သျှမ်းပြည်တောင်ပိုင်း၊ ဆိုက်ခေါင်မြို့ အရှေ့ဘက် ပွန်ချောင်းအနီးရှိ ပအိုဝ်းအမျိုးသားလွတ်မြောက်ရေး တပ်မတော် (PNLA) တပ်စခန်းတစ်ခုကို ပအိုဝ်းပြည်သူ့စစ် (PNO)မှ သိမ်းယူခဲ့ကြောင်း သတင်းရင်းမြစ်များထံမှ သိရသည်။

ပြီးခဲ့သည့် ဒီဇင်ဘာ (၁)ရက်နေ့တွင် ပွန်ချောင်းအနီးရှိ PNLA ၏ ဆင်ဖြူစခန်းကို PNOမှ သိမ်းယူခဲ့ပြီး PNLAဘက်မှ တပ်သား အလောင်းတစ်လောင်းနှင့်အတူ လက်နက်များကို သိမ်းမိကြောင်း PNO အရာရှိတစ်ဦးက ပြောသည်။

ယခုကဲ့သို့ နယ်နယ်မြေကျူးကျော်လာသည့် PNLA/PNLO ကို ရှင်းထုတ်နေကြောင်းနှင့် ကျန်ရှိနေသည့် စခန်းများကိုလည်း သိမ်းယူသွားမည်ဖြစ်ပြီး ဗန်းမတ်ဒေသဖက်ကို မကျော်လွန်ကြောင်း PNO/PNA အရာရှိတစ်ဦးမှ သျှမ်းသံတော်ဆင့်ကိုပြောသည်။

“ သူတို့က ကျနော်တို့ PNOနယ်မြေထဲ ကျူးကျော်လာတော့ ပြန်မောင်းထုတ်တာပေါ့။ ဆင်ဖြူစခန်းကို သိမ်းလိုက်တယ်။ အလောင်းတစ်လောင်း နဲ့ လက်နက်တေွသိမ်းရတယ်။ နောက်ထပ် ကျန်နေတဲ့ ခမ်းနဂါးစခန်းကိုလဲ ရှင်းထုတ်သွားမယ်။” ဟု အဆိုပါ အရာရှိတစ်ဦးက ပြောသည်။

ထို့အပြင် ဆင်ဖြူစခန်းကို PNOတပ်သား ၅၀၀ ဝန်းကျင်နှင့် ဝင်သိမ်းခဲ့ကြောင်းနှင့် PNLA ၏နယ်မြေ ဗန်းမတ်ကို တိုက်ပွဲ ဆင်နွှဲမည်မဟုတ်ကြောင်း ၎င်းကဆက်ပြောသည်။

စစ်ကောင်စီ၏လက်ပါးစေ ဖြစ်နေသည့် PNO သည် ပအိုဝ်းလူမျိုးအချင်းချင်း ပြန်လည်တိုက်ခိုက်နေခြင်းသည် မဖြစ်သင့်ကြောင်းနှင့် လူမျိုးရေးခွဲခြားမှုပြုလုပ်ပြီး အချင်းချင်း ပြန်လည်မောင်းထုတ်နေခြင်းက ပအိုဝ်းပြည်သူများသာနစ်နာမှုရှိကြောင်း လူငယ်တစ်ဦးက ပြောသည်။

“စစ်ကောင်စီရဲ့ လက်ကိုင်တုတ်လိုမျိုး မဖြစ်စေချင်ဘူး။ PNOက လူမျိုးရေးခွဲခြားပြီး တိုက်တာမျိုးတွေ။ ပအိုဝ်းအချင်းချင်း မောင်းထုတ်နေတာမျိုးကျတော့ မကောင်းဘူး။ PNLAက နယ်မြေမရှိတော့ဘူးဆိုပြီး တိုက်နေတာမျိုးတွေက မဖြစ်သင့်ဘူး။ PNO က စစ်ကောင်စီနားကပ်ပြီး ကိုယ့်လူမျိုးကို ပြန်မောင်းထုတ်တာက မဖြစ်သင့်ဘူး။” ဟု ပအိုဝ်းလူငယ်ရေးတက်ကြွ လှုပ်ရှားသူတစ်ဦးက သျှမ်းသံတော်ဆင့်ကို ပြောသည်။

ယခုလက်ရှိတွင် PNLA နှင့် PNOတို့ တိုက်ပွဲ ရပ်နားထားပြီး ပွန်ချောင်းအနီး ဒေသခံတစ်ချို့မှာ စစ်ဘေးတိမ်းရှောင်နေရသည်ဟု သိရသည်။

ပြီးခဲ့သည့် နိုဝင်ဘာလ (၂၀) ရက်မှ နိုဝင်ဘာ (၂၇)ရက်အထိ မောက်မယ်ဒေသတွင် PNLA နှင့် PNOတို့ တိုက်ပွဲဖြစ်ပွားခဲ့ပြီး စစ်ကောင်စီနှင့် PNOဖက်မှ (၃၁) ဦးကျဆုံးသွားကြောင်း PNLA အရာရှိတစ်ဦးက ပြောသည်။

အလုပ်သင် သတင်းထောက် နန်းလရောင် ရေးသားသည်။