သျှမ်းပြည်မြောက်ပိုင်း၊ မိုင်းရယ်မြို့နယ်မှာ စစ်တပ်မှ ဆက်တိုက်အင်အားဖြည့်တင်းလာနေကြောင်း ဒေသခံများ ပြောပြချက်အရသိရသည်။

စစ်ခေါင်းဆောင် မင်းအောင်လှိုင်မှ နိုဝင်ဘာလ( ၆ ရက်)တွင်  တရုတ်ခရီးစဉ်ကို သွားရောက်ခဲ့ပြီး တရုတ်-မြန်မာနယ်စပ် ဂိတ်များကို စစ်တပ်မှ အပြည့်ဝ စီမံခန့်ခွဲခွင့်ရရေး ဆောင်ရွက်မည်ဟု တရုတ်ဝန်ကြီးချုပ် Mr. Li Qiang က မင်းအောင်လှိုင်ကိုပြောသည်။

ထို့အပြင် တရုတ်နိုင်ငံအနေဖြင့် မြန်မာနိုင်ငံ၏ အချုပ်အခြာ အာဏာနှင့် နယ်မြေပိုင်ဆိုင်မှုကို စစ်ခေါင်းဆောင်ကိုသာလျှင် အသိမှတ်ပြုကြောင်း တရုတ်ဝန်ကြီးချုပ်က ပြောသည်။

အဆိုပါ ခရီးစဉ် အပြီးတွင် စစ်တပ်မှ ကိုးကန့်တပ်ဖွဲ့ (MNDAA) နှင့် သျှမ်းပြည်တိုးတက်ရေးပါတီ (SSPP/SSAA) တို့ တပ်စွဲထားသည့် တန့်ယန်းနှင့် မိုင်းရယ် ဖက်တွင် စစ်ကောင်စီအင်အား သုံးထောင်ကျော် ထပ်ဖြည့်လာကြောင်း ဒေသခံများက ပြောသည်။

“ ဒီလအစကနေ ခုထိ စစ်တပ်က မိုင်းရယ်ဘက်ကို အင်အားဖြည့်လာတာ ငါးရာ တစ်ထောင် လောက်ရှိပြီ။ အခုဆို မိုင်းရယ်နဲ့ တန့်ယန်းဖက်မှာ စစ်အင်အား သုံးထောင်လောက် ရှိပြီ။” ဟု မိုင်းရယ်ဒေသခံ တစ်ဦးက သျှမ်းသံတော်ဆင့်ကို ပြောသည်။

စစ်အင်အား ဆက်တိုက်ဖြည့်တင်းလာမှုကြောင့် ဒေသခံများ စိုးရိမ်မှုများရှိနေပြီး ကောက်ပဲသီးနှံများကို အလျှင်မြန်ရိတ်သိမ်းကာ သိုလှောင်မှု မလုပ်ပဲ အမြန်ရောင်းချနေသည်ဟု ခြံပိုင်ရှင် အမျိုးသား တစ်ဦးက ပြောသည်။

“ ဒေသခံအချင်းချင်းကြားမှာတော့ သီးနှံတွေကို အမြန်ရိတ်သိမ်းပြီး ရောင်းဖို့ ပြောကြတာပေါ့။ အရင်ဆို သီးနှံတွေကို သိုလှောင်တယ်။ အခုက အမြန်ရောင်းဖို့ လုပ်နေကြတယ်။ စိတ်ပူတာပေါ့။ တိုက်ပွဲတော့ ထပ်မဖြစ်စေချင်ဘူး။ စစ်ဖြစ်ရင် ကလေးတွေ ပညာဆက်မသင်ရဘူး။ ထပ်ပြီးတော့ စစ်ရှောင်ရမှာ။ အစကတည်းက စားဖို့တောင် ခက်ခဲနေတာ။ စစ်ဖြစ်ရင် မလွယ်ဘူး။” ဟု အသက်သုံးဆယ်ကျော် အမျိုးသားတစ်ဦးက ပြောသည်။

သျှမ်းမြောက်တွင် “၁၀၂၇စစ်ဆင်ရေး” နောက်ပိုင်း ညီနောင်မဟာမိတ်များ မသိမ်းပိုက်ရသေးသည့် မြို့သည် မိုင်းရယ်တစ်ခုသာ ကျန်ရှိတာကြောင့် ပွင့်လင်းရာသီရောက်ချိန်တွင် စစ်ပွဲ ဆက်လက် ဖြစ်ပွားနိုင်ခြေ ရှိသည်ဟု ၎င်းအမျိုးသားက ထပ်လောာင်းပြောသည်။

ယခုလက်ရှိသျှမ်းမြောက်တွင် တရုတ်-မြန်မာနယ်စပ်ရှိ ကုန်ုသွယ်ရေးဂိတ်များကို တရုတ်ဖက်မှ ကန့်သတ် ပိတ်ဆို့ထားပြီး စစ်ကောင်စီအပြည့်ဝထိန်းချုပ်နိုင်ရေး ဆောင်ရွက်နေကြောင်း တရုတ်ဝန်ကြီးချုပ်က ပြောသည်။

ညီနောင်မဟာမိတ်တပ်များ ဝိုင်းထားသည့် မူဆယ်နယ်စပ်ဂိတ်ကိုသာ စစ်ကောင်စီထိန်းချုပ်နိုင်ပြီး ကျန်ဂိတ်များကို တိုင်းရင်းသား တော်လှန်ရေးတပ်များက ထိန်းချုပ်ထားသည်။

ထို ညီနောင်မဟာမိတ် သုံးဖွဲ့ကို ငြိမ်းချမ်းရေးကို လိုလားကြောင်း ရှင်းလင်းပြတ်သားသည့် လုပ်ဆောင်ချက် ပြမှသာ ငြိမ်းချမ်းရေးဆွေးနွေးနိုင်မည်ဟု စစ်ခေါင်းဆောင်မင်းအောင်လှိုင်က ပြောသည်။

အလုပ်သင် သတင်းထောက် နန်းလရောင် ရေးသားသည်။