယ်အဖွဲ့ကို အဖေခေါ်ရမလဲတောင် မသိဘူး။” ဟု ၎င်း အမျိုးသားက ပြောသည်။
ထို့ကဲ့သို့ ဓားပြတိုက်မှုများကို ဖြေရှင်းပေးမည်သူမရှိသဖြင့် ဒေသခံများ ကြောက်လန့်နေကြရပြီး နေဝင်သည်နှင့် အိမ်ထဲအိမ်ပြင် မထွက်ရဲကြတော့ကြောင်း ၎င်းအမျိုးသားက ထပ်လောင်းပြောသည်။
ထို့အပြင် အလုပ်ကိစ္စဖြင့် ကျေးရွာဖက်သို့ မဖြစ်မနေသွားရ မည်ဆိုလျှင် အနည်းဆုံး လူ(၄) ယောက်ပါမျှ လုံခြုံမှုရှိတော့မည် ဖြစ်ကြောင်း ကုမ္ပဏီဝန်ထမ်း အမျိုးသမီးတစ်ဦးက ပြောသည်။
“အရင်ကဆို ပစ္စည်းပို့တွေ ဆိုင်ကယ်နဲ့ သွားဖြစ်တယ်။ခုဆို လူ(၄)ယောက်လောက်ပါမှ ပစ္စည်း ပို့သွားတော့တာ။ ကိုယ်က ပိုက်ဆံတွေကိုင်ပြီး အလုပ်သမားတွေကို ငွေသွားရှင်းတဲ့အခါ ဘယ်ချိန် အလုခံရမလဲပဲ စိတ်ပူနေတာ။ ကိုယ့်အသက် အန္တရာယ်လည်း စိုးရိမ်ရတယ်လေ။ခုကအခြေနေမကောင်းတော့ ထိထိရောက် အရေးယူမဲ့သူလဲ မရှိဘူး” ဟု အသက် (၃၀ )ဝန်းကျင် ကုမ္ပဏီ ဝန်ထမ်း အမျိူးသမီးက ပြောသည်။
ယခုကဲ့သို့ လုယက်မှုများ ဓားပြတိုက်မှုများကို ထိထိရောက်ရောက်အရေးယူစေလိုကြောင်း၊ ပြည်သူများအနေဖြင့် လူပြတ်သည့်လမ်းတွင် တစ်ယောက်တည်းမသွားလာသင့်ကြောင်း ၎င်းအမျိုးသမီးက ပြောသည်။
လွန်ခဲ့သည့် (၂၀၂၃) ခုနှစ်တွင်လည်း မိုင်းလီကျေးရွာတွင် နေအိမ် ဖောက်ထွင်း ဓားပြတိုက်မှုဖြစ်ပွားခဲ့ပြီး လက်ဝတ်လက်စားနှင့် ပိုက်ဆံများ ပါသွားကာ ထိုအမှုကို မည်သူကမျှ လာရောက် ဖြေရှင်းပေးမှု မရှိကြောင်း ဒေသခံများ ပြောပြချက်အရသိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments