သျှမ်းပြည် တောင်ကြီးမြို့ တန်ဆောင်တိုင်ပွဲ‌တော်အတွက် ငှားရမ်းမည့်ဆိုင်ခန်းများသည် မြန်မာငွေ ကျပ် သိန်း ၂၀ ဝန်းကျင် ထိ ရှိနေကြောင်း သတင်းရရှိသည်။

နိုင်ငံရေးအခြေနေရှုပ်ထွေးနေ့သည့်ကြားမှ တောင်ကြီးမြို့ တန်ဆောင်တိုင်ပွဲတော်ကို စစ်ကောင်စီက လာမည့် နိုဝင်ဘာလ ၉ ရက်မှ ၁၅ ရက်နေ့အထိ ကျင်းပပြုလုပ် သွားမည်ဖြစ်ကြောင်း သိရသည်။

ထိုအဝေရာ မီးပုံးပျံကွင်းတွင် တန်ဆောင်တိုင်ပွဲတော်အတွက် ဆိုင်ခန်းများ ဆောက်လုပ်နေကြပြီး ငှားရမ်းမည့် ဆိုင်းခန်းများသည် မြန်မာငွေကျပ် ၄ သိန်းစ၍ သိန်း ၂၀ ဝန်းကျင် အထိ ပေါက်ဈေးရှိနေကြောင်း အသက် ၂၅ ဝန်းကျင် အမျိုးသားတစ်ဦးက သျှမ်းသံတော်ဆင့်ကို ပြောသည်။

“ဆိုင်ခန်းတွေက နေရာတွေပေါ်မူတည်ပြီးတော့ ဈေးတွေက ကွဲကြတယ်။ အပြင်နည်းနည်း ဝေးတဲ့ နေရာတွေ ဆိုရင် ဆိုင်ခန်း ၁ ခန်းကို ၄ – ၆ သိန်းထိရှိတယ်။ ပွဲနဲ့နီးလေ ဈေးပိုတက်လေ။ မုဒ်ဦးအဝင်နားတစ်ဝိုက်ဆို ၁၀ သိန်း။ အထဲမှာဆို ၁၄သိန်းကနေ သိန်း ၂၀ ဝန်းကျင် ထိရှိတယ်။အဲ့ဈေးနှုန်းတွေကတော့ ၁ ပတ်စာပေါ့။”ဟု ၎င်းက ပြောသည်။

လက်ရှိကာလသည် အခြေခံစားသောက်ကုန်စျေးမြင့်တက်နေပြီး ငွေကြေးခက်ခဲနေသည့်ကြား ညမီးကြီး တစ်လုံးကို သိန်း ၁၂၀ ဝန်းကျင်ကုန်ကျမည်ဖြစ်ပြီး စိန်နပန်းမီးပုံးပျံ တစ်လုံးလျှင် သိန်း ၄၀ ကျော်ကုန်ကျကြောင်း မီးပုံးပျံပြုလုပ်သူ နှင့် နီးစပ်သူတစ်ဦး ထပ်မံလောင်းပြောသည်။

“ဒီနှစ်ကတော့ ပစ္စည်းတွေကလည်း ဈေးကြီးတယ်။ညမီးကြီး တစ်လုံးကို သိန်း ၁၂၀ ဝန်းကျင်လောက်ကျတယ် အဲ့ဒါက ဟိုအရင်ချိန်ဆို မီးပုံးပျံအကြီးရတယ်။ ယမ်းတွေကလည်း ဒီနှစ်က ၂၅ ပိဿထိ။ စိန်နပန်းမီးပုံးပျံ ကလည်း တစ်လုံးကို သိန်း ၄၀ လောာက်ရှိမယ်။”ဟု ၎င်းကပြောသည်။

တန်ဆောင်တိုင်ပွဲကို တောင်ကြီးမြို့ ရပ်ကွက်ပေါင်းစုံနှင့် အေးသာယာ၊ ဟိုပုံး ဘက်ရှိ ဒေသခံများလည်း ပူးပေါင်း ပါဝင်မည်ဖြစ်ပြီး ရိုးရာမပျက် စည်ကား သိုက်မြိုက်စွာ ကျင်းပသွားမည်ဟု သျှမ်းပြည်နယ် တောင်ပိုင်း ရိုးရာမီးပုံးပျံ ပညာရှင်များအသင်းက သျှမ်းသံတော်ဆင့်ကို ပြောသည်။

ယခုလက်ရှိတောင်ကြီးမြို့သည် ကရင်နီနှင့် သျှမ်းမြောက်ဘက် စစ်ဘေးရှောင်များအပြင် သျှမ်းတောင်အတွင်း တိုက်ပွဲ ဖြစ်ပွားသည့် ဒေသများမှလည်း လာရောက် တိမ်းရှောင်နေကြသည့် ဒေသဖြစ်သည်။

တန်ဆောင်တိုင်ပွဲတော်အတွင်း ဟိုတယ်အခန်းများ လူပြည့်နေသည့်အပြင် အခန်းခများလည်း ဈေးမြင့်တက် နေကြောင်း သိရသည်။