သျှမ်းပြည် သိန္နီမြို့ ဒေသခံများကို မူးယစ်သုံးစွဲသည်ဟုစွပ်စွဲပြီး ကိုးကန့်တပ် MNDAA မှ ဖမ်းဆီးသွားပြီးနောက် အချို့က မိုင်းရယ်ဘက်သို့ ပို့ဆောင်ခံရပြီး၊ အချို့က ပိုက်ဆံဖြင့် ပြန်ရွေးကာ ပြန်လည်လွတ်မြောက်လာကြောင်း စုံစမ်းသိရှိရသည်။
အောက်တိုဘာလဆန်းမှစ၍ ကိုးကန့်တပ် MNDAA သည် မူးယစ်ဆေးဝါးတိုက်ဖျက်ရေး ခေါင်းစဉ်ဖြင့် သိန္နီမြို့အတွင်းရှိ မူးယစ်ဆေးသုံးစွဲသူ၊ ရောင်းချသူများကို လိုက်လံဖမ်းဆီးခဲ့ခြင်း ဖြစ်သည်။
“ကျမယောက်ျားကို ဖမ်းသွားတာ အခုဆိုရင် နှစ်လပြည့်တော့မယ်။ ပြန်လည်မလွှတ်လာသေးဘူး။ အရင်ကတော့ ပိုက်ဆံနဲ့ ပြန်သွားရွေးခိုင်းတယ်။ ကျမကပိုက်ဆံမပေးနိုင်ဘူး။ အခုတော့ မိုင်းရယ်ဘက်ကို ပို့လိုက်တာ ၁ လနီးပါးရှိပြီ။ အဲ့မှာ ကတုတ်ကျင်းသွားတူးခိုင်းတာ” ဟု ဖမ်းဆီးခံရသူ သိန္နီမြို့ခံ အမျိုးသားတစ်ဦး၏ ဇနီးဖြစ်သူက ပြောသည်။
လက်ရှိ မိုင်းရယ်မြို့ဘက်သို့ ပို့ဆောင်ခံရသူ ၁၅ ဦးရှိပြီး ကတုတ်ကျင်း တူးသည့်အပြင် သစ်ခုတ်၊ ဝါးခုတ် ရကြောင်း ၊သို့သော် ပိုက်ဆံဖြင့် ပြန်ရွေးနိုင်သည့် ဒေသခံအချို့ ပြန်လည်လွှတ်မြောက်လာကြောင်း ဖမ်းဆီးခံသူ၏ မိသားစုဝင်များကပြောသည်။
“မူးယစ်ဆေးဝါးရောင်းလို့ အချုပ်ထဲရောက်နေတဲ့ အချို့သူတွေတော့ ပြန်ထွက်လာပြီ။ သူတို့အိမ်ကတော့ ကျပ်သိန်း ၁၇၀ နဲ့ ရွေးရတယ်။ ပြီးခဲ့တဲ့ ရက်ပိုင်းမှပြန်လွှတ်လာတာပါ။ အခုက ပိုက်ဆံပေးနိုင်ရင် သူတို့လွှတ်ပေးတယ်” ဟု ဖမ်းဆီးခံရသည့် အမျိုးသားတစ်ဉီး၏ ဇနီးက ဆိုသည်။
ထိုကိစ္စနှင့် ပတ်သက်၍ ကိုးကန့်တပ် (MNDAA) ၏ ပြန်ကြားရေးတာဝန်ခံကို သျှမ်းသံတော်ဆင့်မှ ဖုန်းဖြင့် ဆက်သွယ်မေးမြန်းခဲ့သော်လည်း ဆက်သွယ်၍မရခဲ့ပေ။
“အခုကအခြေအနေက သိပ်မကောင်းဘူးလေ။ ပြီးတော့ ကျမယောက်ျားကို တပ်သားအဖြစ် စုဆောင်းခံရမှာ ကြောက်တယ်။ ကျမမှာက ကလေးတစ်ယောက်ရှိတယ်” ဟု ၎င်းက ဆိုပြန်သည်။
MNDAA အနေဖြင့် လားရှိုးမြို့အတွင်း မူးယစ်ဆေးဝါးသုံးစွဲသူနှင့် ရောင်းချသူများကိုဖမ်းဆီးမှုရှိကြောင်း ကိုးကန့်တပ် (MNDAA) ၏ လားရှိုးမြို့ ပြန်လည်ထူထောင်းရေးအဖွဲ့မှ တာဝန်ခံတစ်ဉီး ကပြောသည်။
ပြီးခဲ့သည့် “၁၀၂၇ စစ်ဆင်ရေး” ပထမပိုင်းအတွင်း တိုက်ပွဲကြောင့် ထွက်ပြေးတိမ်းရှောင်လာကြသည့် စစ်ဘေးရှောင် လူငယ်များကိုလည်း တပ်သားသစ်အဖြစ် ကိုးကန့်တပ် (MNDAA) မှ အတင်းအဓမ္မ ဖမ်းဆီးခေါ်ဆောင် သွားခြင်းရှိသည်။
Leave a Comments