သျှမ်းပြည် ဆီဆိုင်မြို့နယ် တွေပူးကျေးရွာမှ ရွာသူကြီး တစ် ဦးကို စစ်ကောင်စီလက်အောက်ခံ ပအိုဝ်းပြည်သူ့စစ် PNO ကဖမ်းဆီးသွားခဲ့ရာ ယနေ့အချိန်ထိ ပြန်လွှတ်လာပေးခြင်းမရှိဘဲ သတင်းအစအနမရသေးကြောင်း စုံစမ်းသိရသည်။

 ဒီဇင်ဘာလ ၇ ရက် ည ၁၁ နာရီခန့်တွင် စစ်ကောင်စီလက်အောက်ခံ  PNO သည် တွေပူးကျေးရွာ ရွာသူကြီး ဖြားဒုံးကျော်ကို ၎င်း၏နေအိမ်ပေါ်သို့ ဝင်ရောက်ဖမ်းဆီးခဲ့ခြင်း ဖြစ်ကြောင်းပအိုဝ်းပြည်သူ့ လွတ်မြောက်ရေး တပ်မတော် PNLA က ယမန်နေ့ (ဒီဇင်ဘာလ ၈ ရက်နေ့)တွင် သတင်းထုတ်ပြန်သည်။ 

လက်ရှိအချိန်ထိ ဖမ်းဆီးခံရသည့် ရွာသူကြီး ဖြားဒုံးကျော်သည် ယနေ့အချိန်ထိ မည်သည့်နေရာတွင် ထိန်းသိမ်းထားခြင်း မသိရှိရဘဲ  သတင်းအစအနမရသေးကြောင်း PNLA ၏ ပြန်ကြားရေးတာဝန်ခံ ခွန်ရိန်းယံက ပြောသည်။ 

“စစ်ကောင်စီလက်အောက်ခံ ပြည်သူ့စစ် PNO က ရွာသူကြီးဖမ်းသွားတာ။ အဲ့ဒါအခုထိ ဆက်သွယ်လို့မရဘူး။ ပြန်လည်းမလွတ်လာသေးဘူး” ဟု ခွန်ရိန်းယံက ပြောသည်။ 

အဆိုပါ ကိစ္စနှင့် ပတ်သက်၍ ပအိုဝ်းပြည်သူ့စစ် PNO ၏ ဗိုလ်မှူး ခွန်သန်းကြွယ်ကို သျှမ်းသံတော်ဆင့်မှ ဆက်သွယ်မေးမြန်းခဲ့ရာ “အကြောင်းတစ်ခုခုရှိလို့ ဖမ်းတာထင်တယ်။ အလကားနေ ဒီတိုင်းဘယ်သူက ဖမ်းမှာလဲ​။ အဲ့ဘက်လည်း ဖုန်းလိုင်းအဆက်သွယ်မရဘူး” ဟု ပြောသည်။ 

ထို့အပြင် ရွာသူကြီး ဖမ်းဆီးခံရခြင်းနှင့် ပတ်သက်ပြီး ကျေးရွာဒေသခံ ပြည်သူများကလည်း လိုက်လံစုံစမ်းနေဆဲ ဖြစ်ကြောင်း သိရသည်။

ဆီဆိုင်မြို့နယ် လွယ်ပွတ်ကျေးရွာဒေသခံ တစ်ဦးက “ PNO ကဖမ်းတဲ့ရွာသားတယောက်ထွက်ပြေးသွားလို့ ရွာသူကြီးကိုဖမ်းတာ” ဟု သျှမ်းသံတော်ဆင့်ကို ပြောသည်။ 

ပြီးခဲ့သည့် ၂၀၂၄ မေလ ၉ ရက်တွင်လည်း စစ်ကောင်စီတပ်နှင့် ပအိုဝ်းပြည်သူ့စစ် PNO တို့သည် ဆီဆိုင်မြို့နယ် နောင်ရင်းကျေးရွာ ရွာသူကြီး ခွန်ဇာခွန်နှင့် ညီဖြစ်သူ ခွန်ပလွန်ကို တော်လှန်းရေးတပ်ဖွဲ့များကို ထောက်ပံ့သည်ဟုစွပ်စွဲပြီး ဖမ်းဆီးသတ်ဖြတ်ခဲ့သည်။ 

စစ်တပ်အာဏာသိမ်းပြီးနောက်ပိုင်း ပအိုဝ်းပြည်သူ့စစ် PNO သည် စစ်ကောင်စီတပ်နှင့် ပူးပေါင်း၍ သျှမ်း-ကရင်နီ နယ်စပ်ဒေသ ဖြစ်ပွားနေသည့် တိုက်ပွဲများတွင် ပါဝင်တိုက်ခိုက်ပေးနေပြီး ကျေးရွာများ၊ ပြည်သူများကို ဖမ်းဆီး သတ်ဖြတ်နေလျက်ရှိကြောင်း PNLA ဘက်ကပြောသည်။