သျှမ်းပြည်တောင်ပိုင်း၊ ရပ်စောက်မြို့နယ် ကျောက်ဂူဒေသ တိုက်ပွဲ(၁၀) ရက်တာအတွင်း စစ်ကောင်စီတပ်သား (၅၀ )ကျော်သေဆုံးပြီး လက်နက်များ သိမ်းဆည်းရမိသည်ဟု DPLF မှ ပြောဆိုသည်။
ပြီးခဲ့သည့် နိုဝင်ဘာလ (၃၀ ရက်) မှ ဒီဇင်ဘာလ ၉ ရက် အထိ ဓနုပြည်သူ့လွတ်မြောက်ရေးတပ်တော် (DPLA)နှင့် စစ်ကောင်စီတပ်တို့ တိုက်ပွဲ ဖြစ်ပွားခဲ့ကြပြီး စစ်ကောင်စီ တပ်သား (၅၀ ) ကျော် သေဆုံးကာ လက်နက် အများပြား သိမ်းဆည်းရမိသည် ဟုDPLF က ဒီဇင်ဘာ ၉ရက်တွင် ထုတ်ပြန်ထားသည်။
“တနေ့ကတော့ စစ်ကောင်စီဖက်က အလောင်း( ၃၀ )ကျော်တွေ့တယ်။ တိုက်ပွဲဖြစ်ပွားတဲ့ အတွင်း (၁၀ ) ရက်မှာတော့ (၅၀ ) ကျော်တယ်။ အလောင်းတွေတော့စုပုံနေတယ်၊ တချို့ကလည်း ပြန့်ကျဲနေတယ်။ ကျနော်တို့ဘက်က အနည်းငယ်တော့ ထိခိုက်မှု ရှိတယ်” ဟု DPLF ၏သတင်းနှင့် ပြန်ကြားရေး မှ တာဝန်ရှိသူတစ်ဉီးက သျှမ်းသံတော်ဆင့်ကို ပြောသည်။
တိုက်ပွဲ ဖြစ်ပွားရာ ကျေးရွာအနီးမှ စစ်ဘေးရှောင်များသည် တစ်ထောင်ဝန်းကျင်ရှိပြီး နီးစပ်ရာ တောတောင်နှင့် ဆွေမျိုးရှိသည့် ကျေးရွာဖက်သို့ စစ်ရှောင်နေကြရသည်ဟု ကျောက်ဂူဒေသခံတစ်ဦးက ပြောသည်။
“ လောဆယ်တော့ တောတောင်နဲ့ သူတို့ဆွေမျိုးရှိတဲ့ဘက် ရှောင်နေကြတယ်။ စစ်ရှောင်တွေက ပြန့်ကျဲနေတော့ အတိအကျသိရဖို့ခက်တယ်။ တစ်ထောင်ဝန်းကျင်တော့ ရှိမှာ။ လောဆယ် စစ်ရှောင်လာကြတော့ စားသောက်စရာတွေတော့လိုတယ်။အရင်ကတော့ ခဏခဏဖြစ်နေကြဆိုပေမယ့် ကြောက်တယ်။ ရွာကိုပြန်လို့မရမှာတွေ စိတ်ပူတယ်။” ဟု အဆိုပါ ဒေသခံ အမျိုးသားတစ်ဦး က ပြောသည်။
တိုက်ပွဲ ဖြစ်ပွားနေသည့် ဒေသနှင့် အနီးနားရှိ ပြည်သူများကို စစ်ကောင်စီတပ်နှင့် ဝေးရာ ပြောင်းရွှေ့ နေထိုင်ကြရန် အသိပေးထားပြီး လုံခြုံဘေးကင်းသည့် နေရာ များတွင် စစ်ဘေးရှောင်ကြရန် DPLFက အသိပေးပြောထားသည်။
“ ခက်ခဲတဲ့ ကာလဖြစ်ပေမဲ့ အားတင်းထားကြဖို့နဲ့ ဆက်လက်ပူးပေါင်း တော်လှန်သွားကြဖို့ ပြောလိုပါတယ်။ ဘေးကင်းတဲ့ နေရာ စစ်ရှောင်ကြဖို့လဲ ပြောလိုပါတယ်။” ဟု DPLF ၏သတင်းနှင့် ပြန်ကြားရေးက ထပ်လောင်းပြောသည်။
နောင်ချိုမြို့နယ် တောင်ခမ်း သို့ ရပ်စောက်မှ တစ်ဆင့် စစ်ကူသွားသည့် စစ်ကောင်စီတပ်များနှင့် DPLA တို့ တိုက်ပွဲ ဖြစ်ပွားခဲ့ကြသည်ဟု ထုတ်ပြန် ချက်တွင် ထည့်သွင်းထားသည်။
အလုပ်သင် သတင်းထောက် နန်းလရောင်ရေးသားသည်၊
Leave a Comments