သျှမ်းပြည် တောင်ပိုင်း ပအိုဝ်းပြည်သူ့စစ် PNO သည် စစ်အင်အားထောင်ချီ ရုပ်ထွက်ပြပြီးနောက် အခွန်ကောက်ခံမှုသည် ယခင်ကထက် ပိုများလာကြောင်း ဒေသခံများ သတင်းပေးပို့ချက်အရ သိရသည်။

လက်ရှိ သျှမ်းပြည်တောင်ပိုင်း ဟိုပုံးမြို့နယ် နမ့်ခုတ်ကျေးရွာ၊စံကားဒေသတို့တွင် စစ်ကောင်စီလက်အောက်ခံ ပအိုဝ်းပြည်သူ့စစ် PNOက ပြီးခဲ့သည့် ဒီဇင်ဘာလ ဒုတိယပတ်မှစ၍ ကားရှိ သောအိမ်များကို အခွန်ကောက် နေကြောင်း ဟိုပုံးမြို့နယ် အသက် ၄၀ ဝန်းကျင် အမျိုးသားတစ်ဦးက သျှမ်းသံတော်ဆင့်ကို ပြောသည်။

“သူတို့က ပအိုဝ်းလူမျိုးကို အဓိကထားပြီးတော့ အရင်ကောက်တာ။ တခြားလူမျိုးတွေကိုတော့ လူကြည့်ပြီး ကောက်တယ်။စံကားတို့၊ဟိုပုံးမြို့က အနီးအနားရွာတွေ‌ကိုရော သူတို့က ရွာတွေဘက်ကိုကြည့်ပြီးတော့ ကောက်တာ။ရွာတွေ မှာကတော့ ကားငယ်တွေက ၃ သောင်းထားကောက်တယ်။မြို့ပေါ်ကတော့ ၅ သောင်းထည့် ရတယ်”ဟု ၎င်းအမျိုးသားကဆိုသည်။

စစ်ကောင်စီလက်အောက်ခံ ပအိုဝ်းပြည်သူ့စစ် PNOထံ ကားနှင့် ထော်လာဂျီတစ်စီးလျှင် ကျပ်ငွေ ၅ သောင်း၊ တွဲကား (၁၂) ဘီးတစ်စီးလျှင် ကျပ်ငွေ ၁ သိန်း စသဖြင့် အခွန်များကို မကြာခဏပေးဆောင်နေရသည့်အတွက် ဒေသခံအတွက် အခက်အခဲများ ကြုံတွေ့နေရကြောင်းကြောင်း ၎င်းက ပြောသည်

“ကျနော်တို့ကို ဒီလိုတွေကောက်နေတာက ပိုခက်ခဲစေတယ်။ အခွန်တွေက ခဏခဏပဲကော ကောက်နေတာ။ သူတို့စားဖို့ပဲ ပြည်သူတွေကို ကြည့်တာလည်း မဟုတ်ဘူး။ ပြည်သူ့တွေအလုပ် လုပ်စားဖို့လည်း ခက်နေတဲ့ အချိန်ကြီးကော အခုက အနိုင်ကျင့် နေတာနဲ့ တူတူပဲလေ။ မြို့နဲ့ဝေးတဲ့ ရွာတွေဆိုလည်း ကားတွေလိုင်စဉ်ရှိရှိ မရှိရှိ သူတို့ကောက်တာပဲ။ စစ်မှုထမ်းဖို့ဆိုလည်း ၃ သောင်းဆိုရင်ပေးရပြန်ရော” ဟု အသက် ၄၀ အမျိုးသားက ဆက်ပြောသည်။

စစ်ကောင်စီလက်အောက်ခံ PNO စစ်အင်အားပြပြီးနောက် ၎င်းတို့လုပ်ရှားသည့် ဟိုပုံးမြို့နယ်၊ ဆီဆိုင်မြို့နယ်၊ ညောင်ရွှေမြို့နယ်၊ပင်လောင်းမြို့နယ်တို့တွင် ဒေသခံများထံမှ အကြောင်းအမျိုးမျိုးပြ၍ ဆက်ကြေး ကောက်ခံမှုများပြုလုပ်နေခဲ့သည်။

PNO တပ်ဖွဲ့သည့် ကားအခွန်ငွေ၊ ထော်လာဂျီ အခွန်ငွေများကောက်ယူသည့်အပြင် PNO ၏ စစ်သားများအတွက် ငွေကြေးများလည်း ကောက်ယူခြင်း၊ စစ်မှုထမ်းလူဉီးရေ ကောက်ယူခြင်းတို့လည်း ထပ်မံရှိသည့်အတွက် လူငယ်များသည် တိုင်းတပါးသို့ ထွက်ပြေးတိမ်းရှောင်မှုများရှိလာကြောင်း ဆီဆိုင်မြို့နယ် အသက် ၃၅နှစ်အရွယ် ရှိ အမျိုးသမီးကပြောသည်။

“ အခုPNO က နည်းမျိုးစုံ ငွေကောက်နေတာ။ ဝင်ငွေမရှိ စားဖို့တောင်ခက်နေချိန် ကားမရှိ ထော်လာဂျီ မရှိရင်လည်း စစ်မှုထမ်းအတွက် ငွေကြေးကောက်ယူပြန်တယ်။ စစ်မှုထမ်းလည်းကောက် ငွေလည်းကောက် နေလို့မကောင်းဘူး” ဟု ၎င်းကပြောသည်။

ထိုပြင် စစ်ကောင်စီလက်အောက်ခံ PNO သည် ပင်လောင်းမြို့နယ်၊ ဆီဆိုင်မြို့နယ်နှင့် ဖယ်ခုံမြို့နယ်ရှိ တိုက်ပွဲများတွင် စစ်ကောင်စီတပ်နှင့် အတူပါဝင်တိုက်ခိုက်နေပြီး ပြည်သူ့နေအိမ်မီးရှို့ခြင်း၊ ပေါ်တာဆွဲခြင်း တို့ကိုပြုလုပ်နေသည်။

ပြီးခဲ့သည့် နိုဝင်ဘာလ ဒုတိယပတ်တွင် ညောင်ရွှေမြို့နယ် စံကားဒေသတွင် ပအိုဝ်းပြည်သူ့စစ် PNO မှအရပ်သား နေအိမ် အတွင်းထိ ဝင်ရောက်၍ ခြိမ်းခြောက်ကာ တန်ဖိုးရှိ ပစ္စည်းများကို အတင်းအဓမ္မ ယူဆောင်သွား ကြောင်း သိရသည်။

စစ်ကောင်စီလက်အောက်ခံ PNO ပြည်သူ့စစ်အဖွဲ့သည် မြန်မာပြည်အတွင်းရှိ ဟိုတယ်လုပ်ငန်း ၊ စတီးလ်လုပ်ငန်း၊ ဝိုင်း နှင့် ဘိလပ်မြေလုပ်ငန်း၊ ကျောက်စိမ်းတူးဖော်ရေးလုပ်ငန်း ၊ပတ္တမြား နှင့် ကျောက်မျက် ရတနာလုပ်ငန်း၊ ရွှေ၊ ခနောက်စိမ်း ခဲမဖြူ၊ အဖြိုက်နက် အပြင် အိမ်ခြံမြေလုပ်ငန်းများ ပိုင်ဆိုင်မှုများစွာရှိနေကြောင်း သိရသည်။