တအာင်း(ပလောင်) အမျိုးသားလွတ်မြောက်ရေးတပ်မတော်(TNLA) ထိန်းချုပ်သည့် ဒေသများကို စစ်ကောင်စီ က ယခုရက်ပိုင်း လေကြောင်းဗုံးကြဲမှု အပြင်းအထန် တိုက်ခိုက်နေပြီး အရပ်သားသေဆုံးမှု အများအပြား ရှိကြောင်း စုံစမ်းသိရသည်။
TNLA ထိန်းချုပ်သည့် နောင်ချိုမြို့နှင့် မိုးကုတ်မြို့ ကို စစ်ကောင်စီက နိုဝင်ဘာ ၁၁ရက်မှစတင်ကာ လေကြောင်း ဗုံးကြဲမှု အပြင်းအထန်တိုက်ခိုက်ပြီး အရပ်သား ၂၀ ကျော်သေဆုံးခဲ့ကြောင်း သတင်းရရှိသည်။
နိုဝင်ဘာ ၁၁ရက်တွင် စစ်ကောင်စီ တပ်က မိုးကုတ်မြို့ လူအိပ်မောကျချိန်တွင် လေကြောင်းဖြင့် အထက် လယ်ဦးရပ်ကွက် နှင့်အနောက်ပိုင်း မြို့ဦးလွင်အနီး တို့ကို ဗုံးကြဲတိုက်ခိုက်ခဲ့ပြီး ဒေသခံ ၉ ဦးသေဆုံးခဲ့ကာ ဒဏ်ရာရရှိသူများလည်း ရှိနေကြောင်း မိုးကုတ်ဒေသခံ များထံသိရသည်။
အလားတူ (နိုဝင်ဘာလ ၁၂ ရက်)တွေ့တွင်လည်း စစ်ကောင်စီက နောင်ချိုမြို့ရှိ မြို့မဈေးအနီးရှိ “လန်းဆန်း”လက်ဖက်ရည်ဆိုင် ကို ဗုံးကြဲတိုက်ခိုက်ခဲ့ပြီး ဒေသခံ ၁၁ ဦးထပ်မံသေဆုံးခဲ့သည်။
TNLA ထိန်းချုပ်ထားသည့် မိုးကုတ်မြို့နှင့် နောင်ချိုမြိုကို စစ်ကောင်စီက ၂ ရက်ဆက်တိုက် လေကြောင်းဖြင့် တိုက်ခိုက်ခဲ့သည့်အတွက် နှစ်ရက်အတွင်း သေဆုံးသူ ၂၀ ဦးထိရှိခဲ့ပြီး ကလေးအပါအဝင် ဒဏ်ရာရရှိသူ ၂၀ ကျော် ရှိနေကြောင်း အသက် ၃၀ အရွယ်ရှိ နိုင်ငံရေး တက်ကြွလှုပ်ရှားသည့် ဒေသခံ အမျိုးသားတစ်ဉီးက သျှမ်းသံတော်ဆင့်ကိုပြောသည်။
“နိုဝင်ဘာ ၁၁ ရက်နေ့က ဗုံးကြဲတာ။ ကျနော်တို့ အိမ်လည်းထိတယ်။အနောက်ပိုင်း နဲ့ အရှေ့ပိုင်းမှာရှိတဲ့ ရပ်ကွက်ပေါ်ကို သူတို့တွေက ညကြီး ဗုံးလာကြဲသွားတယ်။ သေတဲ့လူ ၉ ယောက်ရှိတယ်။ ကလေးတစ်ယောက် လည်း ထိတယ်။ တခြား လူကြီးတွေပါရင် ၁၂ ယောက် ၁၃ ယောက်လောက်ရှိမယ်။ နောင်ချိုမှာလည်း အများကြီး သေတယ် ကားသမားနဲ့ ခရီးသယ်တွေ။”ဟု ၎င်းက ဆိုသည်။
စစ်ကောင်စီ၏ ပေါင် ၅၀၀ ဖြင့် ဗုံးကြဲတိုက်ခိုက်မှုကြောင့် သေဆုံးမှုများခဲ့သည့် အပြင် နေအိမ်များစွာလည်း ထိခိုက်ပျက်စီးခဲ့ကြောင်း သိရသည်။
မိုးကုတ်မြို့ကို ပြီးခဲ့သည့် ဇူလိုင်လ ၂၄ ရက်က TNLA အပြီးသတ် သိမ်းပိုက်ပြီးနောက် တိုက်ပွဲများ ဖြစ်ပွားခြင်းပဲ လေကြောင်းဗုံးကြဲမှုများ စတင်ပြုလုပ်ခဲ့သည်။
Leave a Comments