တိုင်းရင်းသား လက်နက်ကိုင်များ ထိမ်းချုပ်ထားသည့် တရုတ်-မြန်မာ နယ်စပ်ဂိတ်များအား ဆက်လက် ပိတ်ထားပေးမည်ဟု တရုတ်ဘက်က စစ်ကောင်စီ လဝက ဝန်ကြီး ဦးမြင့်ကြိုင်ကို ကတိပေးလိုက်ကြောင်း စစ်ကောင်စီက ယမန်နေ့ (နိုဝင်ဘာလ ၂၁ ရက်) ညပိုင်းတွင် ထုတ်ပြန်သည်။

ပြီးခဲ့သည့် နိုဝင်ဘာလ ၂၀ ရက်နေ့က တရုတ်-မြန်မာ နယ်စပ်၊ တရုတ်ဘက်ခြမ်း ရွှေလီမြို့သို့ သွားရောက်သည့် စစ်ကောင်စီ လဝက ဝန်ကြီးကို တရုတ်ဘက်က အထက်ပါအတိုင်း ကတိပေးခဲ့ခြင်း ဖြစ်သည်။

ကိုးကန့်တပ် ထိန်းချုပ်ထားသည့် ချင်းရွှေဟော် အပါအဝင် စစ်ကောင်စီ ဆုံးရှုံးခဲ့သည့် နယ်စပ်ဂိတ်များ အဝင်အထွက် ပိတ်ထားကြောင်း၊ စစ်ကောင်စီနှင့်တရုတ်အစိုးရ ညှိနှိုင်းပြီး တည်ငြိမ်မှုရှိမှသာ ပြန်ဖွင့်လှစ်ပေးမည်ဟု ယူနန်ပြည်နယ် လူဝင်မှုစစ်ဆေးရေးဌာနမှူး၊ ရွှေလီလူဝင်မှုစစ်ဆေးရေးဌာနမှူး ကျန်းပင်းက ကတိပေးခဲ့သည်ဟု စစ်ကောင်စီက ဆိုသည်။

စစ်ကောင်စီ လဝက ဝန်ကြီးသည် မိုင်ထောင်ချီ ရှည်လျှားသည့် တရုတ်-မြန်မာ နယ်စပ် တလျှောက် စစ်ကောင်စီ ထိမ်းချပ်မှုအောက် တခုတည်း ကျန်ရှိနေသည့် မူဆယ်မြို့ နယ်စပ်ဂိတ်ကို တရုတ်ဘက်ခြမ်းမှ ဝင်ရောက် စစ်ဆေးခဲ့ကြောင်း ထုတ်ပြန်ချက်က ဆိုသည်။

ပြီးခဲ့သည့် နိုဝင်ဘာလ အစပိုင်းက စစ်ခေါင်းဆောင် မင်းအောင်လှိုင် ယူနန်ပြည်နယ်သို့ သွားရောက်စဉ် တိုင်းရင်းသား လက်နက်ကိုင်များ ထိန်းချုပ်ထားသည့် နယ်စပ်ဂိတ်များ ပိတ်ပေးရန် တရုတ်အစိုးရထံ တောင်းဆိုပြီးနောက် တရုတ်ဘက်မှ နယ်စပ် ပိတ်ဆို့မှုများ ဆက်တိုက် ပြုလုပ်လာသည်။

ယင်းသို့ နယ်စပ်ပိတ်ဆို့ သဖြင့် သျှမ်းမြောက် ဒေသခံလူထု ကုန်ဈေးနှုန်း ကြီးမြင့်မှုနှင့် အလုပ်အကိုင် ရှားပါးမှုများ ကြုံတွေ့နေပြီး ဒုက္ခရောက်နေကြောင်း ဒေသခံပြည်သူများက ပြောဆိုထားသည်။

သျှမ်းမြောက်ကို သိမ်းပိုက်ထားသည့် တိုင်းရင်းသား တော်လှန်ရေးတပ်များ ရိက္ခနှင့် ပစ္စည်း ကိရိယာများ ပြတ်တောက်စေရန် ရည်ရွယ်၍ တရုတ်ဘက်က နယ်စပ် ပိတ်ဆို့ထားစဥ် စစ်ကောင်စီက ပြည်သူများကို နေ့စဥ် ဗုံးကြဲ တိုက်ခိုက်နေသည်။

တရုတ်−မြန်မာနယ်စပ် နယ်စပ်ဂိတ်အားလုံးနီးပါးကို MNDAA၊ KIA နှင့် TNLA တို့ သိမ်းပိုက်ထားပြီး ကချင်ပြည်နယ် ကန်ပိုင်တည်မြို့ကို KIA က ယခုရက်အတွင်း ထပ်မံ သိမ်းပိုက်ခဲ့သည်။