ကရင်နီပြည် လွိုင်ကော်မြို့ရှိ စစ်ကောင်စီတပ်သည် ညအချိန်တွင် ဒရုန်း အစင်းရေများလွှတ်တင်နေတာကြောင့် စစ်ရှောင်ပြည်သူများ ညဘက်အချိန် ထိတ်လန့်နေကြသည်ဟု စုံစမ်းသိရသည်။
သျှမ်း-ကရင်နီ နယ်စပ်တကြောတွင် ၂၀၂၃ (နိုဝင်ဘာလ ၁၁ ရက်)မှ စတင်ခဲ့သည့် “၁၁.၁၁စစ်ဆင်ရေး”တစ်နှစ်ပြည့်ခဲ့သော်လည်း စစ်ကောင်စီ၏ လက်နက်ကြီး၊ လေယာဉ် နှင့်ဗုံးကြဲတိုက်ခိုက်မှု များကြောင့် လွိုင်ကော် ပြည်သူအများစုသည် အနီးတဝိုက်ရှိ ကျေးရွာများထံ သွားရောက်ခိုလှုံနေရသည်ဟု သိရသည်။
အဆိုပါ “၁၁.၁၁ စစ်ဆင်ရေး”စတင်ဖြစ်ပွားပြီးနောက်တွင် စစ်ကောင်စီတပ်သည့် ညဘက်အချိန်တွင်ဒရုန်း အစင်းရေများစွာ လွှတ်တင်နေတာကြောင့် စစ်ရှောင်ပြည်သူ အချို့သည် ညဘက် မအိပ်ရဲကြ၊ဒရုန်းများဖြင့် ထပ်မံဗုံးကြဲမည်ကို ကြောက်ရွံ့နေကြောင်း စစ်ရှောင်အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“စစ်တပ်က အဲလိုလွှတ်တာတော့ ကြာပြီ “၁၁.၁၁ စစ်ဆင်ရေး”ပြီးတဲ့နောက်ကတည်းကပဲ။ ခုတော့ပိုဆိုး လာတယ်ပြောရမယ်။ ညတိုင်းလိုလိုလွှတ်တာ ပြီးတော့ အသံကကျယ်တော့ ပြည်သူတွေကကြောက်ရွံ့ပြီး မအိပ်ရဲတာရှိတယ်။ လွိုင်ကော်မြို့ထဲမှာ အသက်ကြီးရွယ်အိုလောက်ပဲကျန်တာ”ဟု ၎င်းက ပြောသည်။
လက်ရှိ စစ်ကောင်စီတပ်သည် လွိုင်ကော်၊ ဖယ်ခုံ ၊ မိုးဗြဲ ၊ ပင်လောင်းမြို့သို့ လမ်းမကြီးတကြောတွင် ပြီးခဲ့သည့် နိုဝင်ဘာလ ဒုတိယအပတ်မှစတင်၍ စစ်ကောင်စီမှ စစ်အင်အားများဖြည့်ကာ ထိုးစစ်ဆင်များပြုလုပ်နေကြောင်း ၎င်းမြို့နယ်ရှိ ဒေသခံများ ထပ်မံတိမ်းရှောင်နေရသည်ဟုစစ်ရှောင်အမျိုးသားတစ်ဦးက ပြောသည်။
“အခုဆိုရင် ဒီလွိုင်ကော်၊ ဖယ်ခုံ၊မိုးဗြဲ ၊ ပင်လောင်းဘက်မှာဆိုရင် စစ်တပ်က နေ့တိုင်းစစ်အင်အားတွေဖြည့်ပြီး ထိုးစစ်ဆင်ဖို့ပြုလုပ်နေကြောင့် အဲ့တဝိုက်က ရှိတဲ့ ဒေသခံတွေအားလုံးနီးပါး ရှောင်နေကြတယ်။ တိုက်ပွဲ အကြီးကျယ် ထပ်ဖြစ်လာမှာကို စိုးရိမ်နေရတယ်” ဟု ၎င်းကပြောသည်။
ထို့အပြင် ကရင်နီ(ကယား)ပြည် လွိုင်ကော်မြို့တွင် စစ်ကောင်စီတပ်နှင့် ပအိုဝ်းပြည်သူ့စစ် ( PNO)တပ်တို့ ပူးပေါင်းပြီး မြို့အဝင်အထွက်ဂိတ်တွင် ပစ္စည်းသယ်ယူခွင့်ကိုလည်း တားဆီးပိတ်ပင်နေသည်ဟုဒေသခံပြောပြချက်အရ သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments