သျှမ်းပြည်တောင်ပိုင်း၊ ဟိုပုံးမြို့နယ် ထမ်းစမ်းဂူတွင် ပြန်လည်ထူထောင်ရေးကာလ၌ အခက်အခဲကြားမှ ပွဲတော်ပြန်လည်ကျင်းပခဲ့ကြောင်း စုံစမ်းသိရသည်။
ယမန်နေ့ (အောက်တိုဘာ ၃၁ ရက်)တွင် ဟိုပုံးမြို့နယ် ထမ်းစမ်းကျေးရွာရှိ ထမ်းစမ်းဂူ ဘုရားပွဲတော်ကို ပြန်လည်ကျင်းပပြုလုပ်ခဲ့ပြီး မဲနယ်တောင်ကြောမှ ရေဘေးသင့် ကျေးရွာများ အပါအဝင် ရွာပေါင်း (၈၀) ကျော်မှ ဒေသခံများ ပါဝင်ဆင်နွှဲခဲ့ကြကြောင်း သိရသည်။
သဘာဝဘေးနှင့် စစ်ဘေးကြုံရသူများက အဆိုပါ ထမ်းစမ်းဂူ မီးထွန်းပွဲတော်ကို စည်ကားသိုက်မြိုက်စွာ ကျင်းပသည်ထက် ဒေသပြန်လည်ထူထောင်ရေးကို ပိုပြီး အာရုံစိုက်သင့်ကြောင်း၊ ဒုက္ခရင်ဆိုင်နေရသည့်ကြား ပွဲတော်ကျင်းပသည်မှာ အဆင်မပြေမှုများစွာ ရှိကြောင်း ပအိုဝ်းလူငယ် တစ်ဦးက ပြောသည်။
“ကိုးကွယ် ယုံကြည်မှု တစ်ခုလို့ပဲ မြင်တယ်ပေါ့လေ။ ဒါပေမယ့် ကိုယ်တွေက ဒီလို ရေဘေးဖြစ်လိုက်၊ စစ်ဘေးဖြစ်လိုက်နဲ့ သောကမျိုးစုံ ရင်ဆိုင်ကြုံတွေ့နေရတဲ့ အချိန်မှာ မိသားစုနဲ့ ဒေသ ပြန်လည်ထူထောင်ရေးက ပိုအရေးကြီးတယ်။ တစ်ဘက်မှာလည်း ဒီလောက် ဒုက္ခရောက်ကြတာ ပွဲကျင်းပနိုင်ကြပါလား ဆိုတဲ့ မေးခွန်းတွေလည်း ဖြစ်လာမယ်”ဟု အဆိုပါ ဒေသခံ ပအိုဝ်းလူငယ်တစ်ဦးက ပြောဆိုသည်။
၎င်းပွဲတော်ကို ထမ်းစမ်းဂူအဖွဲ့ဝင် ဆရာတော်များနှင့် ထမ်းစမ်းဂူ ဂေါပက အဖွဲ့များ ဦးဆောင်ကျင်းပခဲ့ပြီး ကပ်ဆိုးများကို ကျော်လွှားနိုင်ရန် ရည်ရွယ်ချက်ဖြင့် မီးထွန်းပွဲတော်ကျင်းပခြင်း ဖြစ်ကြောင်း ဒေသခံများက ပြောဆိုသည်။
“ပွဲတော်ကတော့ ဒီတန်ကွတ်တန် မီးပုံးက ကပ်ဆိုးကြီးတွေကို ကျော်လွှားနိုင်ခြင်းလို့ ဆိုလိုတယ်။ ဒါကြောင့် ကပ်ဆိုးတွေကို ကျော်လွှားနိုင်အောင် စုပေါင်းပြီး ပွဲတော်ပြုလုပ်တာပါ။ လူစည်တာတော့ တွေ့တယ်”ဟု ပွဲတော်သွားရောက်ခဲ့သူ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထမ်းစမ်းဂူပွဲတော်အတွင်း နယ်မြေလုံခြုံရေးကို ပအိုဝ်းပြည်သူ့စစ်(PNO) မှ လုံခြုံရေး ယူပေးခဲ့ကြောင်း သိရသည်။
ယခုလက်ရှိ ဟိုပုံးမြို့နယ်တွင် သဘာဝဘေးကြောင့် ပျက်စီးသွားခဲ့ရသည့် နေအိမ်များ၊ လမ်းများနှင့် စိုက်ခင်းများကို ပြန်လည်ပြုပြင်ရန် အကူအညီများစွာ လိုအပ်နေသေးကြောင်း ဒေသခံများ ပြောပြချက်အရ သိရသည်။
အလုပ်သင် သတင်းထောက် နန်းလရောင် ရေးသားသည်။
