သျှမ်ပြည် တာချီလိတ်မြို့တွင် ပြန်ပေးဆွဲမှု နှင့် ပတ်သတ်၍ တရာခံ ၆ ဦးကို အသေပစ်ခတ်ပြီး ဖမ်းဆီးမှု ပြုလုပ်ခဲ့ကြောင်း စုံစမ်းသိရသည်။
ပြီးခဲ့သည့် ( ဒီဇင်ဘာလ ၁၃ ရက် ) တာချီလိတ်မြို့ မယ်ခေါင်ရပ်ကွက်၊ အမှတ် ၂ ကမ္ဘောဇဘဏ်အရှေ့တွင် ငွေလဲလှယ်သည့် လုပ်ငန်းကို လုပ်ကိုင်သော အသက် ၇၈ကျော် အမျိုးသားတစ်ဦးကို အမည်မသိ လက်နက်ကိုင်အမျိုးသား ၃ ဦးက ပြန်ပေးဆွဲသွားသည်။
ထိုဖြစ်စဉ်နှင့် ပတ်သတ်၍ ပြန်ပေးဆွဲသွားသည့် အဖွဲ့ကို ယမန်နေ့ ( ဒီဇင်ဘာလ ၁၈ ရက်) တာချီလိတ်မြို့ ၊ ပါဆတ်ရပ်ကွက် အတွင်းရှိ နေအိမ်တစ်ခုတွင် ရဲ့တပ်ဖွဲ့တို့က ဝင်ဖမ်းစဉ် အပြန်အလှန်ပစ်ခတ်မှု ဖြစ်ပွားခဲ့ပြီး ပြန်ပေးဆွဲသူ ၆ ဦး သေဆုံးသွားကြောင်း တာချီလိတ်မြို့ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ပြန်ပေးဆွဲတဲ့အဖွဲ့လိုက်ကို သူတို့နေတဲ့အိမ်မှာပဲ မနေ့က (ဒီဇင်ဘာ ၁၈ ရက်) ဝင်ဖမ်းတာ ပစ်ခတ်မှုဖြစ်ပြီးတော့ ပစ်သတ်လိုက်တယ်။ နောက်ခံမရှိရင်တော့ ပြန်ပေးဆွဲတဲ့လူတွေက ဒီလောက်ထိ လုပ်ရဲမှာ မဟုတ်ဘူး။ရဲတွေကလည်း သူတို့ တကယ်အလုပ် လုပ်ရင်ရတာကို သူတို့မလုပ်တာလေ။”ဟု တာချီလိတ်မြို့ ဒေသခံအမျိုးသားတစ်ဦးက ပြောသည်။
ထိုပြန်ပေးဆွဲခံရသည့် အသက် ၇၈ နှစ်အရွယ်ရှိ အမျိုးသား ဦးရန်ထင်ချန်းကို ဘေးကင်းစွာ ကယ်နိုင်ခဲ့ပြီး၊ ပြန်ပေးဆွဲသည့်အဖွဲ့၏ အလောင်း ၆ လောင်း နှင့်အတူ ပွိုင့်-၃၈၀ အမျိုးအစား သေနတ်(၁)လက်၊ M-16 သေနတ်အရှည်(၁)လက်၊ ကျည်ရောရာ (၂၁)ထောင့်၊ အပြင် ပြန်ပေးဆွဲရာတွင် အသုံးပြုခဲ့သည့် ကားတစ်စီး နှင့် ကားနံပါတ်ပြားအစုံ (၆) စုံ၊ ကျည်ကာအင်္ကျီ (၂) ထည်၊ ပဲခူးတိုင်းရဲ တပ်ဖွဲ့ တံဆိပ်ပါ (၁) ထည် နှင့် စိတ်ကြွရူးသွပ်ဆေးပြား စုစုပေါင်း (၆၅,၀၀၀)ပြား တွေ့ရှိရကြောင်း ရဲတပ်ဖွဲ့ထုတ်ပြန်ချက်အရ သိရသည်။
