သျှမ်းပြည်မြောက်ပိုင်း မူဆယ်မြို့မှ တောင်ကြီးမြို့သို့ ပြေးဆွဲနေသော ခရီးသည်တင်ကားငယ်များအပေါ် ကားဂိတ်အချို့က ခေါင်းပုံဖြတ် အမြတ်ထုတ်မှုများရှိကြောင်း စုံစမ်းသိရသည်။

လက်ရှိတွင် မူဆယ်-တောင်ကြီးကားခသည် သုံးသိန်းခွဲဝန်းကျင်ပေါက်ဈေးရှိနေပြီး အချို့ကားဂိတ်များမှ ကားသမားများအား ငွေအပြည့်ပေးချေမှုမရှိခြင်းဘဲ ငွေကျပ် ၂ သိန်းခန့် သာပြန်လည်ပေးချေသောကြောင့် ကားသမားများနှင့် ခရီးသည်များနစ်နာမှုများရှိလာကြောင်း မူဆယ်မြို့မှ ကားသမားတစ်ဦးက သျှမ်းသံတော်ဆင့်ကိုပြောသည်။

“ခုအခြေအနေအရ ကားခ ၃ သိန်းခွဲကတော့ ပုံမှန်ပဲ၊ ခုံတစ်ခုံကို ၃ သိန်းခွဲရောင်းပြီး ၃ သိန်းက ကားဆရာကို ရှင်းပေးရတာပုံမှန်ပဲ၊ ဒါမယ့်တချို့ဂိတ်တွေက ကားဆရာကို ၂ သိန်းပဲရှင်းပေးပြီးတော့ ခရီးသည်ဆီကို ၃ သိန်းခွဲအပြည့်ကောက်လာတာမျိုးတွေရှိလာတယ်” ဟု ၎င်းကပြောသည်။

ကားဂိတ်များမှ ခရီးသည်များထံ ငွေအပြည့်ကောက်ခံသော်လည်း ကားသမားများအား ဈေးလျော့၍ပြန်လည်ပေးချေခြင်းကြောင့် ယခင် ၈ ဦးခန့်ဖြင့် ကားထွက်သော်လည်း လက်ရှိတွင် ခုံများဖြုတ်၍ ခရီးသည် ၁၀ ဦးမှ ၁၅ ဦးအထိ လိုအပ်သည်ထက်ပိုမိုတင်ဆောင်နေရပြီး ခရီးသည်များမှာလည်း ငွေအပြည့်ပေးရသော်လည်း အဆင်မပြေစွာ သွားလာနေရကြောင်းသိရသည်။

“ကားဆရာကလည်း သူ့အသက်၊ ကား၊ ဆီ ဒါတွေရင်းပြီးမှ ၂ သိန်းလောက်ပဲရပြီး ကြားထဲက လူက ၁သိန်းခွဲအေးဆေးဖြတ်ယူတာဆိုတော့ ဘယ်လိုမှ အဆင်မပြေဘူးလေ၊ ခရီးသည်ဖက်ကလည်း ခုံတစ်ခုံစာ အပြည့်ပေးရပြီး ခုံနဲ့မထိုင်ရပဲ သက်တောင့်သက်သာမစီးရတော့ဘူး” ဟု၎င်းက ဆက်ပြောသည်။

ယခုအချိန်တွင် မူဆယ်မှ တောင်ကြီးသို့ သွားသည့် နမ့်လန်-ရပ်စောက်လမ်းမှာ ပိတ်ထားသည့်အတွက် ယခင်က ၁ ညအိပ် ၂ ရက်ခရီးကြာမြင့်သော်လည်း လက်ရှိအခြေအနေများအရ လားရှိုးဘက်မှ သွားလာနေရပြီး လမ်းတွင် ၂ ညအိပ် ၃ ရက်အထိကြာမြင့်နိုင်သောကြောင့် ခရီးသည်ပိုမိုတင်ဆောင်ထားရသည့်အခါ အခက်အခဲများကြုံတွေ့နိုင်ကြောင်းသိရသည်။

ထို့အပြင် အချို့နေရာများတွင် ကားဂိတ်မှ ကားမဟုတ်ဘဲ ပြင်ပမှ ကားများသည် ခရီးသည်များအား ကြားဖြတ်တင်ဆောင်ပြီး လမ်းခရီးတွင် ခရီးသည်များအား ထားခဲ့ကာထွက်ပြေးမှုများလည်း ရှိနေကြောင်းသိရသည်။

လက်ရှိတွင် တောင်ကြီးမှ မူဆယ် သို့သွားရာတွင် (၁၃) မျဉ်းစောင်းမှတ်ပုံတင်ကိုင်ဆောင်သူများမှာ ကားခ ၄ သိန်းဝန်းကျင်သာကျသင့်ပြီး (၁၃) မျဉ်းစောင်းမဟုတ်သူများမှာ အနည်းဆုံး ကားခ ၆ သိန်းခွဲဝန်းကျင်ကျသင့်နေကြောင်း ကားသမားများထံမှ သိရသည်။