သျှမ်းပြည်တောင်ပိုင်း၊ တောင်ကြီးမြို့ တွင် အသက် ၁၈ နှစ်မှအသက် ၃၅ နှစ်ကြား လူငယ်ရှိသည့် နေအိမ်ကို စစ်ကောင်စီမှ ကျပ်ငွေ တစ်သိန်း ကောက်ခံနေသည်ဟု မြို့ခံများထံ စုံစမ်းသိရသည်။

ပြီးခဲ့သည့် နိုဝင်ဘာလမှ စပြီး စဝ်စံထွန်း ရပ်ကွက်၊ ရတနာသီရိ ရပ်ကွက်၊ ချမ်းမြ၊ ရွှေတောင်၊ ကံသာ၊ ညောင်ဖြူစခမ်း၊ဘုရားဖြူ ၊ ကျောင်းကြီးစု နှင့် ကံကြီးရပ်ကွက် စသည်တို့တွင် စစ်ကောင်စီ သတ်မှတ်ထားသည့် အသက်ရွယ်ရှိသည့် နေအိမ်များကို တစ်လလျှင် ကျပ်ငွေ တစ်သိန်းကောက်ခံ နေသည်ဟု မြို့ခံများထံမှ သိရသည်။

ထို့အပြင် တောင်ကြီးမြို့ လမ်းမတော်ရပ်ကွက်တွင် ရပ်ကွက်အုပ်ချုပ်ရေးမှူးနှင့် စာရေးတို့ပေါင်းကာ ကျပ်ငွေ(၂သိန်း) ကောက်ခံနေ သောကြောင့် ထွေထွေအုပ်ချုပ်ရေးမှူးထံ တိုင်ကြားထားသော်လည်း အရေးယူဆောင်ရွက်မှု လုပ်ဆောင်မှု မရှိကြောင်း ၎င်းရပ်ကွက်နေအမျိုးသမီးတစ်ဉီးက သျှမ်းသံတော်ဆင့်ကိုပြောည်။

“တခြားရပ်ကွက်တွေဆို တစ်သိန်းပဲလို့ကြားတာ။ အဆင်မပြေတဲ့သူဆို ၅ သောင်းပဲတဲ့ ။ ကျမတို့ ရပ်ကွက်က နှစ်သိန်းကောက်တာ။ ကျမတို့လို အခြေခံလူတန်းစားတွေ ဆိုတော့ မတတ်နိုင်ဘူးလေ။ ထွေအုပ်တွေကို သွားတိုင်တော့ ဘာမှ မလုပ်ရဲဘူး။အခုက သူတို့ခေတ်ပဲ ငြိမ်ခံရုံပဲရှိမှာပေါ့။” ဟု လမ်းမတော် ရပ်ကွက်နေ အမျိုးသမီး တစ်ဦးက ပြောသည်။

ကုန်ဈေးနူန်းအခြေနေနှင့် စားဝတ်နေရေးအတွက် အခက်အခဲရှိသည့်အပြင် စစ်မှုထမ်းငွေအတွက် ငွေတိုးယူပြီး ထည့်နေရကြောင်း ၎င်းက ထပ်လောင်းပြောသည်။

ဆက်လက်ပြီး တောင်ကြီးမြို့ ကံကြီးရပ်ကွက်တွင်လည်း ရပ်ကွက်အုပ်ချုပ်ရေးမှူးထံသို့ ငွေထည့်ရကြောင်းနှင့် အခြေခံလူတန်းစားများအတွက် အခက်ခဲ ရှိကြောင်း ရပ်ကွက်နေ ခွန်စိုး (အမည်လွှဲ) က သျှမ်းသံတော်ဆင့်ကိုပြောသည်။

“လတိုင်းတစ်သိန်းထည့်ရမှာတဲ့၊ ကျနော်တို့လို လူလတ်တန်းစားအတွက်က အဆင်ပြေပေမဲ့ အခြေခံ လူတန်းစားအတွက်ကျတော့ အခက်ခဲရှိတယ်လေ။သူတို့က ဝင်ငွေလည်း နည်း ကုန်ဈေးနူန်းတွေကတက်နဲ့ စစ်မှုထမ်းအတွက်ပါ ငွေထည့်ရတော့ ဘယ်ကျန်တော့မလဲ။” ဟု ၎င်းကပြောသည်

ယခင်က စစ်မှုထမ်းခေါ်မှသာ ငွေထည့်ရပြီး ယခု ကာလတွင် လစဉ် လတိုင်း သတ်မှတ်ထားသည့် ငွေ ကို အုပ်ချုပ်ရေးမှူးထံ ထည့်ရမည်ဟု တောင်ကြီးဒေသခံများက ပြောသည်။ ။

စစ်မှုထမ်းအတွက် လစဉ်တိုင်း ငွေထည့်ရန် ပြီးခဲ့သည့် နိုဝင်ဘာလကတည်းက စစ်ကောင်စီနှင့် ရပ်ကွက် အုပ်ချုပ်ရေးမှူးက သတ်မှတ်လိုက်သည်ဟု မြို့ခံများထံမှ သိရသည်။

ယခုလက်ရှိတောင်ကြီးမြို့တွင် စစ်ကောင်စီနှင့် ရဲတပ်ဖွဲ့များ ပူးပေါင်းကာ ညဘက်တွင် စစ်မှုထမ်းအတွက် ပေါ်တာလိုက်ဆွဲနေသည်ဟု မြို့ခံများထံမှ သိရသည်။

အလုပ်သင် သတင်းထောက် နန်းလရောင် ရေးသားသည်။