သျှမ်းပြည် တောင်ကြီးမြို့နယ်အတွင်း ညbက်အစစ်အဆေးများပိုမိုတင်းကြပ်လာကာ ပေါ်တာဆွဲဖမ်းဆီးမှုများရှိနေပြီး ဖမ်းဆီးခံသူများမှာလည်း ငွေကျပ်သိန်းဆယ်နှင့်ချီပေးဆောင်မှ လွှတ်ပေးနေကြောင်း စုံစမ်းသိရသည်။
ပြီးခဲ့သည့် နိုဝင်ဘာလမှ စတင်၍ တောင်ကြီးမြို့အတွင်း ယခင်ကထက် စစ်ဆေးတင်းကြပ်မှုများ များပြားလာပြီးနောက် ညအချိန်အပြင်သည့် အမျိုးသားများကို အဓိက ဖမ်းဆီးမှုပြုလုပ်နေပြီး ဖမ်ဆီးထားသောသူများအား ငွေကျပ်သိန်းဆယ်ချီ ပေးဆောင်မှ ပြန်လည်လွတ်ပေးကြောင်း မြို့ခံအမျိုးသမီးတစ်ဦးက သျှမ်းသံတော်ဆင့်သို့ပြောသည်။
“ပိုက်ဆံရှိတဲ့သူတွေကတော့ ပြန်လွတ်ဖို့ သိန်းဆယ်ချီပေးရတယ်၊ မရှိတဲ့သူတွေကတော့ သူတို့ အစားလိုက်ပေးရတာပေါ့၊ တကယ့်လာဘ်ပေးလာဘ်ယူ ဈေးကွက်ကြီးဖြစ်နေတာ” ဟု ၎င်းအမျိုးသမီးက ဆိုသည်။
ထို့အပြင် ဒီဇင်လာလ (၁၄) ရက်က တောင်ကြီးမြို့ ကန်အောက်ရပ်ကွက်အတွင်း လူငယ် အယောက် ၂၀ ဝန်းကျင်ခန့် ဖမ်းဆီးခံခဲ့ရကြောင်းလည်း အသက် ၄၅ နှစ်အရွယ် မြို့ခံအမျိုးသမီးတစ်ဦးက သျှမ်းသံတော်ဆင့်သို့ပြောသည်။
“မနေ့ရှေ့တစ်ရက်(ဒီဇင်ဘာ ၁၄ရက်) ကတော့ ကန်အောက်ရပ်ကွက် က ၂၀ လောက်ပါသွားတယ်၊ ဘာတွေဆက်ဖြစ်လဲ ဆက်လုပ်နေလဲဆိုတာတော့ မကြားသေးဘူး၊ မြို့ထဲမှာတော့ လဒကုန်းနားမှာတော်တော်လေးစစ်နေတယ်” ဟု ၎င်းအမျိုးသမီးကပြောသည်။
ထိုသို့ ပေါ်တာဆွဲဖမ်းဆီးခံရသည့်လူငယ်များနှင့်ပတ်သက်၍ သတင်းအချက်အလက်များထပ်မံရရှိနိုင်ရန် သျှမ်းသံတော်ဆင့်မှ စုံစမ်းနေဆဲဖြစ်သည်။
ဖမ်းဆီးခံရသူအများစုသည် လက်လုပ်လက်စား အခြေခံလူတန်းစားများဖြစ်နေသည့်အတွက် ဖမ်းဆီးခံရပြီးနောက်ပိုင်းတွင် သတင်းအစအနပျောက်ကွယ်သွားကာ စစ်သင်တန်းနေရာများသို့ ပို့ဆောင်ခံရခြင်း၊ စစ်ကောင်စီအလိုကျ ရှေ့တန်းသို့ပို့ဆောင်ခံရခြင်းကို လူမသိသူမသိကျူးလွန်ခံနေရသည့် အခြေအနေများစွာရှိနေကြောင်းလည်း တောင်ကြီးမြို့နယ်၊ အေးသာယာမြို့ ဒေသခံများထံမှသိရသည်။
တန်ဆောင်တိုင်ပွဲတော် ကာလအတွင်း ဖမ်းဆီးခံခဲ့ရပြီး စစ်သင်တန်းပေးကာ ရှေ့တန်းသို့ပို့ဆောင်ခံရသည့် လူငယ် (၁၄၀) ကျော်ရှိခဲ့ကြောင်း ထိုသို့ဖမ်းဆီးခံခဲ့ရသည့် လူငယ်များတွင်လည်း အမျိုးသမီးများလည်းပါဝင်ခဲ့ကြောင်းလည်း သိရသည်။
၂၀၂၄ ခုနှစ်ဖေဖော်ဝါရီလ ၁၀ ရက်တွင်အသက်သွင်းလိုက်သော စစ်မှုမထမ်းမနေရ ဥပဒေသည် မြန်မာနိုင်ငံတွင်းရှိ လူငယ်၊ လူလတ်ပိုင်းများ၏ အနာဂတ်များအပေါ် ဆိုးကျိုးများစွာသက်ရောက်ခဲ့ပြီး လက်ရှိကာလတွင်လည်း ထိုဥပဒေကို အသုံးချကာ စစ်ကောင်စီလက်အောက်ခံ စစ်တပ်၊ ရဲ နှင့် ရပ်ကွက်အုပ်ချုပ်ရေးအဖွဲ့များမှ ဝင်ငွေရနိုင်သည့်နည်းလမ်းအဖြစ် ဖန်တီးအသုံးချနေခြင်းဖြစ်သည်။
အလုပ်သင် သတင်းထောက် ယူဂျင်း ရေးသားသည်။
Leave a Comments