သျှမ်းပြည်အရှေ့ပိုင်း အထူးဒေသ (၄) အမျိုးသားဒီမိုကရေစီမဟာမိတ်တပ်မတော် (NDAA) မိုင်းလားတပ်ဖွဲ့ ထိန်းချုပ်သည့် မိုင်းလားမြို့အဝင် ဝမ်တာပင်းဂိတ်တွင် ခရီးသည်များနှင့် ကုန်ပစ္စည်းများကို စစ်ဆေးမှု ပိုမိုတင်းကြပ်လာကြောင်း စုံစမ်းသိရသည်။

ပြီးခဲ့သည့် အောက်တိုဘာလမှ စတင်ပြီး နိုင်ငံသားမှတ်ပုံတင် ၁၃ မျဉ်းစောင်း ကိုင်ဆောင်သည့် တအာင်း(ပလောင်)လူမျိုးနှင့် ကိုးကန့်လူမျိုးများကို ကျိုင်းတုံ-မိုင်းလားလမ်းမကြီးပေါ်ရှိ ဝမ်တာပင်းဂိတ်တွင် မိုင်းလားမြို့ဘက်သို့ လုံးဝဖြတ်သွားလာခွင့် မပြုကြောင်း ကိုယ်တိုင်ကြုံတွေ့ခဲ့သည့် ကျိုင်းတုံကားသမားတစ်ဉီးက သျှမ်းသံတော်ဆင့်ကို ပြောသည်။

“အဓိက မှတ်ပုံတင် ၁၃ မျဉ်းစောင်း တအာင်း(ပလောင်)နဲ့ ကိုးကန့်ကို မိုင်းလားဘက်သွားတဲ့ ဝမ်တာပင်းဂိတ်က လုံးဝ ပေးမဖြတ်တာ။ ကျန်တာတော့ သူတို့ခွင့်ပြုတယ်၊ ဘာကြောင့် ပိတ်လဲမသိဘူး။ ဒီလူမျိုးတွေ ပါလားဆိုပြီး ကားသမားတွေကို မေးတယ်” ဟု ၎င်းကားသမားက ပြောဆိုသည်။

အဆိုပါ ကျိုင်းတုံ- မိုင်းလား လမ်းမကြီးတွင် ကုန်ပစ္စည်းတင်သွင်းလာသည့် ကုန်ကားကြီးများကို နိုဝင်ဘာလ ပထမပတ်တွင် စတင်ပိတ်လိုက်ပြီး ဂိတ်တွင် သတ်မှတ်ထားသည့် ကားငယ်များသာ ဖြတ်သန်းခွင့်ပြုကြောင်း ၎င်းကားသမားက ဆက်ပြောသည်။

“ကုန်ကားကြီးတွေဆိုရင် ဒီလ ပထမပတ်က စပိတ်လိုက်တာ။ သူတို့သတ်မှတ်ထားတဲ့ ကားငယ်တော့ ပေးဝင်တယ်။ စစ်ဆေးမှုကတော့ အရမ်းကြပ်တယ်။ ဘက်ပေါင်းစုံ ခက်ခဲတော့ ဘာလုပ်စားရမှန်းတောင် မသိတော့ဘူး”ဟု ကားသမားက ထပ်လောင်းပြောသည်။

တရုတ်အစိုးရ ဖိတ်ကြားချက်အရ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်သည် နိုဝင်ဘာလ ၅ ရက်မှ ၁၀ ရက်နေ့အထိ တရုတ်နိုင်ငံသို့ သွားရောက်တွေ့ဆုံခဲ့ပြီးသည့်နောက်တွင် သျှမ်းပြည်အရှေ့ပိုင်း စစ်ကောင်စီဂိတ်များ၌ စစ်ဆေးမှု ပိုမိုတင်းကြပ်လာကာ စားဝတ်နေရေးအတွက် အလုပ်အကိုင် အခက်တွေ့လာနိုင်သည်ဟု ဒေသခံအမျိုးသမီးတစ်ဦးက ပြောသည်။

NDAA ထိန်းချုပ်ထားသည့် မိုင်းလားမြို့တွင် တရုတ်နိုင်ငံဘက်က လာသည့် ပစ္စည်းများကိုသာ အဓိက တင်သွင်း အသုံးပြုနေရပြီး ယခုကဲ့သို့ တားဆီးပိတ်ပင်လိုက်ခြင်းကြောင့် တရုတ်ကုန်ပစ္စည်းများ သယ်လာသည့် ကုန်ကားကြီးများ ၎င်းမြို့အနီးရှိ ကျေးရွာတွင် ‌ခေတ္တ ရပ်ဆိုင်းနေရသည်ဟု သိရသည်။

“ပြောရမယ်ဆို စစ်ခေါင်းဆောင် တရုတ်က ပြန်လာပြီးတဲ့နောက်ပဲ ပိုစစ်ဆေးတယ်၊ ပိတ်ချလိုက်တယ်။ ကားကြီးတွေဆို နားထားရတယ်၊ တာချီလိတ်ဘက်မှာရော ကားတွေအများကြီး နားရတယ်၊ တချို့ဆိုလည်း ကျေးရွာတွေမှာ နားတယ်။ နယ်စပ်ကို ဒီတိုင်းပိတ်လို့ မရလောက်ဘူး အကြာကြီးလည်း သူတို့ပိတ်နိုင်မှာ မဟုတ်ဘူး”ဟု ကျိုင်းတုံ-မိုင်းလား ပြေးဆွဲနေသည့် ၎င်းကားသမားက ပြောသည်။

ပြီးခဲ့သည့် အောက်တိုဘာလ နောက်ဆုံးပတ်မှ စတင်ပြီး မြန်မာ-တရုတ်နယ်စပ် ‘ဝ’တပ်ဖွဲ့ UWSA နှင့် မိုင်းလားတပ်ဖွဲ့ NDAA တို့ ထိန်းချုပ်ထားသည့် နယ်စပ်ဂိတ်များတွင် တရုတ်နိုင်ငံဘက်မှ စားနပ်ရိက္ခာနှင့် စက်သုံးဆီများကို သယ်ဆောင်ခွင့်မပြုဘဲ ပန်ဆန်းနှင့် မိုင်းလားနယ်စပ်ဂိတ်ကြီးများကိုပါ ပိတ်ပင်လိုက်ပြီး တပိုင်တနိုင် သယ်ယူရန်သာ ခွင့်ပြုထားကြောင်း ဒေသခံများက ပြောသည်။

အလုပ်သင် သတင်းထောက် နန်းဆိုင်ခမ်း ရေးသားသည်။