နိုင်ငံတဝှမ်း အရပ်ဘက် ပစ်မှတ်များကို ရက်ရက်စက်စက် ဗုံးကြဲရန် အမိန့်ပေးနေသည့် စစ်ခေါင်းဆောင် မင်းအောင်လှိုင်က တိုင်းရင်းသား လက်နက်ကိုင်များ ထာဝရ ငြိမ်းချမ်းရေး တည်ဆောက်ရမည့် အချိန်ဖြစ်သည်ဟု ယနေ့ (နိုဝင်ဘာလ ၂၅ ရက်) တွင် ကျရောက်သည့် အမျိုးသားနေ့ မိန့်ခွန်းတွင် ထည့်သွင်း ပြောဆိုသည်။

“ယခုအချိန်သည် တိုင်းရင်းသား ညီအစ်ကို မောင်နှမ အချင်းချင်း ယုံမှားသံသယ ကင်းရှင်းပြီး မလိုလားအပ်သည့် အယူဝါဒများ ပယ်ဖျောက်ကာ တစ်ဦးနှင့်တစ်ဦး အပြန်အလှန် ယုံကြည်လေးစား ချစ်ခင်မှုများဖြင့် ပါဝင်လက်တွဲ၍ ထာဝရ ငြိမ်းချမ်းရေးတည်ဆောက်ရမည့် အချိန်ဖြစ်သည်” ဟု ၎င်းကဆိုသည်။

ထို့အပြင်“တိုင်းရင်းသား အချင်းချင်း အပြန်အလှန်လေးစားခြင်း၊ နားလည်စာနာခြင်းတို့ဖြင့် တစ်ဦးနှင့် တစ်ဦးအကြား ပူးပေါင်းဆောင်ရွက်မှုများ ဖြစ်ပေါ်စေပြီး နားလည်မှု လွဲမှားခြင်းနှင့် ပဋိပက္ခများ လျှော့ချကာ တွေ့ဆုံ ဆွေးနွေးခြင်းဖြင့် ဖြေရှင်းနိုင်သည်”ဟု စစ်ခေါင်းဆောင်၏ ကမ်းလှမ်း သဝဏ်လွှာကို ယနေ့ထုတ် စစ်တပ်အာဘော် သတင်းစာများက ဖော်ပြသည်။

နိုင်ငံရေး ပြဿနာကို နိုင်ငံရေးနည်းဖြင့် မဖြေရှင်းဘဲ လက်နက်ကိုင်၍ ဖြေရှင်းနေမည်ဆိုက လွတ်လပ်သော်လည်း မငြိမ်းချမ်းသည့် အခြေအနေကို ပေါ်ပေါက်စေမည်ဟု လေကြောင်း တိုက်ခိုက်မှုများကို ရည်ညွှန်း၍ စစ်ခေါင်းဆောင်က ခြိမ်းခြောက်သည်။

ယင်းကမ်းလှမ်းမှုနှင့် ပတ်သက်၍ စစ်ကောင်စီတပ်၏ လေကြောင်း တိုက်ခိုက်မှုနှင့် ပြင်းထန်သည့် တိုက်ပွဲကြောင့် စစ်ဘေးဒဏ် ဆိုးရွားစွာ ခံစားနေရသည့် ဒေသခံ ပြည်သူများ၏ အကျိုးကို ငဲ့ညှာထောက်ထားခြင်း၊ နယ်စပ် တည်ငြိမ်ရေးနှင့် တိုက်ပွဲများ ရပ်စဲရေး ကြားဝင်ကြိုးပမ်းနေသည့် တရုတ်အစိုးရကို လေးစား အသိအမှတ်ပြုသည့် အနေဖြင့် တွေ့ဆုံ ဆွေးနွေးရန်အသင့်ရှိကြောင်း TNLA ယနေ့ (နိုဝင်ဘာ ၂၅)ရက် ညနေပိုင်းတွင် တုန့်ပြန်သည်။

TNLA မိမိကိုယ် ကာကွယ်ပိုင်ခွင့်ရှိသည်ဟု ဆိုထားပြီး တအာင်းလူမျိုးများ အဖိနှိမ့်ခံဘဝမှ လွတ်မြောက်ရန်နှင့် တအာင်းပြည်နယ်ရရှိရန်၊ ကိုယ်ပိုင် ပြဌာန်းခွင့်အာမခံသည့် ဖက်ဒရယ်ပြည်ထောင်စု တိုင်းရင်းသား မြန်မာပြည်သူလူထုနှင့်အတူ တည်ဆောက်ရန် အမြဲတစေ ကြိုးပမ်းနေသည်ဟုလည်း ထုတ်ပြန်ချက်တွင် ဖော်ပြသည်။

စစ်တပ် အာဏာသိမ်းပြီးနောက် နိုင်ငံတဝှမ်း ခုခံတော်လှန်မှုများ ပြင်းထန်နေသည်မှာ ၄ နှစ် နီးပါးရှိလာပြီးနောက် တော်လှန်ရေးတပ်များ မြို့ ပေါင်း ၈၀ ကျော်ကို သိမ်းယူထားပြီး တိုက်ပွဲများ ဆက်လက် ပြင်းထန်နေစဥ် ယခုကဲ့သို့ ငြိမ်းချမ်းရေး စကားသံ ထွက်ပေါ်လာခြင်း ဖြစ်သည်။

ညီနောင် မဟာမိတ် (၃) ဖွဲ့တွင် ပါဝင်သည့် တအာင်းတပ်-TNLA သည် လက်ရှိ နမ့်ဆန်၊ မန်တုံ၊ နမ့်ခမ်းမြို့နယ်၊ ကွတ်ခိုင်၊ နမ္မတူ၊ မိုင်းငေါ့၊ မိုင်းလုံ၊ ကျောက်မဲ၊ နောင်ချို၊ မိုးကုတ်၊ မိုးမိတ်မြို့နယ်နှင့် သီပေါမြို့နယ်တို့ကို သိမ်းပိုက်ထားသည်။