သျှမ်းပြည် တောင်ပိုင်း ပင်လောင်းမြို့တွင် စစ်ကောင်စီမှ လူသားဒိုင်းအဖြစ် ဖမ်းဆီးထိန်းသိမ်းထားသည့် ဖယ်ခုံမြို့နယ် ဒေသခံ ၂၄၀ ကျော်နေရပ် မပြန်ရသေးကြောင်း သိရသည်။
ဖယ်ခုံမြိုနယ် ပူချယ်ကျေးရွာနှင့် ကုန်းဆုံကျေးရွာရှိ ဒေသခံ ၂၄၀ ကျော်ကို စစ်ကောင်စီမှ ပြီးခဲ့သည့် (နိုဝင်လာလ ၁၁ ရက်) တွင် လူသားဒိုင်း အဖြစ် မတရားဖမ်းဆီးကာ ပင်လောင်းမြို့ မိုးလုံလေလုံ အားကစားရုံတွင် ထိန်းသိမ်းထားကြောင်း ဒေသခံများက ပြောသည်။
တစ်ပတ် ကျော်ကြာ လူသားဒိုင်းအဖြစ် မတရားဖမ်းဆီးထိန်းသိမ်းခံရသော ဒေသခံများသည် လက်ရှိ အချိန်ထိနေရပ်ပြန်ခွင့် မရသေးသည့်အပြင် အပြင်ထွက်သွားလာခြင်း ဈေးဝယ်ခြင်းတို့ကို အချိန်အကန့်သတ် ဖြင့်သာ ပေးသွား နေကြောင်း ဖမ်းဆီးခံရသည့် သူနှင့်နီးစပ်သူတစ်ဉီးက သျှမ်းသံတော်ဆင့်ကိုပြောသည်။
“ကျမတို့ ရောက်နေတာကြာပြီ။ သူတို့က ခဏရှောင်ခိုင်းတယ်လို့ ပြောပြီးခေါ်လာတာ။ စပါးတွေလည်း မသိမ်းရသေး ဘူးပေါ့။စိတ်လည်းပူတယ် ပေးလည်း ပေးမပြန်သေးဘူး၊သူတို့တွေကို အပြင်တွေပေးသွားလည်း အချိန်အကန့်သတ်နဲ့ စစ်ကောင်စီတွေက တော့လုပ်ထားတယ်။သွားလည်း ၁ နာရီလောက်ပဲ အချိန်ပေးတာ”ဟု ၎င်းကပြောသည်။
ဖမ်းဆီးလာစဉ်တွင်လည်း စစ်ကောင်စီမှ အဝတ်နှင့် အိမ်ယာလိပ်များသာ သယ်ဆောင်ခွင့်ပြုပြီး ကား၊ဆိုင်ကယ် နှင့် စားနပ်ရိက္ခာများကို သယ်ဆောင်ယူလာခွင့်မပြုကြောင်း ၎င်းက ဆိုသည်။
စစ်ကောင်စီမှ ဖမ်းဆီးလာသော ပူချယ်ကျေးရွာနှင့် ကုန်းဆုံကျေးရွာ ဒေသခံများကို ပင်လောင်းမြို့ ဒေသခံများမှ စားသောက်ရန်းအတွက် တာဝန်းယူ ထားရကြောင်း ပင်လောင်းမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“သူတို့တွေက ခေါ်လာပြီး မိုးလုံလေလုံကွင်းမှာလာထားတာပေါ့။ကျနော်တို့ကတော့ သူတို့စားသောက်ရေးအ တွက်ကတော့ သွားလှူရတယ်။ဘယ်လောက်ကြာမလဲ ဆိုတာလည်းမသိရဘူး။အခက်အခဲတော့ ကိုယ်စီရှိ ကြတာပေါ့။သူတို့တွေကိုလည်း အစောင့်နဲ့ ထားထားတယ်ပြီးတော့ ခုထိလည်းပေးမပြန်ကြသေးဘူး။”ဟု ပင်လောင်းမြို့ ဒေသခံအမျိုးသားတစ်ဦးက ပြောသည်။
ထိုဖမ်းဆီး ထိန်းသိမ်းခံရသည့် ဒေသခံ ၂၄၀ ကျော်သည် အမျိုးသား ၁၃၈ ဦး၊ အမျိုးသမီး ၁၀၆ ဦးရှိပြီး၊ ထိုအထဲတွင် တောင်သူများ၊ ၊သက်ကြီးရွယ်အို၊ လေဖြတ်နေသူ၊ နာတာရှည်ရောဂါသည်၊ မသန်စွမ်း၊ ကိုယ်ဝန်ဆောင်၊ နို့တိုက်မိခင်၊ ကလေးသူငယ်များ ပါရှိနေကြောင်း သိရသည်။
လက်ရှိအချိန်ထိ ပင်လောင်း – ဖယ်ခုံ – မိုးဗြဲ လမ်းတစ်ကြောတွင် စစ်ကောင်စီ နှင့် ကရင်နီတော်လှန်ရေး တပ်ပေါင်းစုတို့ တိုက်ပွဲများဆက်လက် ပြင်းထန်နေကြောင်း ဒေသခံများက ပြောသည်။
Leave a Comments