သျှမ်းပြည်မြောက်ပိုင်း TNLA ထိန်းချုပ်ထားသည့် နမ့်ခမ်းမြို့တွင် ဆေးဝါးစတင်ပြတ်လပ်မှုကြောင့် ဒေသခံများ စိုးရိမ်နေကြောင်း စုံစမ်း သိရသည်။
တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နမ့်ခမ်းမြို့တွင် ဆေးရုံ ၊ ဆေးခန်း နှင့် ဆေးဆိုင်များတွင် ဆေးဝါးပြတ်လပ်မှု စတင်လာသဖြင့် ရောဂါဝေဒနာ ခံစားနေရသည့် ဒေသခံများ အချို့ စိုးရိမ်နေကြောင်း နမ့်ခမ်းဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ဆေးဝါးပြတ်လပ်သည့်ထဲတွင် ငှက်ဖျားဆေးသည် နမ့်းခမ်းမြို့နှင့် မူဆယ်မြို့နယ် ဘက်တွင် လုံးဝပြတ်လပ်သွားခြင်းကြောင့် ၎င်း ငှက်ဖျားရောဂါ ခံစားနေရသည့် ဒေသခံတစ်ဦးသည် အသက် အန္တရာယ်ထိ စိုးရိမ်နေရကြောင်း ၎င်းက ဆက်ပြောသည်။
၎င်းတို့ အပြန်အလှန်ပိတ်ဆို့မှုများ ပြုလုပ်ပြီးနောက် နမ့်ခမ်းမြို့သည် ရွှေလီမြို့နှင့် မူဆယ်မြို့နယ်ကိုသာ ဝမ်းစာအတွက် အဓိက အားထားရသည့် ဒေသ တစ်ခုဖြစ်သည်။
“လက်ရှိ ဆေးရုံ၊ ဆေးခန်း နဲ့ ဆေးဆိုင်ဘက်မှာဆို ဆေးဝါးတွေ တော်တော်ပြတ်လပ်လာတာ တွေ့ရတယ်။ နှစ်ရှည်ရောဂါ ခံစားနေရတဲ့သူတွေ သောက်တဲ့ဆေးတွေဆို မရတော့ဘူး။ အခု လုံးဝပြတ်လပ်သွားတာ ငှက်ဖျားဆေးဖြစ်နေတယ်။ ငှားဖျားရောဂါ ခံစားရတဲ့သူက သူ့ဆေးနဲ့ မှ သက်သာမြန်တာ ခုက အရမ်း စိုးရိမ်နေရတယ်”ဟု ၎င်းက ပြောသည်။
ပြီးခဲ့သည့် (ဒီဇင်ဘာလ ၁ ရက်)တွင်လည်း စစ်ကောင်စီတပ် ထိန်းချုပ်ထားသည့် မူဆယ်မြို့နှင့် TNLA ထိန်းချုပ်ထားသည့် နမ့်ခမ်းမြို့အကြား ဂိတ်စခန်း (၅) နေရာထက်မနည်းတွင် ခြံထွက်သီးနှံနှင့် တပိုင်တနိုင် ဈေးသည်များကို နှစ်ဘက်တပ်ဖွဲ့များမှ ဖြတ်သန်းခွင့် မပေးဘဲ အပြန်အလှန် ပိတ်ပင်တားမြစ်ထားကြောင်း သိရသည်။
“၁၀၂၇ စစ်ဆင်ရေး” စတင်ပြီးနောက် မူဆယ်မြို့နယ်ရှိ အစိုးရဆေးရုံသည် ဆရာဝန် လုံလောက်မှုမရှိသည့်အပြင် ဆေးဝါး လုံးလောက်မှုမရှိခြင်းကြောင့် ပုဂ္ဂလိကဆေးရုံကိုသာ အားကိုးနေရနေသည့် အခြေအနေမျိုး ရှိနေကြောင်း မူဆယ်ဒေသခံ တစ်ဦးက ပြောသည်။
မူဆယ်မြို့ထက် နမ့်ခမ်းမြို့က ဆေးကုပေးမည့် ဆရာဝန်များရှိသော်လည်း ဆေးဝါးလုံလောက်မှုမရှိသည့် အတွက် အခြေခံလူတန်းစားအတွက် အခက်ကြုံတွေ့နေရကြောင်း ၎င်းက ဆက်ပြောသည်။
“ပြောရမယ်ဆို “၁၀၂၇ စစ်ဆင်ရေး”ကတည်းက စပြတ်တာပဲ။ လက်ရှိ ပုဂ္ဂလိကဆေးရုံကိုသာ အားကိုးနေရနေတယ် ဆိုပေမဲ့ ဆေးဝါးမလုံလောက်မှုတွေ တော်တော်များလာတယ်။ အခု နမ့်ခမ်းမှာက ဆရာဝန်တွေ စုံလာတယ် မူဆယ်ကနေတောင် သွားကုကြသေးတယ် ဒါပေမဲ့ ဆေးဝါးလုံလောက်မှု မရှိတော့ ခက်ခဲဖြစ်စေတာမျိုးရှိတယ်”ဟု ၎င်းက ပြောသည်။
စစ်ကောင်စီတပ် ထိန်းချုပ်ထားသည့် မူဆယ်မြို့ နယ်စပ်ဂိတ်များဖြစ်သည့် ဆင်ဖြူဂိတ်နှင့် နန်းတော်ဂိတ်တို့တွင် ကုန်ပစ္စည်း သယ်ယူခွင့်ပြုသော်လည်း တရုတ်အာဏာပိုင်များ က ကုန်ပစ္စည်းများကို ကန့်သတ် သယ်ဆောင်ခွင့်ပြုကြောင်း မူဆယ်ဒေသခံများထံမှ သိရသည်။
ထို့အပြင် TNLA ထိန်းချုပ်ထားသည့် နမ့်ခမ်းမြို့နှင့် MNDAA ထိန်းချုပ်ထားသည့် ပန်ဆိုင်းမြို့ဘက်သို့ ကုန်စည် သယ်ယူခွင့်မရအောင် တရုတ်အာဏာပိုင်ဘက်က တင်းတင်းကြပ်ကြပ် ထပ်မံစစ်ဆေးကြောင်း ဒေသခံများက ပြောဆိုသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments