သျှမ်းပြည် ဖယ်ခုံမြို့အခြေစိုက် စစ်ကောင်စီခြေမြန်တပ်ရင်း ခမရ-၄၂၁ တပ်မှ နှစ်ရက်ဆက်တိုက် လက်နက်ကြီး ရမ်းသမ်းပစ်ခတ်မှုကြောင့် အရပ်သားထိခိုက်သေဆုံးမှုများ ရှိနေကြောင်း သတင်းရရှိသည်။
ယနေ့ ( နိုဝင်ဘာလ ၂၈ ရက် ) မနက် ၇ နာရီခွဲ ဝန်းကျင်တွင် ဖယ်ခုံမြို့နယ်အတွင်း စစ်ကောင်စီတပ်၏ လက်နက်ကြီးပစ်ခက်မှုကြောင့် ကုန်းပေါရွာရှိ ရွှေကယန်း စားသောက်ဆိုင်ပေါ်သို့ ကျရောက်ပေါက်ကွဲခဲ့ပြီး အမျိုးသမီးနှစ်ဦး ထိခိုက်ဒဏ်ရာရရှိခဲ့ကြောင်း ဖယ်ခုံမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ဒီနေ့ မနက်ကတော့ အမျိုးသမီးနှစ်ယောက်ထိတယ်ဆိုတာပဲသိထားရသေးတယ်။၇ နာရီကျော်ကျော်လောက် ဖြစ်သွားတာ။စစ်ကောင်စီကတော့ ကျေးရွာတွေဖက်ကို လက်နက်ကြီးနဲ့ နေ့တိုင်းနီးပါးပစ်နေတာပါ။မနေ့က ပစ်တဲ့ဟာလည်း ၆ ယောက်လောက်သေတယ် ကလေးတွေလည်းသေတယ်”ဟု ဖယ်ခုံမြို့ ဒေသခံအမျိုးသားတစ်ဦးက ပြောသည်။
အလားတူ ယမန်နေ့ (နိုဝင်ဘာလ ၂၇ ရက်) ညနေ (၃) နာရီ အချိန်၌ ဖယ်ခုံမြို့နယ် စစ်ကောင်စီတပ်ရင်း ခမရ-၄၂၁ မှ ပစ်ခတ်လာသည့် လက်နက်ကြီးကျည် ကုန်းပေါကျေးရွာအတွင်း ကျရောက်ပေါက်ကွဲမှုကြောင့် အသက် (၄၀) အရွယ် အမျိုးသား (၁) ဦး၊ အသက် (၁) လကျော်နှင့် (၁) နှစ်ကျော်အရွယ် ကလေးငယ် နှစ်ဦး အပါအဝင် စုစုပေါင်း (၆) ဦး သေဆုံးခဲ့ကြောင်း လူမှုကူညီရေးအသင်းထံမှ သိရသည်။
ထို့အပြင် အသက် (၂၄) နှစ်အရွယ် အမျိုးသမီးတစ်ဦး၊ အသက် (၁၂) နှစ်နှင့် အသက် (၁၄) နှစ်အရွယ် လူငယ်နှစ်ဦး၊ စုစုပေါင်း (၃) ဦး ထိခိုက်ဒဏ်ရာ ရရှိခဲ့ကြောင်း ဒေသခံများက ပြောဆိုသည်။
သျှမ်း-ကရင်နီနယ်စပ် ဖယ်ခုံမြို့နယ်အတွင်းနှင့် ပင်လောင်းမြို့သို့သွားသည့် လမ်းမတကြောတွင် ပြီးခဲ့သည့် နိုဝင်ဘာလ ဒုတိယပတ်မှစ၍ စစ်ကောင်စီတပ်မှ စစ်အင်အားများ ဖြည့်ကာ ထိုးစစ်ဆင်လာမှုကြောင့် ကရင်နီတော်လှန်ရေး တပ်ပေါင်းစုနှင့် ထိတွေ့တိုက်ပွဲများ ဖြစ်ပွားလျက်ရှိကြောင်း သိရသည်။
လက်ရှိတွင် စစ်ကောင်စီတပ်မှ ဖယ်ခုံ၊ လွိုင်ကော်နှင့် မိုးဗြဲဘက်သို့ စစ်အင်အား အလုံးအရင်းဖြင့် အင်အားဖြည့်တင်းနေပြီး ပွင့်လင်းရာသီတွင် တန်ပြန်ထိုးစစ်ဆင်နေသည်။
Leave a Comments