သျှမ်းပြည် ဆီဆိုင်-လွိုင်ကော်လမ်းမပေါ်ကြီးပေါ်တွင် သံဃာတော်များလိုက်ပါလာသည့် ကားတစ်စီးကို စစ်ကောင်စီတပ်ဖွဲ့မှ ပစ်ခတ်ခဲ့သောကြောင့် ကျောင်းထိုင်ဆရာတော် ၁ ပျံလွန်သွားပြီး၊  ၂ ပါး ပြင်းထန်ဒဏ်ရာရရှိခဲ့ကြောင်း စုံစမ်းသိရသည်။ 

ယမန်နေ့ (အောက်တိုဘာလ ၃၀ ရက်) နေ့လယ် ၂ နာရီဝန်းကျင်က လွိုင်ကော်မြို့နယ် ထီးစဲခါးရေတံခွန်ကျောင်းမှ ကျောင်းထိုင်ဆရာတော်အပါအဝင် သံဃာတော်များသည် ဆီဆိုင်မြို့သို့ ကားဖြင့်စီးလာစဉ် အောင်ကလပ်ကျေးရွာတွင် တပ်စွဲထားသည့် စစ်ကောင်စီတပ်ဖွဲ့၏ ဝိုင်းဝန်းပစ်ခတ်ခဲ့ခြင်း ခံခဲ့ရဖြစ်သည်။ 

ထီးစဲခါးကျောင်းဆရာတော်သည် ပစ်ခတ်ခံရသည့် နေရာတွင်ပင် ပျံလွန်တော်မူခဲ့ပြီး ကားပေါ်တွင် လိုက်ပါလာသော ဆရာတော် ၂ ပါးလည်း ပြင်းထန်စွာဒဏ်ရာရရှိခဲ့ကြောင်း ဆီဆိုင်မြို့ ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။

“ထီးစဲခါးရေတံခွန်ကျောင်းကဆရာတော်ပေါ့လေ။ ဆရာတော်ကားနဲ့ပဲ ဆီဆိုင်မြို့ဘက်ကို အလာမှာ အောင်ကလပ်မှာတပ်စွဲထားတဲ့ စစ်ကောင်စီတပ်ဖွဲ့တွေက ဝိုင်းပစ်လိုက်တာ။ ဆရာတော် ပျံလွန်တော်မှုသွားတယ်။ အခြားဆရာတော် ၂ ပါးလည်း ဒဏ်ရာရတယ်။ ဘာအကြောင်းကြောင့် ပစ်တာလဲတော့ မသိဘူး” ဟု ၎င်းကပြောသည်။

ယခင်တွင် စစ်ကောင်စီတပ်သည် လက်နက်ကြီး ပစ်ခတ်ခြင်းကြောင့် ထီးစဲခါးရေတံခွန်မှ ဘုန်းကြီးကျောင်းကို ထိမှန်ကာ ကျောင်းဆရာတော်မှ လက်နက်ကြီးပစ်ခတ်ခြင်းမပြုလုပ်ရန် စစ်ကောင်စီတပ်ကို သွားရောက်မေတ္တာရပ်ခံခဲ့ဖူးကြောင်း ဆီဆိုင်မြို့ဒေသခံတစ်ဦးက ပြောပြသည်။ 

ထို့အပြင် ယမန်နေ့ နံနက် ၄ နာရီဝန်းကျင်တွင်လည်း စစ်ကောင်စီတပ်သည် ဂျက်ဖိုက်တာ ၂ စင်းဖြင့် မောက်မယ်မြို့နယ် ဟိုနမ့်ဒေသက ကျေးရွာ ၂ ရွာကို ဗုံးကြဲခဲ့ကြောင်း ပအိုဝ်းအမျိုးသားလွတ်မြောက်ရေး တပ်မတော် PNLA ၏ ပြန်ကြားရေးတာဝန်ခံ ခွန်ရိန်းယံက သျှမ်းသံတော်ဆင့်ကိုပြောသည်။

“ မနေ့ မနက်တုန်းကတော့ မောက်မယ်မြို့နယ် ဟိုနမ့်ဒေသက ကျေးရွာ ၂ ရွာကို စစ်ကောင်စီတပ်က ဂျက်ဖိုက်တာ ၂ စင်းနဲ့ နှစ်ကြိမ်ဗုံးလာကြဲသွားတယ်။ တစ်ကြိမ်ကို ဗုံး ၇ လောက် ကြဲချသွားတယ်။ လူထိခိုက်သေဆုံးမှုတော့မရှိဘူး။ နေအိမ် ၁၀ ကျော်တော့ ပျက်စီးသွားတယ်” ဟု ခွန်ရိန်းယံက ပြောသည်။

လက်ရှိတွင် ဆီဆိုင်မြို့နယ်အတွင်း စစ်ကောင်စီတပ်နှင့် စစ်ကောင်စီလက်အောက်ခံ ပအိုဝ်းပြည်သူ့ PNO တို့ စစ်ကြောင်းထိုးနေလျက်ရှိပြီး တိုက်လေယာဉ်နှင့် ဒရုန်းများကို အသုံးပြုကာ ကျေးရွာများကို ဗုံးကြဲခြင်း၊ ပြည်သူများကို ပစ်ခတ်သတ်ဖြတ်ခြင်း ဆိုးဆိုးဝါးဝါးပြုလုပ်လာနေကြောင်း ခွန်ရိန်းယံက ဆက်ပြောသည်။ 

ထိုတိုက်ပွဲနှင့်ပတ်သက်၍ ပအိုဝ်းပြည်သူ့စစ် PNO ဘက်ကတော့ မောက်မယ်ဒေသသည် PNO နယ်မြေ ဖြစ်သောကြောင့် ကျူးကျော်လာသည့် PNLAကို မောင်းထုတ်ခြင်းဖြစ်ပြီး NCA လက်မှတ်ထိုးထားသည်ကို ဖျောက်ဖျက်သည့်အတွက် ဝင်ရောက်ထိုးစစ်ဆင်ရခြင်းဖြစ်ကြောင်း PNO အရာရှိတစ်ဦးက သျှမ်းသံတော်ဆင့်ကို နိုဝင်ဘာလ ၂၈ ရက်နေ့ကပြောသည်။