သျှမ်းပြည်မြောက်ပိုင်းရှိ ကိုးကန့်တပ်ဖွဲ့ ထိန်းချုပ်ထားနိုင်သည့် နယ်မြေများသို့ စစ်ကောင်စီတပ်မှ လေကြောင်းဗုံးကြဲ တိုက်ခိုက်ခဲ့ခြင်းကြောင့် အရပ်သား (၃၈) ဦးထက်မနည်း သေဆုံးပြီး (၁၂၄) ဦး ဒဏ်ရာရရှိခဲ့ကြောင်း MNDAA က ယနေ့(နိုဝင်ဘာ ၁ ရက်)တွင် ထုတ်ပြန်လိုက်သည်။

ဇူလိုင်လမှ အောက်တိုဘာလအထိ “၁၀၂၇ စစ်ဆင်ရေး” ဒုတိယပိုင်း လေးလအတွင်း စစ်ကောင်စီတပ်သည် ကိုးကန့်တပ်ဖွဲ့ ထိန်းချုပ်ထားနိုင်သည့် လားရှိုး၊ လောက်ကိုင်နှင့် သိန္နီ စသည့်နယ်မြေများရှိ စစ်ရေးပစ်မှတ် မဟုတ်သော နေရာများကို လေကြောင်းမှ ဗုံးကြဲတိုက်ခိုက်မှု အကြိမ်(၅၀) ကျော် ပြုလုပ်ခဲ့ပြီး ဗုံး(၂၀၀) ကျော် ကြဲချခဲ့ကြောင်း MNDAA က ပြောသည်။

၎င်းလေကြောင်း တိုက်ခိုက်မှုများအတွင်း အရပ်သား (၃၈) ဦးထက်မနည်း သေဆုံးပြီး (၁၂၄) ဦး ဒဏ်ရာရရှိခဲ့သည့်အပြင် စစ်သုံ့ပန်း (၅) ဦးလည်း ဗုံးကြဲတိုက်ခိုက်မှုကြောင့် သေဆုံးခဲ့ရကြောင်း MNDAA ထုတ်ပြန်ချက်တွင် ရေးသားထားသည်။

လေကြောင်းတိုက်ခိုက်ခံခဲ့ရသည့် ပစ်မှတ်ဧရိယာများမှာ လားရှိုး၊ လောက်ကိုင်နှင့် သိန္နီမြို့နယ်တို့ ဖြစ်ပြီး လူစုလူဝေးရှိသည့် စာသင်ကျောင်း၊ ဆေးရုံ၊ စေတီနှင့် ကွမ်ရင်မယ်တော်ကျောင်းကဲ့သို့ သမိုင်းဝင် ဘာသာရေး အဆောက်အဦးများ၊ အများပြည်သူ အိုးအိမ်များကိုလည်း ဗုံးကြဲတိုက်ခိုက်ဖျက်ဆီးခဲ့ကြောင်း သိရသည်။

အရှေ့မြောက်ပိုင်း တိုင်းစစ်ဌာနချုပ် အခြေစိုက်ရာ လားရှိုးမြို့ကို ကိုးကန့်တပ်ဖွဲ့ MNDAA သိမ်းပိုက်ပြီးနောက် စစ်ကောင်စီတပ်၏ လေကြောင်းဗုံးကြဲ တိုက်ခိုက်ရေးပစ်မှတ် ဖြစ်လာပြီး ဒေသခံများ နေရပ်မပြန်နိုင်ရန်နှင့် လုပ်ငန်းမလည်ပတ်နိုင်ရန် ခြိမ်းခြောက်တားမြစ်လျက် ရှိကြောင်း ထုတ်ပြန်ချက်တွင် ဆိုထားသည်။

လက်ရှိတွင် ညီနောင်မဟာမိတ်တပ်များကို တိုက်ပွဲရပ်တန့်ရန် တရုတ်ဘက်မှ ဖိအားပေးလျက် ရှိနေပြီး နယ်စပ်ဂိတ်များကို စတင်ပိတ်လိုက်သည့်အပြင် စစ်ကောင်စီတပ်မှ ညီနောင်မဟာမိတ်တပ်များ ထိန်းချုပ်ထားသည့် နယ်မြေများသို့ လေကြောင်းတိုက်ခိုက်မှုများ ပိုမိုလုပ်ဆောင်လာခြင်းကြောင့် ပြည်သူများမှာ စားဝတ်နေရေး ပိုမိုကြပ်တည်းလာကြောင်း ဒေသခံများထံမှ သိရသည်။ 

)