သျှမ်းပြည်တောင်ပိုင်း၊ မောက်မယ်မြို့နယ် ၊ဟိုနမ့် ကျေးရွာဘက်တွင် ပအိုဝ်းအမျိုးသားလွတ်မြောက်ရေး တပ်မတော်(PNLA)တပ်စခန်းကို စစ်ကောင်စီလက်အောက်ခံ PNO ပြည်သူ့စစ်တို့က ဝင်ရောက်တိုက်ခိုက်ခဲ့ကြောင်း သတင်းရင်းမြစ်များထံမှ သိရသည်။

နိုဝင်ဘာလ (၂၀) ရက်ကတည်းက စစ်ကောင်စီ၊နှင့် PNA/PNO တို့သည် PNLA တပ်စခန်းရှိသည့် ဟူနမ့် ကျေးရွာဘက်သို့ ထိုးစစ်ဆင်တိုက်ခိုက်ခဲ့ပြီး ယမန့်နေ့ နိုဝင်ဘာလ (၂၇) ရက်အထိ တိုက်ပွဲ ဖြစ်ပွားခဲ့ကြောင်းPNLA မှ အရာရှိတစ်ဦးကပြောသည်။

အဆိုပါ တိုက်ပွဲ (၈) ရက်အတွင်း စစ်ကောင်စီနှင့် PNO/PNA ဘက်မှ( ၃၁ )ဦးကျဆုံးခဲ့ပြီး PNOဖက်မှ ပြည်သူနေအိမ် နှင့် PNLA တပ်စခန်းရှိရာကို လက်နက်ကြီးဖြင့် ပစ်ခတ်တိုက်ခိုက်ခဲ့သဖြင့် အဆောက်ဦးများထိခိုက်ပျက်စီးခဲ့ သည်ဟု PNLA ပြောရေးဆိုခွင့် ရှိသူ ခွန်းရိန်းယံကသျှမ်းသံတော်ဆင့်ကို ပြောသည်။

“ကျနော်တို့က လူကိုတိုက်နေတာ မဟုတ်ဘူး။အာဏာရှင်ကို တိုက်နေတာ။ပအိုဝ်းအချင်းချင်း တိုက်နေတာလည်း မဟုတ်ဘူး။ သူတို့က စစ်တပ်နဲ့ပေါင်းပြီး ကျေးရွာကို လက်နက်ကြီးနဲ့လည်းပစ်တယ်။ တိုက်ပွဲဖြစ်တဲ့ ၇ ရက်မှာ သူတို့ဖက်က ၃၁ ယောက်ကျတယ်။” ဟု ၎င်းကပြောသည်။

ထို့အပြင် PNO ပြည်သူ့စစ်သည် ရဟန်းသံဃာတော် ဆရာတော်များ၏ မေတ္တာရပ်ခံမှုကို ပျက်ပြယ်၍ အရင်ဆုံးထိုးစစ်ဆင် တိုက်ခိုက်လာခြင်း ဖြစ်သည်ဟု အဆိုပါ ခွန်ရိန်းယံ ဆက်ပြောသည်။

PNO/PNA ပြည်သူ့စစ်ဘက်မှလည်း မောက်မယ်ဒေသသည် PNOနယ်မြေ ဖြစ်သောကြောင့် ကျူးကျော်လာသည့် PNLAကို မောင်းထုတ်ခြင်းဖြစ်ပြီး NCA လက်မှတ်ထိုးထားသည်ကို ဖျောက်ဖျက်သည့်အတွက် ဝင်ရောက်ထိုးစစ်ဆင်ကြောင်း PNOအရာရှိတစ်ဦးက ပြောသည်။

“သူတို့ကနယ်မြေကျူးကျော်လာလို့ မောင်းထုတ်တာ။ အရင်ကတည်းက သူတို့က ဟူနမ့်ဖက်မှာ တပ်စခန်းတွေ လာဆောက်ထားတာကြာပြီ။ စစ်မျက်နှာများလို့ မောင်းထုတ်နေတာ။ ပြီးတော့ သူတို့က NCAကို ဖျောက်ဖျက်တယ်။သူတို့က အတင်းကျူးကျော်တော့ မတတ်နိုင်ဘူး။” ဟု PNOအရာရှိတစ်ဦး က သျှမ်းသံတော်ဆင့်ကို ပြောသည်။

ထို့သို့ နယ်မြေကျူးကျော်ခြင်းမရှိပါက တိုက်ပွဲဖြစ်စရာအကြောင်း မရှိခြင်းနှင့် ပအိုဝ်းပြည်သူများကို မငဲ့ညှာပဲ ဆီဆိုင်နှင့် ဟိုပုံးတို့ဘက် PNLAမှ ဝင်ရောက်လာခြင်းကြောင့် တိုက်ပွဲဖြစ်ပွားခဲ့ရပြီး ပအိုဝ်းပြည်သူ အများအပြားလည်း ထိခိုက်ခဲ့ရသည်ဟု အဆိုပါ အရာရှိတစ်ဦးမှ ဆက်ပြောသည်။

ယခုလက်ရှိတွင် PNOနှင့် PNLAကြား စစ်ရေးအရ တင်းမာနေလျှက်ရှိပြီး ဟိုနမ့်ကျေးရွာရှိ ပြည်သူများ စစ်ဘေးတိမ်းရှောင်နေကြောင်း ဒေသခံများထံမှ သိရသည်။

အလုပ်သင် သတင်းထောက် နန်းလရောင် ရေးသားသည်။