သျှမ်းပြည် မူဆယ်မြို့နယ်ရှိ ညီနောင်မဟာမိတ်တပ်များ ပူးပေါင်းထိန်းချုပ်ထားသည့် ကျင်ဆန်ကျော့ နယ်စပ်ဂိတ်ကို တရုတ်ဘက်မှ ကုန်ပစ္စည်းတင်သွင်းရန် ပြန်လည်ဖွင့်လှစ်ပေးထားကြောင်း စုံစမ်းသိရသည်။
ယမန်နေ့ (နိုဝင်ဘာလ ၂၁ ရက်)မှ စတင်၍ တရုတ်-မြန်မာနယ်စပ် မူဆယ်မြို့နယ်ရှိ ညီနောင်မဟာမိတ်တပ်များ ပူးပေါင်းထိန်းချုပ်ထားပြီး တစ်နှစ်ကျော် ပိတ်ထားခဲ့သည့် ကျင်ဆန်ကျော့ နယ်စပ်ဂိတ်ကို တရုတ်အာဏာပိုင်များဘက်မှ ကုန်ပစ္စည်းတင်သွင်းရန်နှင့် ကြံတင်ပို့နိုင်ရန် ပြန်လည်ဖွင့်လှစ်ပေးလိုက်ကြောင်း မူဆယ်ဒေသခံ ကုန်သည်များက ပြောသည်။
“ကုန်တွေက တရုတ်ဘက်ကိုပဲ သယ်လို့ရတာ၊ မြန်မာဘက်ကို အဝင်မရှိဘူး။ ကျင်ဆန်ကျော့ တရုတ်ကို ပို့တာ ပြောင်းဖူး ရှိမယ်၊ နောက်ရက်က စပြီး ကြံပို့လို့ရမယ်လို့ ပြောတယ်။ မနှစ်က တိုက်ပွဲ စဖြစ်ကတည်းက ကြံတွေ၊ ပြောင်းတွေက ဘယ်မှ ပို့မရခဲ့ဘူး။ အခု MNDAA ထိန်းထားတယ် ဒီမှာ”ဟု မူဆယ်မြို့ဒေသခံ ကုန်သည်တစ်ဦးက သျှမ်းသံတော်ဆင့်ကို ပြောသည်။
ကျင်ဆန်ကျော့ဂိတ်တွင် တရုတ်နိုင်ငံဘက်သို့ ပြောင်းနှင့် ကြံကဲ့သို့ စက်မှုကုန်ကြမ်းပစ္စည်းများ တင်သွင်းနိုင်ရန် တရုတ်ဘက်မှ ယူနန်ပြည်နယ် အာဏာပိုင်များက ညီနောင်မဟာမိတ်တပ်များနှင့် ဆွေးနွေးပြီး ဂိတ်ပြန်ဖွင့်ပေးခြင်း ဖြစ်နိုင်ကြောင်း မူဆယ်ဒေသခံ ကုန်သည်များက ပြောဆိုသည်။
အလားတူ မူဆယ်မြို့ရှိ ဆင်ဖြူဂိတ်တွင်လည်း တရုတ်ဘက်မှ ဟင်းသီးဟင်းရွက်များနှင့် စားသောက်ကုန်များ တနိုင်တပိုင် သယ်ယူခွင့်ကို တရုတ်အာဏာပိုင်နှင့် စစ်ကောင်စီ ပူးပေါင်းပြီး အကန့်အသတ်ဖြင့် အနည်းငယ်သာ ခွင့်ပြုထားကြောင်း ဒေသခံများထံမှ သိရသည်။
“ဟင်းသီးဟင်းရွက်ကတော့ ကျယ်ဂေါင်ကနေ နည်းနည်းချင်းစီ သယ်လို့ရတယ်။ ဆိုင်ကယ်နဲ့ သယ်မယ်ဆိုရင်တောင် တစ်ဖာချင်းစီပဲ ရတယ်။ အဲ့တာတောင် စစ်ကောင်စီက လွှတ်ပေးတဲ့အခါရှိတယ် မလွှတ်ပေးတာလည်း ရှိတယ်။ စွမ်စော်ဘက်က တံတားမှာ ဆိုင်ကယ်ဆင်းတွန်းမှ ဖြတ်လို့ရတယ်”ဟု မူဆယ်ဒေသခံ အသက် (၃၀) ကျော်အရွယ် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
အလားတူ ‘ဝ’နှင့် မိုင်းလားဘက်ရှိ နယ်စပ်ဂိတ်များတွင်လည်း တရုတ်နိုင်ငံဘက်မှ ပြန်ဖွင့်ပေးကာ ကုန်စည်သယ်ယူခွင့် ရနေပြီး အင်တာနက် ဆက်သွယ်ရေးကွန်ယက်များကိုလည်း ပြန်လည်အသုံးပြုနိုင်ပြီဖြစ်ကြောင်း ဒေသခံများက ပြောဆိုသည်။
အခြားတဘက်တွင် တိုင်းရင်းသား လက်နက်ကိုင်များ ထိန်းချုပ်ထားသည့် တရုတ်-မြန်မာ နယ်စပ်ဂိတ်များအား ဆက်လက်ပိတ်ထားပေးပြီး တရုတ်အစိုးရနှင့် စစ်ကောင်စီ ညှိနှိုင်း၍ တည်ငြိမ်မှုရှိမှသာ ပြန်လည်ဖွင့်လှစ်ပေးမည်ဟု ယူနန်ပြည်နယ် ရွှေလီလူဝင်မှုစစ်ဆေးရေး ဌာနမှူးက စစ်ကောင်စီ လဝက ဝန်ကြီး ဦးမြင့်ကြိုင်ကို ကတိပေးခဲ့သည်ဟု စစ်ကောင်စီက ယမန်နေ့ (နိုဝင်ဘာ ၂၁ ရက်) ညပိုင်းတွင် ထုတ်ပြန်သည်။
စစ်ကောင်စီ လဝက ဝန်ကြီးသည် မိုင်ထောင်ချီ ရှည်လျားသည့် တရုတ်-မြန်မာ နယ်စပ်တလျှောက် စစ်ကောင်စီထိန်းချုပ်မှုအောက် တစ်ခုတည်း ကျန်ရှိနေသည့် မူဆယ်မြို့ နယ်စပ်ဂိတ်ကို တရုတ်ဘက်ခြမ်းမှ နိုဝင်ဘာလ ၂၀ ရက်တွင် ဝင်ရောက်စစ်ဆေးခဲ့ကြောင်း သိရသည်။
Leave a Comments