အလားတူ ယနေ့ (ဒီဇင်ဘာလ ၁၉ ရက်) မနက် ၆ ခွဲကျော် နာရီဝန်းကျင် တာချီလိတ်မြို့ ဆန်ဆိုင်းရပ်ကွက် ( ၄ ) လမ်းကြားတွင် အမျိုးသမီးတစ်နေအိမ်ရှေ့ ထွက်စဉ် အမျိုးသာနှစ်ဦးက ဆိုင်ကယ်စီးလာ၍ ပိုက်ဆံအိတ်ကို လုယူခဲ့ကြောင်း တာချီလိတ်မြို့ ဒေသခံအမျိုးသမီးတစ်ဦး ဆက်ပြောသည်။
“ဒီနေ့ မနက်အစောကြီးမှာလည်း ဆန်ဆိုင်းရပ်ကွက် ၄ လမ်းထဲမှာ အမျိုးသမီးတစ်ယောက်ရဲ့ ပိုက်ဆံအိတ်ကို ဆိုင်ကယ်စီးလာတဲ့ အမျိုးသားနှစ်ယောက်ကလုပြေးသွားတာ။ဆိုင်ကယ် မြန်မြန်မောင်းပြီး အိတ်ကိုဆွဲတော့ ကောင်မလေးကခေါင်းနဲ့ မြေကြီးတိုက်သွားတော့ ခေါင်းတောင်ချုပ်လိုက်ရတယ်လို့ပြောတယ်။”ဟု ၎င်းကပြောသည်။
တာချီလိတ်မြို့အတွင်း ပစ်ခတ်မှုများ၊ ခိုးယူ လုယက်မှု၊ပြန်ပေးဆွဲမှု များ နေ့စဉ်ဖြစ်ပွားနေသည့်အတွက် မြို့အတွင်းလုံခြုံမှုများကင်းမဲ့နေပြီး ဒေသခံများအတွက် ပိုမိုစိုးရိမ်နေရကြောင်း တာချီလိတ်မြို့ဒေသခံ အမျိုးသမီးတစ်ဦး ထပ်မံလောင်းပြောသည်။
“ကျမတို့ မိန်းကလေးအတွက်က တကယ်ကိုလုံခြုံမှုဆိုတာ ရှိကိုမရှိတော့ဘူး။လုလက်တာတွေက နေ့တိုင်း လိုလိုဖြစ်နေတာ သတင်းမထွက်ကြတာပဲရှိတာ။ မနက်မိုးလင်းရင်တော့ တံခါးတွေမဖွင့်ရဲဘူး။ ညလည်း ၇ နာရီကျော်ရင် သိပ်မထွက်ရဲဘူး။ အဖော် ၃ယောက်ပါတောင် ပိုက်ဆံအိတ်ဆွဲဖူးတော့ တကယ်ကြောက် ဖို့ကောင်းတယ်။အိမ်နဲ့ အလုပ်သွားတောင် စိုးရိမ်ရတဲ့ အခြေနေပေါ့။”ဟု တာချီလိတ်မြို့ ဒေသခံအမျိုးသမီးတစ်ဦးက ပြောသည်။
စစ်တပ်မှ အာဏာသိမ်းပြီး နောက်ပိုင်း တာချီလိတ်မြို့တွင် အနယ်နယ်အရပ်ရပ်ရှိ လူပေါင်းစုံမှ လောက်ရောက် အလုပ်လုပ်ကိုင်နေသည့်အပြင် အလောင်းကစားဝိုင်းများ၊အွန်လိုင်းငွေလိမ်ဂိုဏ်းများ၊လက်နက်ကိုင်များလည်း ပေါများ နေသည့်အတွက် ဓားပြတိုက်၊ ခိုးဆိုးလုယက် ဒုစရိုက်များလည်း နေ့စဉ်နှင့် အမျှပေါများလာပြီး မြို့တွင်းလုံခြုံရေးမရှိကြောင်း တာချီလိတ်မြို့ဒေသခံများကပြောသည်။
Leave a Comments