သျှမ်းပြည်တောင်ပိုင်း၊ ညောင်ရွှေမြို့နယ် မှော်ဘီကျေးရွာ စစ်ကောင်စီဂိတ်တွင် စစ်သားများမှ စက်သုံးဆီ၊ ဆန်၊ ဆေး စသည့် ကုန်ပစ္စည်းများကို သယ်ဆောင်ခွင့်မပေးဘဲ သိမ်းယူမှုများရှိကြောင်း စုံစမ်းသိရှိရသည်။
စစ်ကောင်စီမှ ပြီးခဲ့သည့် နှစ်လအတွင်း ညောင်ရွှေမြို့နယ်၊ မှော်ဘီကျေးရွာ စစ်ဆေးရေးဂိတ်နှင့် သျှမ်း-ကရင်နီနယ်စပ် စစ်ဆေးရေးဂိတ်များတွင် စစ်ကောင်စီမှ ဆန်၊ ဆီနှင့် ဆေးဝါးတို့အပြင် အိမ်သုံးစက်သုံးဆီပုံးများကိုပါ သယ်ဆောင်းခြင်းခွင့်မပြုဘဲ တွေ့ရှိပါက ပစ္စည်းများကို သိမ်းယူထားကြောင်း သျှမ်း-ကရင်နီနယ်စပ်တွင် နေထိုင်သည့် အမျိုးသမီးတစ်ဦးက သျှမ်းသံတော်ဆင့်သို့ပြောသည်။
“ကရင်နီဘက်ကိုလာတဲ့ ကုန်သည်တွေရဲ့ကားတွေကို ဂိတ်ဖြတ်သန်းခလိုမျိုး တစ်စီးဘယ်လောက်ဆိုပြီး သိန်းဆယ်နဲ့ချီအထိတောင်းတာရှိပါတယ်၊ ဆန်တွေ ဆီတွေကတော့ အရင်တည်းကသိမ်းနေတာကြာပြီ ဘတ်ထရီတွေ ဆိုလာတွေဆို ဒီဘက် (ကရင်နီပြည်) ကိုလုံးဝသယ်ခွင့်မပေးဘူး၊ တွေ့တာနဲ့ ဆွဲချပါတယ်” ဟု ထိုအမျိုးသမီးကပြောသည်။
ထိုကဲ့သို့ တင်းကြပ်စစ်ဆေးနေသောဂိတ်များတွင် စစ်ကောင်စီတပ်သားများအပြင် ပအိုဝ်းပြည်သူ့စစ် (PNO) များလည်းပါဝင်ပြီး ကုန်သည်ယာဉ်များထံမှာ ၎င်းတို့စိတ်ကြိုက်ပစ္စည်းများအား သိမ်းဆည်းရယူထားကြောင်း သိရသည်။
“ခုဆို ဆိုင်ကယ်တောင် လူလောက်ပဲ တော်တော်ကံကောင်းမှ ဖြတ်လို့ရတာပါ၊ ဘာပစ္စည်းမှ မပါရပါဘူး၊ ခုဆို လူတောင်မသွားရဲကြတော့တာ များပါတယ်” ဟု ၎င်းအမျိုးသမီးကဆက်ပြောသည်။
လက်ရှိတွင် ထိုသို့ စစ်ကောင်စီနှင့် ပအိုဝ်းပြည်သူ့စစ် PNO မှ ကုန်ပစ္စည်းများသယ်ယူခွင့်မပေးသောကြောင့် သျှမ်း-ကရင်နီနယ်စပ်တွင်နေထိုင်ကြသည့် ပြည်သူများမှာ ဆန်၊ စားနှပ်ရိက္ခာရရှိရန်မလွယ်ကူသည့်အတွက် အခက်အခဲများစွာတွေ့လာရပြီး ရာသီဥတုအေးလာသောကြောင့် ဖျားနာမှုများလည်း ဖြစ်ပေါ်နေလျက်ရှိကြောင်း သိရသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments