သျှမ်းပြည် ပင်းတယမြို့နယ်တွင် စစ်ကောင်စီတပ်နှင့် သျှမ်းပြည် ပြန်လည်ထူထောင်ရေးကောင်စီ/ သျှမ်းပြည်တပ်မတော် (RCSS/SSA) တို့ ထိတွေ့တိုက်ပွဲ ဖြစ်ပွားခဲ့ကြောင်း စုံစမ်းသိရသည်။

ဒီဇင်ဘာလ (၂) ရက် နေ့လယ်ပိုင်းအချိန်တွင် ပင်းတယမြို့နယ် မိုင်းလီကျေးရွာအုပ်စု မန်ကျည်းကုန်းနှင့် နတ်အင်းကျေးရွာအနီးတွင် မူးယစ်ဆေးဝါး သုံးစွဲသူများကို ဖမ်းဆီးရန် ရောက်ရှိလာသည့် RCSS/SSA တပ်ဖွဲ့နှင့် စစ်ကောင်စီတပ်တို့ ထိတွေ့တိုက်ပွဲ ဖြစ်ပွားခဲ့ရာ ရွာသားများ စိုးရိမ်ထိတ်လန့်ကာ ထွက်ပြေးတိမ်းရှောင်ရကြောင်း ဒေသခံများက ပြောသည်။

“RCSS က မူးယစ်ဆေးဝါး သုံးတဲ့လူကို ဖမ်းထားတာ၊ ထွက်ပြေးတဲ့လူကို လိုက်ဖမ်းရင်းနဲ့ မိုင်းလီအုပ်စုထဲ အခြေချတယ်ထင်တယ်။ မိုင်းလီမှာ RCSS ရောက်တော့ ပိုဆိုးသွားတာလေ။ ၂ ရက်နေ့က အလုပ်လုပ်နေတာ တောထဲမှာ၊ ဘေးရွာမှာ ဗုံးကွဲတော့ ကိုယ့်မိသားစုစီ ပြေးတာပေါ့။ မန်ကျည်းကုန်းရွာ တံတားကြီးနားလေ၊ နှစ်ဘက်ကျဆုံး ရှိတယ်”ဟု ပင်းတယဒေသခံ အသက်(၃၀) ကျော်အရွယ် အမျိုးသားတစ်ဦးက သျှမ်းသံတော်ဆင့်ကို ပြောသည်။

တိုက်ပွဲဖြစ်ပွားခဲ့သည့် မိုင်းလီကျေးရွာအုပ်စုသည် ပင်းတယမြို့ အရှေ့မြောက်ဘက် (၁၅) မိုင်ခန့်သာ ကွာဝေးပြီး စစ်ကောင်စီတပ်နှင့် RCSS/SSA တပ်ဖွဲ့ ထိတွေ့တိုက်ပွဲကြောင့် နှစ်ဘက်တပ်သား သေဆုံးမှုရှိပြီး ထိခိုက်ဒဏ်ရာရသူများကို တိုက်နယ်ဆေးရုံတွင် ဆေးကုသပေးနေကြောင်း ဒေသခံများ ပြောဆိုသည်။

ပင်းတယမြို့နယ်အတွင်း စစ်ကောင်စီတပ်နှင့် တိုက်ပွဲဖြစ်ပွားခဲ့သည့် ကိစ္စနှင့် ပတ်သက်၍ RCSS ပြောရေးဆိုခွင့်ရှိသူ ဗိုလ်မှူးစိုင်းခမ်းစံထံ စုံစမ်းမေးမြန်းရန် သျှမ်းသံတော်ဆင့်မှ ဖုန်းဖြင့် ဆက်သွယ်ခဲ့သော်လည်း ဖုန်းစက်ပိတ်ထားသည်။

လတ်တလောတွင် ပင်းတယမြို့နယ်အတွင်းရှိ မိုင်းလီ၊ မိုင်းအင်နှင့် အင်းငယ် ကျေးရွာအုပ်စုများဘက်တွင် စစ်ကောင်စီတပ်နှင့် RCSS/SSA တပ်ဖွဲ့တို့ နီးနီးကပ်ကပ် ဆက်လက်တပ်စွဲထားကြောင်း ဒေသခံများထံမှ သိရသည်။

“အခု စစ်သားတွေ စောင့်နေတာ နေရာတိုင်းပဲ၊ RCSS က သူတို့နဲ့ အနီးမှာပဲ ရှိနေတာလေ။ အဲ့မှာ စကစ ဗုံးတွေ ရှင်းနေတုန်း။ အင်းငယ်ရွာနဲ့ မိုင်းလီ ဘက်မှာ RCSS က ဆေးသုံးတဲ့လူ လိုက်ဖမ်းနေတုန်းပဲ”ဟု ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။

ပြီးခဲ့သည့် စက်တင်ဘာလကလည်း သျှမ်းပြည်အရှေ့ပိုင်း မိုင်းပျဉ်းမြို့နယ်အတွင်း RCSS/SSA တပ်စခန်းကို စစ်ကောင်စီတပ်နှင့် ပြည်သူ့စစ် ပူးပေါင်းတပ်ဖွဲ့တို့က အင်အား (၁၀၀) ခန့်ဖြင့် လာရောက်တိုက်ခိုက်ခဲ့ရာ ထိတွေ့တိုက်ပွဲ ဖြစ်ပွားခဲ့ဖူးသည်။

ပင်းတယမြို့နယ်တွင် သျှမ်းတပ် RCSS/SSA ၊ ပအိုဝ်းပြည်သူ့စစ် PNO အပြင်
ဓနုပြည်သူ့လွတ်မြောက်ရေးတပ် (DPLA) လည်း လှုပ်ရှားနေပြီး ယခင်က ရွာငံပြည်သူ့ကာကွယ်ရေးတပ်ဖွဲ့ (YPDF) နှင့် ဂျိုးဖြူပြောက်ကျားတပ်ဖွဲ့ (JPGF) ပူးပေါင်းတပ်ဖွဲ့တို့ အခြေစိုက်ခဲ့ကြောင်း သိရသည်။